गण्डकीका सांसदको हाजिरीमा त्रुटि, रुजुपछि कसको कति ?

A+ A A-

गण्डकी प्रदेशसभा सचिवालयले सार्वजनिक गरेको सांसदहरूको पछिल्लो एक वर्षको हाजिरीमा त्रुटि भएको खुलेको छ ।

संसद सचिवालयले पत्रकारलाई दिएको तथ्यांक र आफू हाजिर भएको संख्या नमिलेपछि सांसदहरू प्रदेशसभा सचिवालय पुगेका थिए । २०७९ पुस १८ मा प्रदेशसभाको दोस्रो कार्यकालको पहिलो बैठक बसेको थियो । एक वर्षमा को सांसद कति बैठकमा उपस्थित भए, कतिपटक संसदमा बोले भनेर शिलापत्रले गत १८ पुसमा समाचार प्रकाशन गरेको थियो । त्यो समाचारमा सांसद र उनीहरूका स्वकीय सचिवले आपत्ति जनाएका थिए ।

यो पनि : ७ कानुन बनाउन ‘माननीय’माथि ८ करोड लगानी, फिटिक्कै बोल्दैनन् मनाङे !

प्रदेशसभाको पहिलो वर्षमा चारवटा अधिवेशन बोलाइएको छ । पहिलो र चौथो अधिवेशन नियमित हुन् भने दोस्रो र तेस्रो अधिवेशन मुख्यमन्त्रीको विश्वासको मत लिने प्रयोजनका लागि डाकिएको थियो । पहिलो अधिवेशन १७, दोस्रो र तेस्रो २-२, चौथो अधिवेशनमा ४१ गरेर पहिलो वर्ष ६२ वटा बैठक बसेको छ । यसअघि सचिवालयले पहिलो अधिवेशनमा १७ र चौथो अधिवेशनमा ४० बैठक बसेको विवरण दिएको थियो । तर, चौथो अधिवेशनमा ४१ बैठक बसेको खुलेको छ ।

यसअघि पहिलो र चौथो गरेर ५७ बैठकको हिसाब गर्दा राप्रपा दल नेता पञ्चराम गुरुङको उपस्थिति सबैभन्दा कमजोर ३१ वटा बैठकमात्र देखिएको थियो । सचिवालयले रुजुपछि उपलब्ध गराएको विवरणमा उनी ४५ वटा बैठकमा उपस्थित भएको खुलेको छ । दोस्रो र तेस्रो बैठकको ४ दिन गरेर उनी ६२ मा ४९ वटा बैठकमा सहभागी भएका छन् ।

पछिल्लो एक वर्षको बैठकमा सबैभन्दा थोरै कांग्रेसका सांसद मुनिन्द्रजंग गुरुङ उपस्थित छन् । उनी ६२ मध्ये ३९ बैठकमा उपस्थित भएको प्रदेशसभा सचिवालयले जनाएको छ । नेकपा एकीकृत समाजवादीका सांसद राजीव गुरुङ ४१, एमालेका गणेशमान गुरुङ र लिलबहादुर थापा मगर ४४-४४, मित्रलाल बस्याल ४८ बैठकमा हाजिर भएका छन् ।

सभामुख कृष्णप्रसाद धिताल, एमाले प्रमुख सचेतक गोविन्दबहादुर नेपाली र सांसद सुधिरकुमार पौडेल, कांग्रेसकी सरस्वती गुरुङको बैठक हाजिरी शतप्रतिशत छ । एमालेका भक्तबहादुर कुँवर, भीमबहादुर कार्की, प्रकाशबहादुर केसी, पद्मा जीसी श्रेष्ठ, श्यामराजा महत, कांग्रेसका विन्दुकुमार थापा, प्रकाश बराल, पार्वती तामाङ ६१ वटा बैठकमा हाजिर भएका छन् ।

पहिलो अधिवेशनमा १७ वटा बैठक बसेको थियो । तर, यो अधिवेशन १४ दिन मात्र चलेको थियो । चौथो अधिवेशनमा २७ दिनमा ४१ बैठक बसेको थियो । एक-एक दिन चलेको दोस्रो र तेस्रो अधिवेशनमा २-२ वटा बैठक बसेको थियो । संसदमा एकै दिन तीनवटासम्म बैठक बसेको छ । बैठक तीनवटा बसे पनि सांसदले बैठक भत्ता एउटा बैठकको मात्र लिन पाउँछन् ।

यसअघि दिइएको विवरण बैठकभत्ता प्रयोजनको रहेको र रुजु गर्दा हाजिर अर्कै रहेको भेटिएको सचिवालयका सूचना अधिकारी प्रेम सुवेदीले बताए । ‘हामीले रुजु गर्दा केही माननीयको बिग्रिएकै देखियो । सबैको बिग्रेको छैन,’ उनले भने । बैठकमा गएपनि सांसदले हाजिर नगर्ने समस्या पनि देखिएको छ जसले संसदको अभिलेखमा सांसदले भनेअनुसारकै हाजिरी संख्या मेल खाँदैन ।

सांसदहरूको तलबभत्तामा पछिल्लो ११ महिनामा ८ करोड ७ लाख ४५ हजार ५१ रुपैयाँ खर्च भएको छ । गण्डकी प्रदेशसभाको सभामुख, उपसभामुखसहित ६० जना प्रदेशसभा सदस्यहरूको तलब भत्तामा गत पुसदेखि यो वर्ष मंसिरसम्म यो रकम खर्च भएको हो ।

दलका नेता, समितिका सभापति तथा प्रदेशसभा सदस्य तथा स्वकीयको सेवा सुविधामा ७ करोड ५७ लाख २२ हजार ५ सय ८४ रुपैयाँ खर्च भएको छ । सभामुख, उपसभामुखको तलबभत्ता तथा सेवा सुविधामा पछिल्लो ११ महिनामा ५० लाख २२ हजार ४६७ रुपैयाँ खर्च भएको सुवेदीले जानकारी दिए ।

पछिल्लो एक वर्षमा विनियोजन ऐन २०७९ लाई संशोधन गर्न बनेको विधेयक, केही गण्डकी प्रदेश ऐन संसोधन गर्न बनेको विधेयक, गण्डकी प्रदेशको निजामति सेवाको गठन, सञ्चालन र सेवाका सर्तसम्बन्धमा व्यवस्था गर्न बनेको विधेयक, स्थानीय सेवाको गठन, सञ्चालन र सेवाको सर्तसम्बन्धमा व्यवस्था गर्न बनेको विधेयक, गण्डकी प्रदेश भित्रको वनलाई नियमन र व्यवस्थापन गर्न बनेको विधेयक र विनियोजन विधेयक २०८० र आर्थिक विधेयक २०८० पारित भएको छ ।