पोखरामा ६ लाख नगदसहित कौडा खेल्ने १५ जना पक्राउ

A+ A A-

पोखरामा ६ लाख नगदसहित कौडा खेल्ने १५ जना पक्राउ परेका छन् । जिल्ला प्रहरी कार्यलय कास्कीले आइतबार राति पोखरा महानगरपालिका– १८, चालिसे डाडाँस्थित एक रेष्टुरेण्टबाट अवैध रूपमा कौडा खेलिरहेको अवस्थामा पक्राउ गरेको हो ।

रेष्टुरेण्टमा अवैध रूपमा कौडा खेलिरहेको गोप्य सूचनाका आधारमा छापा मारी ६ लाख १० हजार नगदसहित १५ जना पक्राउ परेको प्रहरीले जनाएको छ ।

उनीहरूलाई कौडा खेलिरहेको अवस्थामा प्रहरी निरीक्षक नरहरि अधिकारीको कमाण्डमा खटिएको प्रहरी टोलीले पक्राउ गरेको गण्डकी प्रदेश प्रहरी कार्यालय पोखराका प्रहरी उपरीक्षक दीपक रेग्मीले जानकारी दिए ।

पक्राउ पर्नेमा बैदामका ४४ वर्षीय खिमलाल पहारी, वीरबहादुर लामिछाने, चीनबहादुर भट्टराई, शक्ति पराजुली, सनोज पहारी, केदार थापा छन् । यस्तै, सोही ठाउँका ३८ वर्षीय लक्ष्मण कुँवर, लक्ष्मण पहारी, कविराज पराजुली, ईश्वर श्रेष्ठ, रामबहादुर थापा, पोखरा– १८, सराङकोटका महेन्द्रबहादुर थापा, भकुण्डेका ध्रुवबहादुर थापा र पोखरा– ११, रानीपौवाका पूर्ण तिमिल्सिना रहेका छन् ।

पोखरा– ६, खहरेका विमल देवकोटा भाग्ने क्रममा लडेर घाइते भएका छन् । उनको मेट्रोसिटी अस्पतालमा उपचार भइरहेको प्रहरीले जनाएको छ । कौडा खेल्नेहरूलाई पक्राउ गर्ने क्रममा दुई जना प्रहरी समेत घाइते भएका छन् ।

उनीहरूको साथबाट ६ लाख १० हजार नगद र ३२ थान कौडा बरामद भएको प्रहरीले जनाएको छ । पक्राउ परेकालाई प्रहरीले जुवातास मुद्दामा म्याद थपेर अनुसन्धान अघि बढाएको छ ।

प्रकाशित मिति: मंगलबार, असोज २८, २०७६ १८:१२