भक्तपुरमा एकै परिवारका तीन पुस्ताले खिचेका तस्वीर प्रदर्शनी गरिँदै

A+ A A-

भक्तपुरमा एकै परिवारका तीन पुस्ताले खिचेका तस्वीरहरूको प्रदर्शनी गरिने भएको छ । जिल्लाका सम्भवतः पहिलो फोटोग्राफर भनिने स्वर्गीय बद्री बनेपाली, उनका छोरा केदार बनेपाली, नाती किसन र नातिनी सुनीले खिचेका ६८ वटा तस्वीरहरू प्रदर्शनी गर्न लागिएको हो ।

शनिबार जगातीमा आयोजित पत्रकार सम्मेलनमा आयोजक भक्तपुर पर्यटन विकास समितिका अध्यक्ष दीपेशराज शर्माले यही फागुन १८ र १९ गते भक्तपुर दरबार क्षेत्रमा ‘ब्रिलियन्ट भक्तपुर फोटो प्रदर्शनी’ गरिने जानकारी दिए । भक्तपुर पर्यटन बोर्ड सन् १९९७ मा स्थापित गैरसरकारी संस्था हो ।

428206914_1220279799355242_6839128174269492825_n1708846591.jpg

‘तीन पुस्ताले विभिन्न कालखण्डमा खिचेका भक्तपुर, काठमाडौं, ललितपुर र काभ्रेका ऐतिहासिक तथा पुरातात्विक महत्त्वका सम्पदासँगै यहाँको रहनसहन, जात्रापर्व, रितिरिवाज एवं संस्कृति झल्किने फोटोहरू प्रर्दशनीमा राखिने छ’, उनले भने ।

एउटै परिवारको तीन पुस्ताले खिचेका तस्वीरहरूको प्रदर्शनी भक्तपुरमा मात्र नभएर नेपालमै पहिलोपल्ट हुन लागेको शर्माले दाबी गरे ।

अध्यक्ष शर्माले भने, ‘फरक–फरक खालखण्डको भक्तपुरको फोटोहरूले यहाँको परिवर्तित जीवनशैली मात्र झल्काउँदैन, यहाँका सम्पदाहरूमा आएको परिवर्तनलाई पनि देखाउँछ ।’

यसले भक्तपुरको सांस्कृतिक वैभव तथा आर्थिक एवं सामाजिक क्षेत्रमा आएको सकारात्मक परिवर्तनसमेत उजागर गर्ने विश्वास लिएको उनले बताए ।

उनका अनुसार, प्रदर्शनीमा तीन पुस्ताले खिचेका ६ दर्जन तस्वीर राखिने छ ।

फोटोग्राफर बद्री बनेपालीले यसअघि आफ्ना बुबा बद्री बनेपालीको एकल तस्वीर प्रदशनी गरिए पनि तीन पुस्ताको सँगसँगै पहिलोपल्ट हुन लागेको भन्दै खुसी व्यक्त गरे ।

उनले भने, ‘मेरा बुबाको पछि लागेरै म फोटो पत्रकार बनेँ, मेरै कामलाई निरन्तरता दिएर मेरा छोराछोरी फोटो पत्रकार बने । अहिले सँगसँगै फोटो प्रदर्शनी गर्न पाउँदा खुसी लागेको छ, मलाई विश्वास छ, हाम्रो परिवारले खिचेका तस्वीरमार्फत भक्तपुरको इतिहासदेखि वर्तमान देखिने छ ।’

भक्तपुर दरबार क्षेत्रस्थित तहा सत्तलमा हुने प्रदर्शनीमा राखिने तस्वीरहरू अवलोकन सँगै बिक्रीको लागि पनि उपलब्ध हुने बोर्डले जनाएको छ ।

केदार, उनका छोरा र छोरी फोटोग्राफीमा सक्रिय छन् । केदार ७० वर्षअगाडि आफ्ना बा बद्रीप्रसादले खोलेको ‘दत्तात्री फोटो स्टुडियो’ चलाएर बसेका छन् ।

यो पनि..

भक्तपुरमा फोटोग्राफी सुरु गर्ने बनेपाली परिवार, बाजेदेखि नातिनातिनासम्मकाे क्यामेरा साइनाे (भिडियाेसहित)

प्रकाशित मिति: आइतबार, फागुन १३, २०८० १३:०९