निषेधित क्षेत्र उल्लंघन गर्ने मन्त्री प्रहरी नियन्त्रणमा, छुटाउन गृहमन्त्री आफैँ प्रहरी कार्यालयमा

निषेधित क्षेत्र उल्लंघन गर्ने मन्त्री प्रहरी नियन्त्रणमा, छुटाउन गृहमन्त्री आफैँ प्रहरी कार्यालयमा

A+ A A-

सोमबार काठमाडौंको माइतीघरमा अनौठो दृश्य देखियो– सरकारका बहालावाला मन्त्री प्रहरी नियन्त्रणमा परे । त्यसपछि नेपाल प्रहरी क्लब भृकुटीमण्डपमा यहाँभन्दा पनि अनौठो दृश्य देखियो– प्रहरीले नियन्त्रणमा लिएका मन्त्रीसहितका व्यक्तिलाई छुटाउन गृहमन्त्री आफैँ पुगे ।

सोमबार भएका एकअर्कासँग सम्बन्धित यी दुई घटनाले माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारमा कस्ता व्यक्ति मन्त्री छन् र उनीहरूले लोकरिझ्याइँका लागि के गरिरहेका छन् भन्ने प्रस्ट्याउँछ । अझ गठबन्धनको सप्तरंगी सरकारमा रहेका मन्त्रीहरू र सत्तासाझेदार पार्टीबाट प्रधानमन्त्री स्वयम् कति आजित छन् भन्ने उनले आज कांग्रेसको मञ्चमा पुगेर कांग्रेसमाथि नै पोखेको असन्तुष्टिले देखाउँछ ।

खासमा सोमबार जनवरी १ हो । नयाँ वर्षको पहिलो दिन । यो इस्वी संवत्‌को नयाँ वर्षको पहिलो दिन भएकाले नेपालमा यसलाई केही ‘पहाडिया राष्ट्रवादी’ ले ‘टोपी दिवस’का रूपमा मनाउँछन् । अब पहाडिया राष्ट्रवादलाई मधेशीवादले पनि काउन्टर दिनैपर्ने देखेर मधेशमा उदाउँदै गरेको नयाँ पार्टी जनमतले ‘धोती दिवस’ मनाउनुपर्ने आवश्यकता देख्यो । त्यसैले सीके राउत नेतृत्वको जनमत पार्टीले आज माइतीघरमा धोती दिवसको कार्यक्रम आयोजना गर्‍यो ।

जनमतले धोती दिवस मात्र मनाएर सरकारसँग निहुँ खोज्न निषेधित क्षेत्र माइतीघरलाई नै रोज्यो । जबकि जनमत पनि प्रचण्ड नेतृत्वको सरकारको एक साझेदार हो । र, यस पार्टीबाट अनिता देवी सामान्य प्रशासनमन्त्री छिन् । उनी आज धोती दिवस मनाउन निषेधित क्षेत्र माइतीघर पुगिन् । निषेधित क्षेत्रमा कार्यक्रम गरेर जनमतले निषेधित क्षेत्र उल्लंघन गरेकाले प्रहरीले बहालवालामन्त्री अनिता देवीसहित जनमतका नेता कार्यकर्तालाई नियन्त्रणमा लियो ।

नेपाल प्रहरीका प्रवक्ता डीआईजी कुवेर कडायतले बहालवाला मन्त्रीलाई पक्राउ गरेको नभई नियन्त्रणमा लिएको बताए । उनले शिलापत्रसँग भने, ‘निषेधित क्षेत्र उल्लंघन गरेकाले उहाँहरूलाई प्रहरीले नियन्त्रणमा लिएको हो । साँझ छोडिसकेको छ ।’ उनले पक्राउ र नियन्त्रण फरक कुरा भएकाले त्यसैअनुसार बुझ्न आग्रह गरे ।

यहाँसम्म त विषय स्वाभाविकैजस्तो थियो । तर, सोमबार साँझ उपप्रधानमन्त्री तथा गृहमन्त्री नारायणकाजी श्रेष्ठ प्रहरी क्लब भृकुटीमण्डमा राखिएका बहालवाला मन्त्रीसहितलाई छुटाउन आफैँ त्यहाँ पुगे । उनले आफूहरूबाट कमजोरी भएको भन्दै प्रहरीले नियन्त्रणमा लिएका सामान्य प्रशासनमन्त्री अनिता देवी, जनमत अध्यक्ष सीके राउतलगायतलाई छुटाए । आफैँ रोहवर बसेर गृहमन्त्री श्रेष्ठले उनीहरूलाई छुटाए ।

सामान्य प्रशासनमन्त्री र गृहमन्त्रीको सोमबारको गतिविधिले प्रहरीलाई काम गर्न अप्ठ्यारो पार्ने बताउँछन् पूर्वडीआईजी हेमन्त मल्ल । उनले कानुनी राज्यमा मन्त्री आफैँ कानुन मिच्ने गरी निषेधित क्षेत्रमा जानु अशोभनीय भएको बताउँछन् । निषेधित क्षेत्र तोड्नुले मन्त्री स्वयम्‌ले सरकारी नियम वा कानुन नमानेको बुझाउने उल्लेख गर्दै उनी भन्छन्, ‘मन्त्री आफैँ निषेधाज्ञा तोड्न जाने, गृहमन्त्री आफैँ मन्त्री छुटाउन जाने । यस्तो तरिकाले प्रहरीलाई काम गर्न धेरै अप्ठेरो हुन्छ ।’ मन्त्रीहरूकै यस्ता व्यवहारले कानुन पालना गर्न प्रहरीलाई ठूलो कन्फ्युजनमा पार्ने गरेको पूर्वडीआईजी मल्ल बताउँछन् ।

प्रकाशित मिति: सोमबार, पुस १६, २०८० १९:२२