अर्थतन्त्र सकारात्मक बाटोमा गइरहेको छ, युवाहरूले उपयोग गर्नुपर्छः अर्थमन्त्री महत

अर्थतन्त्र सकारात्मक बाटोमा गइरहेको छ, युवाहरूले उपयोग गर्नुपर्छः अर्थमन्त्री महत

A+ A A-

अर्थमन्त्री डा. प्रकाशशरण महतले मुलुकको अर्थतन्त्र सकारात्मक बाटोमा गइरहेको बताएका छन् ।

मंगलबार चितवनमा आयोजित ‘१७औँ चितवन हात्ती तथा पर्यटन महोत्सव–२०८०’ को उद्घाटनमा महतले विभिन्न तथ्यांकहरूले पनि अर्थतन्त्र सकारात्मक बाटोमा गइरहेको देखाएको उल्लेख गर्दै त्यसलाई उपयोग गर्नुपर्छ भन्ने भाष्यलाई अगाडि बढाउन जरुरी रहेको बताए ।

‘आर्थिक डेटाहरूले, तथ्यांकहरूले अब अर्थतन्त्र सकारात्मक बाटोमा गइरहेको छ । यो अवसरलाई ग्रयाप गर्नुपर्छ भन्ने भाष्यलाई अगाडि बढाउन जरुरी छ,' महतले भने, 'त्यो भयो भने नेपालको अर्थतन्त्रले एउटा जम्प स्टार्ट गर्छ । यहाँको हाइड्रोपावर, एग्री विजनेस, कृषि व्यवसाय, पर्यटन र आईटी सेक्टरले मुलुकको अर्थतन्त्रलाई माथि पुर्‍याउने निश्चित छ ।'

देशभित्रै केही गर्न युवाहरूलाई उनले आग्रह गरे । नेपालमा केही छैन भनेर विदेशिनुको सट्टा देशमै केही गर्न सकिन्छ भन्ने सोच युवाहरूले राख्नुपर्ने उनको भनाइ छ ।

'नेपालमा केही पनि छैन भन्ने किसिमले सोच्यो भने केही पनि देखिँदैन । देशभित्रै खुसियाली सृजना गर्न सकिन्छ । यो देशमा धेरै गर्न बाँकी भएको हुनाले अवसर पनि यही देशमा छ । त्यो अवसरलाई युवा पिँढीले ग्रयाप गर्न, उद्यमीहरूले त्यो अवसरकालाई उपयोग गर्न पनि म अनुरोध गर्न चाहन्छु,' उनले भने ।

देशमा धेरै गर्न बाँकी रहेकाले अवसर पनि यहीँ रहेको महतको भनाइ छ । सो अवसरलाई उपयोग गर्न युवा उद्यमीहरूलाई उनले आग्रह गरे । चितवनको पर्यटन क्षेत्रमा आकर्षण थप्नका लागि पूर्व–पश्चिम राजमार्ग ६ लेन र जंगल क्षेत्र ४ लेनको विस्तार गर्ने कार्यलाई सरकारले तत्काल अघि बढाउने उनले बताए ।

प्रकाशित मिति: मंगलबार, पुस १०, २०८० १५:०५