दुर्गा प्रसाईंले पूर्वमन्त्री महेश बस्नेतलाई दिएको 'ड्युटी'

A+ A A-

कुनै बेला केपी ओलीकै निगाहमा एमाले केन्द्रीय सदस्य भएका पात्र हुन् दुर्गा प्रसाईं । राजावादी फेटा गुथेर गणतन्त्रविरुद्ध फलाक्न थालेपछि एमालेबाट निकालिएका उनी अहिले ओलीकै ‘जानी दुस्मन’ बनेका छन् ।

दुईतिहाइ सरकारको नेतृत्व गरिसकेको एमाले यतिबेला आफैँले निकालेर मिल्काएकाे पूर्वकार्यकर्तासित सिँगौरी खेल्न दलबलका साथ सडकमा ओर्लेको छ । 'प्रतिशोध प्रदर्शन'को ठीक दुई दिनअघि मंगलबार राति खाना खाएर सुतिसकेका महिलाहरूलाई युवा संघका कार्यकर्ताले उठाएर खेदाएको भिडियो सामाजिक सञ्जालमा फैलिरहेको छ ।

एमालेका केही नेताको दैनिकी अचेल सामाजिक सञ्जालमा प्रसाईंविरुद्ध आएका सामग्री खोजीखोजी शेयर गर्ने र मञ्च भेट्नासाथै प्रसाईंलाई सरापेर बितिरहेको छ । ओलीका विश्वासपात्र मानिने पूर्वमन्त्री महेश बस्नेतले एक महिनायता फेसबुकमा शेयर गरेका केन्टन्ट, स्टाटस, रिल्स अनि सार्वजनिक मञ्चका भाषण र युट्युब अन्तर्वार्ता हेर्ने हो भने दुर्गां प्रसाईंको विरोधभन्दा अरु भेट्न मुस्किल पर्छ ।

युट्युबमा ‘घृणास्पद अभिव्यक्ति’ दिएर चर्चामा आएका प्रसाईं पनि वित्तीय संस्थाका ऋणी र केही राजावादीको बलमा ‘हजुरबुबा’ लाई शक्ति देखाउन उत्ताउलिएका छन् । कुनै बेला एमालेकै छाता ओढेर हिँडेका प्रसाईंले त्यस्तो के गरे, जसविरुद्ध केपी ओली पार्टीलाई नै जोखिममा पारेर छाताको डण्डा उज्याउँदै छन् ? आज यसबारे चर्चा गरौँ ।

०००

प्रसाईंको चित्त दुखाइ एमालेबाट निकालिनुभन्दा बढी करोडौँ खर्चेर बनाएको मेडिकल कलेजले सम्बन्धन नपाउनुमा छ । अहिले उनी सम्बन्धन पाउने सम्भावनाबाट धेरै पर पुगिसके । अब सम्बन्धन पाइएला भनेर आस पनि मारिसकेको उनले बताउने गरेका छन् । हुन पनि यसका लागि उनले तत्कालीन नेकपाका अध्यक्षद्वय केपी ओली र प्रचण्डको कम्ता चाकडी गरेका थिएनन् । चरेसको थालमा उनले ओली र प्रचण्डलाई ‘मार्सी भातको पार्टी’ दिएको तस्वीर एकताका निकै ‘भाइरल’ बनेको थियो । त्यो बेला उनी ओली र प्रचण्डबीच फाटेको मन सिलाउने गर्थे । जतिबेला ओली दुईतिहाइ समर्थनको प्रधानमन्त्री थिए भने प्रचण्ड देशकै सबैभन्दा ठूलो पार्टीको अध्यक्ष थिए । कतिपयले त के पनि भन्छन् भने 'व्यवसायी दुर्गा प्रसाईं'लाई 'अराजक दुर्गा प्रसाईं' बनाउने ओली-प्रचण्ड वा यही राज्य प्रणाली हो ।

एमालेबाट निकालिएपछि उनले ओलीविरुद्ध बोल्न थालेका थिए । यस क्रममा गत असोज अन्तिम साता प्रसाईंले आरोप लगाए, ‘एमाले अध्यक्ष केपी ओलीले कम्बोडियामा २७ सयदेखि ३ हजार करोड रुपैयाँ ब्ल्याक मनी राखेका छन् ।’ फ्रान्सेली पत्रकार रोलाण्ड ज्याकर्डले जुलाई २०२० मा ग्लोबल वाच एनालिसिसमा यसबारे रिपोर्ट प्रकाशित गरेका थिए ।

तीन वर्षपछि प्रसाईंले सार्वजनिक मञ्चदेखि युट्युब अन्तर्वार्तासम्म यो कुराको प्रचार गरे । लगत्तै ओलीले पनि चुनौती दिए, ‘कम्बोडियामा मेरो ३ हजार करोड देखाइदिनेलाई उल्टै १ हजार थपेर दिन्छु ।’

आफ्नो राजनीतिक छवि नै धूमिल पार्नेगरी आरोप प्रचार गरेपछि ओलीले प्रसाईंलाई पक्राउन नखोजेका पनि होइनन् । तर, प्रसाईं समातिएनन् । त्यसैले ओलीनिकट नेताहरू प्रसाईंलाई माओवादी केन्द्र र प्रधानमन्त्रीले मौन समर्थन गरेको ठान्छन् । सरकारले समात्ने छाँटकाँट नदेखाएपछि ओलीले युवा संघका पूर्वअध्यक्ष, पार्टी पोलिट्ब्युरो सदस्य महेश बस्नेतलाई प्रसाईंको प्रतिरोधमा उतारे । त्यसपछि उनीहरूबीच सामाजिक सञ्जालमा वाकयुद्ध सुरु भयो । उनीहरूले एकअर्काविरुद्ध तुच्छ शब्द प्रयोग गरेका भाषण र अन्तर्वार्ता सामाजिक सञ्जालमा छ्यापछ्याप्ती छन् ।

यत्तिकैमा २२ असाेज दिउँसो जमलस्थित होटल एल्लो प्यागोडामा युट्युबरलाई आफ्ना कुरा सुनाएर बाहिर निस्कने क्रममा प्रसाईंलाई युवा संघका कार्यकर्ताले कालो मोसो दलिदिए । १३ फागुनमा चितवनमा भएको कार्यक्रममा बैंक तथा वित्तीय संस्थाका कर्मचारीलाई कालोमोसो दल्न दस्ता बनाएका प्रसाईं आफैँ कालो मोसोले पोतिए । उनलाई त्यहाँबाट प्रहरीले जोगाएर निकालेको थियो ।

यसको बदला दुर्गा प्रसाईंका समर्थकले झापामा लिए । २५ असोजमा झापा अर्जुनधारामा युवा संघको नगर अधिवेशन थियो । त्यहाँ दुर्गा प्रसाईंका समर्थकले युवा संघका नेताहरूको गाडीमा तोडफोड गरे ।

त्यसपछि युवा संघले प्रसाईंलाई कार्यक्रम गर्न निषेध गर्ने घोषणा गर्‍यो । कात्तिक पहिलो साता प्रसाईं इलामको दानाबारीमा ‘दुर्गा माता’को मूर्ति प्रतिस्थापन गर्न जाने कार्यक्रम थियो । तर, दानाबारी जाने मुख्य सडकको सुखानीमा युवा संघका कार्यकर्ता ढुकेर बसे । सुरक्षा चुनौती देखेपछि उनी दानाबारी जान पाएनन् ।

यो पनि..

दुर्गा प्रसाईंको पछाडि को छ ?

तर, उनले युट्युब अन्तर्वार्तामा ओली र बस्नेतलाई गालीगलौज गर्दै घृणास्पद अभिव्यक्ति दिन छाडेनन् । महेश बस्नेतको ‘काण्ड’ भाग ८ सम्म ल्याइदिने धम्की दिए । यहीबीचमा मनोजकुमार महतो उर्फ मनोज मानव नाम गरेका युट्युबरले महेश बस्नेतको काण्ड भन्दै एक भिडियो सामाजिक सञ्जालमा ‘भाइरल’ गरिदिए । यो सबै प्रसाईंकै डिजाइनमा भएको अनुमान लगाउन बस्नेतलाई गाह्रो परेन । ‘अर्ली काँडैले’ भाइरल बनेपछि बस्नेतले पनि दुबई बस्ने रिजवान आलमसित प्रसाईंले गरेको गोप्य अडियो सामाजिक सञ्जालमा शेयर गरे, उक्त अडियोमा प्रसाईंले रिजवानले आफ्ना लागि विमानस्थलमा केटी ल्याइदिएको र केटीले बार्गेनिङ गरेर दुःख दिएको बताएका छन् ।

हरेक दिन प्रसाईं र बस्नेत एकअर्काविरुद्ध लाञ्छनापूर्ण भाषण र त्यस्तै सामाग्री सामाजिक सञ्जालमा पोस्ट गर्दै थिए ।

प्रसाईंले ओली र बस्नेतमाथि झन् धेरै आगो ओकल्दै गए । आफ्ना अध्यक्षविरुद्ध लगाइएका आरोपको प्रतिवादमा उत्रेका बस्नेतको दुस्मनी अहिले प्रसाईंसँग व्यक्तिगत तहमा पुगिसकेको छ ।

काठमाडौंमा आन्दोलन गर्ने तयारी प्रसाईंले पहिल्यैदेखि गरिरहेका थिए । यसका लागि उनले देश दौडाहा पनि गरे । ७ मंसिरमा उनले काठमाडौंको माइतीघरमा २ लाख मान्छे उतार्ने घोषणा गरे । कार्यक्रमको नाम ‘राष्ट्र, राष्ट्रियता, धर्म-संस्कृति तथा नागरिक बचाऊ महाअभियान’ राखियो ।

बस्नेतले उक्त कार्यक्रममा अवरोध गर्ने उद्देश्यले अनेरास्ववियु र युवा संघको शक्ति प्रदर्शन राख्ने घोषणा गरे । पछि ओलीले समेत यो कार्यक्रममा ऐक्यबद्धता जनाएपछि सिंगो एमाले प्रसाईंविरुद्ध उभिएको देखियो ।

जिल्ला प्रशासन कार्यालय काठमाडौंले माइतीघरमा प्रदर्शन गर्न रोक लगाएपछि एमालेका जनवर्गीय संगठनले काठमाडौंकै तीनकुने रोजेका छन् भने प्रसाईं समूहले काठमाडौं बल्खु रोजेको छ । भोलि ७ मंसिरमा हुने प्रदर्शनका लागि एमालेले ललितपुर, भक्तपुर र काठमाडौंबाट २० हजार कार्यकर्ता उतार्ने बताएको छ । प्रसाईंले भने देशभरबाट २ लाख मान्छे जम्मा पार्ने घोषणा गरेका छन् । आन्दोलनका लागि केही दिनअघि देखि नै काठमाडौंका विभिन्न होटलमा प्रसाईंका समर्थक आएर बस्न थालेका छन् । सुरक्षा स्रोतका अनुसार, काठमाडौंको बागबजार, सुन्धारा, धुम्बाराहीलगायत क्षेत्रका थुप्रै होटल प्रसाईं समूहले बुक गरेको छ ।

एक कार्यक्रममा महेश बस्नेत भन्दै थिए, ‘२५ हजार कार्यकर्ता उतार्छौं । अघिल्लो पङ्क्तिमा ५ हजार, पछिल्लो पङ्क्तिमा ५ हजार स्वयंसेवक राख्छौँ । हाम्रा साथीहरूलाई पहिचानका लागि रातो क्याप दिइने छ ।’

प्रसाईं पनि युट्युबमार्फत फुकिरहेका छन्, ‘४० करोड खर्चेर दुई लाख मान्छे उतार्छौं । गणतन्त्र फालेर छाड्छौँ ।’

प्रकाशित मिति: बुधबार, मंसिर ६, २०८० १६:०४