सुध्रँदै ओली-नेपाल सम्बन्ध, बाक्लियो संवाद र भेटघाट

A+ A A-

एमाले अध्यक्ष केपी शर्मा ओली र एकीकृत समाजवादीका अध्यक्ष माधव नेपालबीच २६ फागुन अर्थात् शनिबार भेटघाट भएको छ । नयाँ गठबन्धनको सरकार बनेसँगै ओली र नेपालको सम्बन्धमा सुधार देखिएको छ । संवाद तथा भेटघाट बाक्लिन थालेको छ ।

नयाँ गठबन्धन बनाउने क्रममा साना दलहरूलाई मिलाउने कुरामा अलमल भइरहेका बेलामा एमालेभित्र एसलाई साथ लिन नहुने मत थियो । नयाँ गठबन्धनमा साथ नलिने हो भने उसलाई पार्टी एकताको दबाब छिटो पर्ने विश्लेषण थियो । तर, ओलीले भने गठबन्धनमा लिएर नै एकतामा ल्याउने नीति लिएको देखिन्छ ।

शनिबार दुई नेताबीच भएको भेटघाटको विषय खुलेको छैन । अध्यक्ष नेपालले उपाध्यक्ष प्रमेश हमाल र महासचिव घनश्याम भुसाललाई समेत लिएर ओलीसँग भेट गरेको एस स्रोतले दाबी गरेको छ । स्रोतका अनुसार पार्टी एकतादेखि नयाँ गठबन्धनको भविष्यसम्मको विषयमा छलफल भएको छ ।

एमालेको समेत साथ पाएर बनेको नयाँ गठबन्धनका प्रधानमन्त्री पुष्पकमल दाहाल प्रचण्डले ३० फागुनमा विश्वासको मत लिने तयारी भइरहेको बेलामा ओली र नेपालवीच छलफल भएको हो ।

२६ फागुनमै ओली र प्रचण्डबीच पनि गोप्य छलफल भएको थियो । त्यसो त प्रचण्डले विश्वासको मत पाउन नै संकट रहेको राजनीतिक वृत्तमा चर्चा भइरहेका बेलामा ओली र प्रचण्ड तथा नेपाल र ओलीबीच गोप्य छलफल भएका हुन् ।

पछिल्ला दिनमा एमाले र एसबीच एकताको चर्चा पनि हुन थालेको छ । एस अध्यक्ष नेपाल स्वयम् एमालेसँग पार्टी एकता गर्ने मनसाय भने पुगेका छन् ।

एसभित्र अध्यक्ष नेपाल अहिले अल्पमत पर्न थालेका छन् । पार्टी निरन्तर कमजोर भइरहेको छ । नेता कार्यकर्ता निरन्तर पार्टी छोड्ने लाइनमा रहेका छन् । सोही कारणले दबाबमा रहेका नेपाल पार्टी विसाउने अवसरको खोजीमा छन् । त्यसलाई बुझेको एमाले पनि दबाबमै राखेर एसलाई एमालेमा सामेल गर्न चाहन्छ ।

अझ एमाले त नेता कार्यकर्ताको अलवा १० जना सांसदमा नजर लगाएको छ । एमालेले एसका १० जना सांसद लिन पाए संसदको ठूलो दल बन्ने मौका पाउने थियो । त्यसले गर्दा उसको रणनीतिक मुभका लागि महत्त्वपूर्ण भूमिका हुने थियो ।

एमालेभित्रको यही विश्लेषणका कारण ओलीले व्यक्तिगत रूपमा नरुचाए पनि नेपालसँग संवाद भने बढाउन थालेका छन् । एसनिकट स्रोतका अनुसार शनिबारको भेटमा पनि आफूको केही कमजोरी भएको तर कमजोरीको समीक्षासहित साथै जान सकिने नेता नेपालको भनाइ थियो । अध्यक्ष ओलीले पनि सोही आशय व्यक्त गरेको बताएको छ ।

यद्यपि, नेपालले भविष्यमा प्रधानमन्त्री हुने आश भने राखेका छन् । एमालेसँग मिल्दा प्रधानमन्त्री पाउने गरी सहमति जुटाउने अपेक्षा राखेर कुरा गरिरहेको बताइएको छ । कांग्रेस माओवादीसहितको गठबन्धन बन्दा नेपाललाई पनि एक वर्ष प्रधानमन्त्री बनाउने सहमति भएको थियो । उक्त सहमतिकै स्पिरिटमा एमालेसँग गठबन्धनमा प्रधानमन्त्रीको आश राखेको एसका नेताले बताए ।

तर, ओली उक्त आस्वासन दिन भने तयार देखिएका छैनन् । त्यसो त, तत्काल नै एकता भइहाल्ने अवस्था भने नरहेको एमाले र एस स्रोतको दाबी छ । केही समय अझै दुई पार्टीका नेताहरू छलफल चल्ने अनि विश्वासको वातावरण बनाउने प्रयास भइरहेको छ ।

प्रकाशित मिति: आइतबार, फागुन २७, २०८० ०७:४५