१४ वर्षीया बालिका बलात्कारमा प्रहरीदेखि सरकारी कर्मचारीसम्म संलग्न

A+ A A-

मुगुमा १४ वर्षीया बालिकामाथि जबर्जस्ती करणी भएको छ । प्रहरीदेखि सरकारी कर्मचारीसम्मले ती बालिकालाई बलात्कार गरेको खुलेको छ ।

जिल्ला प्रहरी कार्यालय मुगुका प्रमुख प्रहरी नायब उपरीक्षक (डीएसपी) वीरेन्द्र थापाले पीडित बालिकाले प्रहरीमा जाहेरी दिएको शिलापत्रलाई जानकारी दिए । डीएसपी थापाका अनुसार यो घटनामा संलग्न भएको अभियोगमा चार जनालाई प्रहरीले पक्राउ गरेको छ ।

ती बालिकामाथि गत भदौमा बलात्कार भएको देखिएको छ । बलात्कार घटनामा नगर प्रहरी, सरकारी कार्यालयका कर्मचारी र केही स्थानीय व्यक्तिमाथि आरोप लगाइएको छ । बालिकाको गर्भमा भ्रूण हुर्कंदै गएपछि घटना सार्वजनिक भएको हो ।

डीएसपी थापाका अनुसार बलात्कार घटनामा संलग्न रहेको आरोपमा छायाँनाथ रारा नगरपालिका– ५, कार्कीवाडाका ३० वर्षीय पुरुष, छायाँनाथ रारा नगरपालिकाका नगर प्रहरी वसन्तबहादुर कार्की, कृषि विकास कार्यालय गमगढीमा कार्यरत कार्यालय सहयोगी सोरु गाउँपालिका– ८, आँसिधारा गाउँका २२ वर्षीय वसन्त रोकायालगायतविरुद्ध जाहेरी परेको छ ।

१४ वर्षका बालकहरूले गत १६ भदौमा आफूमाथि बलात्कार गरेको र १० असोजमा नगर प्रहरी वसन्त कार्कीसहित वसन्त रोकाया र पदमबहादुर कठायतले बलात्कार गरेको पीडित बालिकाले बयान दिएको डीएसपी थापाले बताए ।

बलात्कारपछि पेट दुख्नेलगायतका समस्या देखापरेपछि बालिका जिल्ला अस्पताल मुगुमा स्वास्थ्य जाँच गराउन पुगेकी थिइन् । अस्पतालमा जाँच गराउँदा उनको गर्भमा बच्चा रहेको पाइएको थियो ।

बालिकाको जाहेरीपछि घटनामा संलग्न रहेको आरोप लागेका तीन बालकसहित नगर प्रहरी वसन्त कार्की र कृषि विकास कार्यालय मुगुका कार्यालय सहयोगी वसन्त रोकायालाई पक्राउ गरिएको र बाँकीको खोजी भइरहेको डीएसपी थापाले बताए ।

प्रकाशित मिति: आइतबार, पुस २९, २०८० १८:४९