अन्तर्राष्ट्रिय पर्वतीय क्रस कन्ट्री दौडमा एपीएफ च्याम्पियन

A+ A A-

खेलकुदको माध्यमबाट चिनियाँ पर्यटक आकर्षित गर्ने उद्देश्यले पोखरामा आयोजित अन्तर्राष्ट्रिय पर्वतीय क्रस कन्ट्री दौड प्रतियोगिताको उपाधि विभागीय टोली सशस्त्र प्रहरी बल (एपीएफ) ले जितेको छ ।

बुधबार पोखरामा आयोजित ४२ किमी दूरी पार गर्ने प्रतियोगिताअन्तर्गत २२ किलोमिटर दौड, १९ किलोमिटर साइक्लिङ र १.२ किलोमिटर बोटिङ (डुंगा) गर्दै दूरी तय गर्ने क्रममा चिनियाँ टोलीलाई पछि पार्दै सशस्त्र टोलीले प्रतियोगिताको उपाधि आफ्नो पोल्टामा पारेको हो ।

सशस्त्र प्रहरी बलको तर्फबाट सहभागी सन्तोषविक्रम विष्ट, गणेश खत्री र इन्द्रकला नेम्वाङले ४ घण्टा १७ मिनेट २२ सेकेण्डमा सो दूरी पार गरेका थिए ।

उनीहरूलाई पछ्याएको गोरिल्ला ट्रेल टिम भने १ मिनेट १ सेकेण्डले पछि पर्दै उपविजेता बनेको छ । गोरिल्ला ट्रेल टिमले ४ घण्टा १८ मिनेट २३ सेकेण्डमा सो दूरी पार गरेको थियो । उक्त टिममा दुर्गाराज बुढा, रसिला तामाङ र दामोदर बुढामगर थिए ।

दौड बाराही चोकबाट सुरू भई मट्टिखान रिसोर्ट हुँदै पुनः फेवातालको किनारमा रहेको बाराही चोकमै आएर टुंगिएको थियो ।

दौडको तेस्रो स्थानमा भने पाहुना टोली चीनको काइनेटिक टिम रहन सफल भएको छ । आगन्तुक टोलीले ४ घण्टा २४ मिनेट ३३ सेकेण्डको समय लगाएको थियो । टोलीमा चेन इझेन, पाङ उई झु र लाइ यु जुन रहेका थिए ।

चीनबाट २६ सदस्यीय टोली दौडका लागि पोखरा आएको थियो । चिनियाँ धावकहरू ३ टिममा विभाजित थिए भने नेपाली २२ टिममा ६६ खेलाडी सहभागी थिए । प्रतियोगितामा एउटा समूहमा ३ जना खेलाडी सहभागी थिए ।

पोखरा र चिनियाँ शहर कुनमिङबीचको भगिनी सम्बन्धलाई अझ प्रगाढ बनाउने अभिप्रायले माउण्टेनरिङ एक्सप्लोरेसन एसोसियन कुनमिङ (चीन) को सहयोगमा पोखरा उद्योग वाणिज्य संघ, पश्चिमाञ्चल होटल संघ र जिल्ला खेलकुद विकास समितिको संयुक्त आयोजनामा उक्त प्रतियोगिता भएको हो ।

प्रकाशित मिति: बुधबार, असोज २९, २०७६ १८:४४