पाकिस्तानमा नवाज शरीफ प्रधानमन्त्रीको दौडबाट हटे, उनैले अघि सारे उम्मेदवार

पाकिस्तानमा नवाज शरीफ प्रधानमन्त्रीको दौडबाट हटे, उनैले अघि सारे उम्मेदवार

तस्वीरः एएफपी ।

A+ A A-

पाकिस्तानमा नयाँ प्रधानमन्त्रीको दौडबाट नवाज शरीफ बाहिरिएका छन् । पाकिस्तान मुस्लिम लिग-नवाज (पीएमएल–एन) का प्रमुख नवाज शरीफले आफ्ना भाइसमेत रहेका पूर्वप्रधानमन्त्री शाहबाज शरीफलाई नयाँ प्रधानमन्त्री र आफ्नी छोरी मरियम नवाज शरीफलाई पञ्जाव प्रान्तको मुख्यमन्त्री बनाउने भएका हुन् ।

पीएमएल–एनको तर्फबाट यस्तो जानकारी सोसल मिडियामा पार्टीकी सूचना प्रसारक मरियम औरन्गजेबले दिएकी हुन् । शहबाज शरीफ सन् २०२२ देखि २३ को बीचमा प्रधानमन्त्री थिए । पाकिस्तानमा कुनै पनि पार्टीले बहुमत पाएनन् । पाकिस्तान पिपुल्स पार्टी (पीपीपी) ले मंगलबार शरीफको पार्टीलाई सरकार बनाउन बाहिरबाटै समर्थन दिने बताएको छ ।

मरियम औरन्गजेबले मंगलबार अबेर रात एक्समा लेखेकी छन्, ‘पीएमएल-एन प्रमुख नवाज शरीफले पार्टी अध्यक्ष शहबाज शरीफलाई प्रधानमन्त्री पदका लागि छनोट गर्नुभएको छ । उहाँले मरियम नवाजलाई पञ्जाब प्रान्तको मुख्यमन्त्री पदमा चयन गर्नुभएको छ ।’

उनले आममतदाता र राजनीतिक दललाई समर्थनका लागि धन्यवाद पनि भनेकी छन् । अब देशमा महँगी र आर्थिक कठिनाइहरूबाट मुक्ति मिल्ने विश्वास पनि उनले व्यक्त गरेकी छन् ।

संसदको २ सय ६४ सिटमध्ये पीएमएल–एनले ८० सिट र पीपीपीले ५४ सिटमा जितेका छन् । यी दुवै पार्टीको सिट मिलाउँदा सामान्य बहुमतका लागि पर्याप्त छ । उता इमरान खानको पार्टी पीटीआई समर्थित ९२ उम्मेदवार निर्वाचित भएका छन् ।

पाकिस्तानमा नयाँ सरकार बनाउन ६ वटा पार्टीबीच गठबन्धन हुने भएको छ । गठबन्धनको नाम हुनेछ, पाकिस्तान डेमोक्रेटिक मुभमेन्ट (पीडीएम) । सरकार बनाउन नवाज शरफिको पीएमएल–एन र बिलावल भुट्टो जरदारीको पाकिस्तान पिपुल्स पार्टी (पीपीपी) बीच पहिल्यै सहमति भएको थियो ।

यो पनि..

इमरान खानको पार्टी विपक्षी हुनेगरी बन्ने पाकिस्तानको नयाँ सरकारका चुनौतीहरू

प्रकाशित मिति: बुधबार, फागुन २, २०८० ११:४६