पूर्वस्वीकृतिबिना एनसेलको ८० प्रतिशत शेयर बिक्री गर्न खोजेपछि प्राधिकरणले आजियाटालाई पठायो पत्र

पूर्वस्वीकृतिबिना एनसेलको ८० प्रतिशत शेयर बिक्री गर्न खोजेपछि प्राधिकरणले आजियाटालाई पठायो पत्र

A+ A A-

एनसेलमा ८० प्रतिशत लगानी रहेको मलेसियन कम्पनी आजियाटाले शेयर बिक्री गर्न लागेको विषयमा नेपाल दूरसञ्चार प्राधिकरणले ध्यानाकर्षण पत्र पठाएको छ । प्राधिकरणको पूर्वस्वीकृति र जानकारीबिना नै शेयर बिक्री गर्न लागेपछि प्राधिकरणले पत्र पठाएको हो । शिलापत्रसँग कुराकानी गर्दै प्राधिकरणका अध्यक्ष पुरुषोत्तम खनालले शेयर खरिदबिक्रीका विषयमा आजियाटा कम्पनीलाई पत्र पठाएको पुष्टि गरे ।

खनालका अनुसार प्राधिकरणको पूर्वस्वीकृतिमा मात्रै शेयर खरिद-बिक्री गर्न सकिने व्यवस्था भएको र अहिलेसम्म आजियाटाले शेयर बिक्रीबारे पूर्वस्वीकृतिका लागि जानकारी गराएको छैन । प्राधिकरणले १५ मंसिरमा आजियाटाको लैनचौरस्थित कार्यालयलाई सम्बोधन गरी ध्यानाकर्षण पत्र पठाएका हो ।

दूरसञ्चार नियमावली, २०५४ को नियम १५ (८) अनुसार चुक्ता पुँजीको पाँच प्रतिशतभन्दा बढी शेयर खरिद वा बिक्री गर्नुअघि प्राधिकरणको स्वीकृति लिनुपर्ने व्यवस्था छ । यो कानुनी व्यवस्थालाई बेवास्ता गरी आजियाटाले शेयर खरिद बिक्री गर्न लागेको प्राधिकरणको बुझाइ देखिन्छ ।

गत बुधबार आजियाटाको बोर्ड बैठकले एनसेलको ८० प्रतिशत शेयर बिक्री गरेर नेपालबाट बाहिरिने निर्णय सार्वजनिक गरेको थियो । आजियाटा ७ वर्षअघि टेलिया सोनेरासँग शेयर खरिद गरी एनसेलमा भित्रिएको थियो । उक्त शेयर खरिदका क्रममा भएको कर विवाद अहिलेसम्म टुंगो लागेको छैन ।

आजियाटाको शेयर नेपाली कम्पनीले खरिद गर्ने तयारी भइरहेको छ । नेपाली कम्पनीले खरिद गरेमा एनसेलको लाइसेन्सको स्वामित्व सरकारमा हस्तान्तरण हुँदैन । दुरसञ्चार ऐन अनुसार लाइसेन्स लिई सञ्चालन भएको २५ वर्षपछि टेलिकम सरकारी स्वामित्वमा हस्तान्तरण हुनुपर्छ । अहिले त्यही व्यवस्था छल्न पनि आजियाटाले शेयर बिक्री गर्न लागेको बताइन्छ ।