मुगुमा बलात्कृत बालिकाको बयान- फकाएर लगे, पालैपालो जबर्जस्ती करणी गरे

A+ A A-

मुगुमा १४ वर्षीया एक बालिका बलात्कृत भएको घटना बाहिरिएको छ । जिल्ला प्रहरी कार्यालय मुगुमा पीडित बालिकाले आफूमाथि ६ बालक र ३ युवक गरी ९ जनाले जबर्जस्ती करणी गरेको किटानी जाहेरी दर्ता गराएपछि घटना बाहिरिएको हो ।

बालिकाले दर्ता गराएको जाहेरीमा प्रहरीदेखि सरकारी कर्मचारीसम्मले आफूमाथि सामूहिक बलात्कार गरेको आरोप लगाएकी छन् । जाहेरीपछि मुगु प्रहरीले छायानाथ रारा नगरपालिकामा कार्यरत नगर प्रहरी छायानाथ नगरपालिका– ५, कार्कीवाडाका ३० वर्षीय वसन्तबहादुर कार्की, कृषि विकास कार्यालय गमगढीका कार्यालय सहयोगी २२ वर्षीय वसन्त रोकाया र ३ बालक गरी ५ जनालाई पक्राउ गरेर अनुसन्धान अगाडि बढाएको छ ।

पक्राउ परेका बालकहरूको भने परिचय खुलाइएको छैन । यस्तै, कृषि विकास कार्यालय गमगढीकै सवारीचालक जुम्लाको चन्दननाथ नगरपालिका- ७ का ३० वर्षीय पदमबहादुर कठायतसहित ३ जना बालक फरार रहेको मुगुका प्रहरी प्रमुख प्रहरी नायब उपरीक्षक (डीएसपी) वीरेन्द्र थापाले बताए । उनीहरूको खोजी भइरहेको थापाले बताए ।

कसरी भयो घटना ?

बालिकाका आफन्तका अनुसार मुगुको छायानाथ रारा नगरपालिका- १४ स्थायी घर भएकी बालिका सदरमुकाम गमगढीस्थित डेरामा बसेर कक्षा ७ मा पढ्दै आएकी थिइन् । पीडित बालिकाले आफूमाथि फरक-फरक समय गरी दुईपटक सामूहिक बलात्कार भएको भन्दै प्रहरीसमक्ष दुईवटा छुट्टाछुट्टै जाहेरी दर्ता गराएकी छिन् ।

आइतबार बाहिरिएको घटना हालैको भने होइन । पेट दुख्ने समस्या देखा परेपछि स्थानीय स्वास्थ्य संस्थामा पुगेकी उनको गर्भमा १८ हप्ताको बच्चा रहेको पाइएपछि घटना बाहिरिएको हो । उनले दर्ता गराएको मुद्दा नम्बर २० मा नाम परिवर्तित छायानाथ (ढ) ६० ले १६ भदौ बेलुका अन्दाजी ९ बजे कोठामा बोलाएपछि आफू पुगेको बताएकी छिन् ।

गमगढीस्थित कोठामा पुगेकी उनीमाथि नाम परिवर्तित छायानाथ (ढ) ६०, छायानाथ (ण) ६०, छायानाथ (त) ६०, छायानाथ (थ) ६०, छायानाथ (द) ६०, छायानाथ (ध) ६० समेतका ६ जनाले पालैपालो जबर्जस्ती करणी गरेका थिए । सोही करणीबाट आफ्नो पेटमा गर्भ बसेको दाबी बालिकाले गरेको प्रहरीको भनाइ छ ।

यो पनि : १४ वर्षीया बालिका बलात्कारमा प्रहरीदेखि सरकारी कर्मचारीसम्म संलग्न

‘पेट दुखेपछि जिल्ला स्वास्थ्य सेवा कार्यालय मुगुमा गएर चेकजाँच गराउँदा मेरो पेटमा गर्भ रहेको कुरा थाहा पाएकी हुँ,’ उनले प्रहरीसँगको बयानमा भनेकी छिन्, ‘मेरो पेटमा रहेको गर्भ उनीहरूमध्ये कसको हो मलाई थाहा छैन । तर, सबैले मलाई उल्लेखित मिति, समय र स्थानमा पालैपालो जबर्जस्ती करणी गरेका हुन् ।’

यस्तै, बालिकाले आफूमाथि १० असोजमा पनि अर्को सामूहिक करणी भएको भन्दै मुद्दा नम्बर २१ मा दोस्रो जबर्जस्ती करणीको जाहेरी दर्ता गराएकी छन् । सोही दिनको राति ९ बजेको समयमा छायानाथ रारा नगरपालिकामा कार्यरत नगर प्रहरी छायानाथ नगरपालिका- ५, कार्कीवाडाका ३० वर्षीय वसन्तबहादुर कार्कीले आफू बस्ने कोठामा आएर फकाएर एकछिन काम छ भनेर बाहिर बोलाएको प्रहरीलाई बयान दिएकी छिन् ।

बाहिर आएपछि कार्कीले आफ्नो हात समाएर आफूसँगै हिँड्न लगाएर कृषि विकास कार्यालय भवनको एक कोठामा पुर्‍याएको उनले प्रहरीसँगको बयानमा भनेकी छन् । उक्त कोठामा पुग्नेबित्तिकै कार्की, कृषि विकास कार्यालयका कार्यालय सहयोगी वसन्त रोकाया र कृषि विकास कार्यालयका सवारीचालक पदमबहादुर कठायतले डर त्रास देखाएर पालैपालो करणी गरेको उनले बयान दिएकी छिन् ।

करणीपछि उनीहरूले बालिकालाई कसैलाई भने ज्यानै खतरामा पर्ने चेतावनी दिएपछि आफू खुल्न डराएको बालिकाले प्रहरीलाई बयान दिएकी छिन् । १४ वर्षीया बालिका कसरी उनीहरूको सम्पर्कमा पुगिन् र बलात्कृत भइन् भन्ने विषयमा सूक्ष्म अध्ययन भइरहेको प्रहरी प्रमुख डीएसपी थापाले जानकारी दिए । हाल बालिकालाई थप उपचारका लागि सुर्खेत पठाइएको छ । उनको स्वास्थ्य अवस्था सामान्य रहेको जनाइएको छ ।

प्रकाशित मिति: सोमबार, माघ १, २०८० १३:२४