नेपाल सुपर लिग प्लेअफ चरणमा प्रवेश, यस्तो छ फाइनल पुग्ने समीकरण

A+ A A-

अखिल नेपाल फुटबल संघको प्राविधिक सहयोगमा नेपाल स्पोर्ट्स एण्ड इभेन्ट्स म्यानेजमेन्टले आयोजना गरेको नेपाल सुपर लिग (एनएसएल) को समूह चरणका सबै खेलहरू सकिएका छन् ।

समूह चरणका सम्पूर्ण खेलहरू सकिएसँगै लिगका शीर्ष चार टोलीको टुंगो लागेको छ । देशका विभिन्न शहरहरूलाई प्रतिनिधित्व गर्ने नौ फ्रेन्चाइजी टोलीबीचको प्रतिस्पर्धाबाट पोखरा थन्डर्स, धनगढी एफसी, काठमाडौं रेजर्स र ललितपुर सिटी एफसी प्लेअफमा पुगेका छन् ।

सोमबार (भोलि) प्लेअफअन्तर्गतको पहिलो क्वालिफायरमा पोखरा थन्डर्स र धनगढी एफसी एक अर्काविरुद्ध मैदानमा उत्रनेछन् । ८ खेलमा ४ जित, ३ बराबरी र १ हारसहित पोखरा थन्डर्स अंक तालिकाको शीर्ष स्थानमा रहन सफल भएको थियोे । यता, ३ खेलमा जित, ४ खेलमा बराबरी र १ खेलमा पराजय व्यहोरेको धनगढी एफसी अंक तालिकाको दोस्रो स्थान सुरक्षित गर्न सफल भएको थियो । पोखरा र धनगढीबीच हुने खेलको विजेता यस संस्करणको एनएसएलको फाइनलका लागि छनोट हुनेछ भने यस खेलमा पराजित हुने टोलीले पुस १२ गते हुने क्वालिफायर २ खेल्नेछ ।

यसैगरी, मंगलबार अंक तालिकाको तेस्रो स्थानमा रहेको काठमाडौं रेजर्स र चौथो स्थानमा रहेको ललितपुर सिटी एफसीबीच एलिमिनेटरको खेल हुनेछ । जारी सिजनमा काठमाडौंले ३ खेलमा जित, ४ मा बराबरी र एक खेलमा हार व्यहोरेको छ भने ललितपुरले २ खेलमा जित र २ खेलमा हार व्यहोर्दा, ४ खेलमा बराबरी खेलेको छ ।

प्लेअफअन्तर्गत एलिमिनेटर भनिएको यस खेललाई भर्चुअल क्वाटरफाइनल पनि भन्न सकिन्छ । यस खेलमा पराजित हुने टोली प्रतिस्पर्धाबाट बाहिरिनेछ भने खेलको विजेताले क्वालिफायर २ खेल्नेछ । काठमाडौं र ललितपुरको खेलको विजेताले क्वालिफायर २ मा पोखरा र धनगढीमध्ये एक टोलीसँग प्रतिस्पर्धा गर्नेछ । यसै हप्ताको शनिबार हुने फाइनलमा क्वालिफायर १ र क्वालिफायर २ को विजेताले प्रतिस्पर्धा गर्नेछन् ।