राष्ट्रपति सीको भोजनः नेपालमा साँधेको भटमास, भारतमा दहीमा बफ्याएको कुभिण्डो

राष्ट्रपति सीको भोजनः नेपालमा साँधेको भटमास, भारतमा दहीमा बफ्याएको कुभिण्डो

A+ A A-

चिनियाँ राष्ट्रपति सी चिनफिङ अहिले काठमाडौंमा छन् । करिब २१ घण्टाका लागि काठमाडौं आएका उनी आज ( २६ असोज) दिउँसो १ बजे स्वदेश फर्कँदैछन् ।

राष्ट्रपति सीको स्वागतमा शनिबार राति नेपालका राष्ट्रपति विद्यादेवी भण्डारीले विशेष रात्रिभोजको आयोजना गरिन् । भोजमा सीले नेपाली परिकारको स्वाद पनि चाखे । यसअघि उनले भारतको दुई दिने भ्रमण गरेका थिए ।

भारतको चेन्नईमा भारतीय प्रधानमन्त्री नरेन्द्र मोदीले पनि सीलाई रात्रिभोजले स्वागत गरेका थिए । शुक्रबार राति तमिलनाडुको महाबलिपुरममा दिइएको रात्रीभोजमा साकाहारी भोजन राखिएको थियो ।

यस्तो थियो मोदीले दिएको भोजको मेनु

थक्कली रासम : टमाटरको गुदीमा विभिन्न मरमसला मिसाएर बनाइएको विशेष दक्षिण भारतीय परिकार सीले लिएका थिए ।

कीराइ वडा : अम्लान पुष्प र मुसुरोको दालबाट बनाइएको ब्रेड पनि सीले ग्रहण गरे ।

पनीर–घीउ रोस्ट : मोदीले दिएको रात्रिभोजमा घ्यू र खुर्सानीमा भुटिएको पनीर पनि राखिएको थियो ।

कडलाई कुरुमा : कालो दाललाई काजु र टमाटरको ग्रेभीमा पकाइएको थियो ।

पूस्निकाइ मोर करी : कुविण्डोलाई मनतातो दहीमा बफ्याएर बनाइएको परिकार मेनुमा थियो ।

वेन्दकाई पोरियाल : भिन्डीको तरकारी पनि थियो ।

बीटरुट गोंगुरा चप : चुकन्दर र केनफको पातलाई दक्षिण भारतमा पाउने विशेष मसला मिसाएर पकाइएको परिकार पनि सीका लागि तयार गरिएको थियो ।

पच सुन्दकाइ अरिचा कोझम्बु : सुन्दकाइ (पी अबरजिन) लाई सख्खर र इमलिसँग पकाइएको परिकार मेनुमा राखिएको थियो ।

अर्चवित्ता साम्बार : मुसुरोेको दाललाई मिहिन ढंगले पिसेको विशेष मसलामा बफ्याएर बनाइएको थियो ।

स्टिम पोन्नी राइस : मसिनो चामलको भात तयार गरिएको थियो । भारतका विशेष ब्रेडहरु ।

अद प्रधमन : सख्खर र नरिवलको तेलमा पकाइएको चामल थियो ।

कवनारसी हलुवा : कालो चामलको खिर पनि बनाइएको थियो ।

मुक्कानी आइसक्रिम : दक्षिण भारतको विशेष आइसक्रिम पनि मेनुमा थियो । अन्तिममा मसला चियासँगै रात्रिभोज समापन गरिएको थियो ।

यस्तो थियो राष्ट्रपति भण्डारीले दिएको भोजको मेनु

शनिबार साँझ काठमाडौं आइपुगेका सीका लागि त्यही दिन साँझ साढे ७ बजे राष्ट्रपति विद्यादेवी भण्डारीले रात्रिभोजको आयोजना गरेकी थिइन् ।

भारतमा भारतीय भोजनको स्वाद लिएका सीले काठमाडौंमा यहाँको विशेष र मौलिक परिकार चाखे । सीका लागि रात्रिभोजमा स्टार्टर, सुप, मेन कोर्ष, डिजर्ट गरी चार तहको खानाको परिकार व्यवस्था गरिएको थियो । राष्ट्रपति सीले नेपाली, युरोपेली र चिनियाँ गरी तीन बेग्लाबेग्लै खानाको स्वाद चाखे ।

रात्रिभोजको सुरुमा सीले नेपाली परिकारको स्वाद ग्रहण गरे ।

नेवारी बारा : सीका लागि नेवारी बाराको विशेष परिकार तयार गरिएको थियो । नेवारी बारा मास वा मुगीको दालबाट बनाइने रोटी हो । बारालाई तेलमा फ्राइ गरेर बनाइएको थियो । यसलाई वोह भनेर नेवारी समुदायमा चिनिने गर्दछ । परम्परागत रूपमा बारा सिलौटामा पिसेको मासको वा मुगीको दालबाट बनाइने गरिन्छ । नेवारी समुदायमा बाराको ठूलो महत्त्व रहेको छ भने पूजादेखि भोज भतेरमा यसको प्रयोग हुने गर्दछ । विजया दशमीको हरेक दिन मासु बिनाको बारा तयार गरेको बिहान नभेद्याको रूपमा भगवानलाई चढाउने गरिन्छ ।

मःम : चिनियाँ राष्ट्रपति सीले मःमको स्वाद पनि लिए । मःम तिब्बती खान्की हो । उहिल्यै व्यापारका लागि तिब्बत जाने नेवारी व्यापारीहरूले मःम नेपाल भित्र्याएको मानिन्छ । ‘मोहमोः’ भन्ने तिब्बती शब्दबाट अपभ्रंश हुँदै नेपालमा आइपुग्दा मःम बनेको हो । तिब्बतमा यसलाई ‘मोहमोः’ भनिन्छ, जसको आकार नेपालमा पाइने मःमको भन्दा ठूलो हुन्छ । अहिले नेपालमा मःम निकै रुचाइने खाने कुरा हो ।

लुक्लाको सिमी र साँधेको भटमास : सीका लागि लुक्लाको सिमी र साँधेको भटमासको व्यवस्था गरिएको थियो जसमा पिरो कम राखिएको थियो ।

कुरिलो र क्वाँटीको सुप : सीका लागि कुरिलोको र क्वाँटीको सुप तयार गरिएको थियो । नेपालको मैदानी जंगलदेखि नौ हजार फिटको उच्च हिमाली भू–भागसम्ममा कुरिलो पाइन्छ । यसलाई आयुर्वेदले औषधिको रानी भनेको छ । सीले चना, मस्याङ, मुगी, बोडी, मास, भटमास, ठूलो सिमी, ठूलो केराउ, सानो केराउ मिसाएर तयार गरिएको क्वाँटीको झोल पनि लिए ।

नेपाली परिकार नेपाली सेफले नै तयार गरेका थिए । तर, त्यसपछि सीले लिएको भोजन भने चीनबाटै ल्याइएका सेफले तयार गरेका थिए । नेपाली परिकार चाखेपछि उनले चिनियाँ सेफले बनाएको चिनियाँ र युरोपेली परिकार लिए ।

इलामको चिया र गुल्मीको कफी : रात्रिभोजको अन्त्यमा चिनियाँ राष्ट्रपति सीलाई इलामको चिया र गुल्मीको कफी चखाइएको थियो । नेपालको पूर्वी जिल्ला इलाम चिया उत्पादनमा चर्चित छ । यहाँको चिया विदेशमा पनि प्रख्यात छ । यस्तै पछिल्लो समय कफी उत्पादनमा गुल्मी निकै अगाडि देखिएको छ । विदेशमा पनि यहाँको कफीको माग उच्च छ ।