दुर्गा प्रसाईंको पछाडि को छ ?

A+ A A-

गणतन्त्र नै फाल्ने फुर्ती लगाउँदै झापाली व्यवसायी दुर्गा प्रसाईंले ‘४० करोड खर्चेर’ काठमाडौंमा ‘लाखौँ मान्छे उतार्ने’ दाबी गरिरहेका छन् । ७ मंसिरमा हुने भनिएको कार्यक्रमका लागि काठमाडौंका सुन्धारा, बागबजार, धुम्बाराहीलगायत क्षेत्रका अधिकांश होटल बुक गरिएका छन् ।

‘राष्ट्र, राष्ट्रियता, धर्म-संस्कृति तथा नागरिक बचाऊ महाअभियान’ नाम दिइएको कार्यक्रमका लागि प्रसाईंले देशभरबाट काठमाडौंमा लाखौँ मान्छे जम्मा पार्ने दाबी गरेका छन् ।

सोही दिन एमालेको युवा संघले समेत शक्ति प्रदर्शन गर्न लागेकाले जिल्ला प्रशासन कार्यालय काठमाडौंले कार्यक्रमका लागि दुवै पक्षलाई ठाउँ तोकिदिएको छ । दुवैले रोजेको माइतीघर ‘कुरुक्षेत्र’ हुन सक्ने भएकाले प्रशासनले उक्त क्षेत्रमा ३० मंसिरसम्म ५ जनाभन्दा बढी भेला हुन रोक लगाएको छ ।

१ फागुन २०७९ देखि प्रसाईंले ‘नागरिक बचाऊ अभियान’ थालेका थिए । पछिल्लो समय उनीसँग सिङ जुधाउन सिङ्गो एमाले अघि सरेपछि प्रसाईं र उनको अभियानतिर धेरैको नजर परेको छ । झापासहित कतिपय जिल्लामा जनस्तरमा पनि प्रसाईंले राम्रो समर्थन बटुलेको देखिन्छ । जम्माजम्मी ८ महिनामा प्रसाईंले यत्रो शक्ति कसरी आर्जन, सञ्चय गरे ? उनको पछाडि को छ ? धेरैमा यस्तो जिज्ञासा छ ।

०००

नेपालमा बैंक तथा वित्तीय संस्थाबाट ऋण लिएर तिर्न नसकेका वा तिर्न नचाहने ठूलै जमात प्रसाईंको पक्षमा छ । कुनै बेला गणतन्त्रको विकल्प छैन भन्ने उनी फनक्कै मोडिएर भ्रष्टाचार र गणतान्त्रिक व्यवस्थाविरुद्ध, हिन्दु धर्मको पक्षमा बोलिरहेका छन् । यसरी हिन्दुवादी र वर्तमान नेतृत्वको कार्यशैलीबाट आजित जनता पनि उनका चर्का कुरातिर तानिएका छन् । प्रसाईंको दाबीअनुसार, उनले नेतृत्व गरेको अभियानमा ४ लाख नेपालीले सदस्यता लिएका छन् ।

बैंक, सहकारी र लघुवित्तपीडितलाई लक्षित गरी सुरु गरेको ‘नागरिक बचाऊ’ अभियानलाई प्रसाईंले संघीय लोकतान्त्रिक गणतन्त्र व्यवस्थाविरोधी ‘राष्ट्र, राष्ट्रियता, धर्म–संस्कृति तथा नागरिक बचाऊ महाअभियान’ मा परिणत गरिसकेका छन् । अर्थात् सुरुमा बैंक तथा वित्तीय संस्थाप्रति उत्तेजित र आक्रोशित देखिएका उनको द्वेष अहिले शासकीय व्यवस्थाप्रति देखिएको छ ।

अभियानमा धर्मसमेत जोडेकाले हिन्दुवादी संघसंगठनले उनलाई अघोषित रूपमा सहयोग गरेको कुरा सामाजिक सञ्जालका पोस्टहरू हेर्दा अनुमान लगाउन गाह्रो पर्दैन । निधारभरि चन्दनको रेखा कोरेका कतिपय गेरुवस्त्रधारी ‘बाबा’हरूले ७ मंसिरमा दुर्गा प्रसाईंको अभियानमा जान आफ्ना ‘भक्त’हरूलाई आह्वान गरिरहेका छन् ।

राजावादीहरू भने आफैँ छिन्नभिन्नजस्तै रहेकाले प्रसाईंको अभियानबारे विभाजित छन् । राप्रपा अध्यक्ष राजेन्द्र लिङ्देनले समेत प्रसाईंलाई साथ दिएका छैनन् । निकटस्थ स्रोतका अनुसार, पूर्वराजा ज्ञानेन्द्र शाहले पनि प्रसाईंलाई पूर्ण विश्वास गरेका छैनन् ।

प्रसाईंका केही सहयोगी त के पनि भन्छन् भने भारतका प्रधानमन्त्री मोदीदेखि उत्तर प्रदेशका मुख्यमन्त्री योगी आदित्यनाथसँग समेत उनले भेट गरेका छन् । यदि भेटेका हुन्थे भने यसबारे फुटानी लगाउन उनले यति विलम्ब गर्ने थिएनन् ।

एमालेका कतिपय नेताले भने प्रसाईंलाई माओवादी केन्द्रले मौन समर्थन गरेको आशंका गरेका छन् । किनकि, प्रसाईंलाई ‘ठेगान’ लगाउन एमालेले दिएको दबाब प्रधानमन्त्रीले सुनेको नसुन्यै गरेको उनीहरूको भनाइ छ । केही दिनअघि प्रसाईंले एमाले नेता ‘महेश बस्नेतको काण्ड’ ल्याइदिने चेतावनी दिएका थिए । फेसबुकमा बस्नेत र प्रसाईं महिना दिनयता सिँगौरी खेलिरहेका छन् ।

भारततिरबाट साथ छ ?

प्रसाईंको भारत आउजाउ केही महिनायता बाक्लै देखिन्छ । कतिपयको आशंकामा उनलाई भारतबाट केही हिन्दुवादी गुटले साथ दिएका छन् । उनलाई नेपाली समुदायकै अगुवाहरूले पनि सघाएका छन् । उनका केही सहयोगी त 'अफ एयर’ मा के पनि भन्छन् भने भारतीय प्रधानमन्त्री नरेन्द्र मोदीदेखि उत्तर प्रदेशका मुख्यमन्त्री योगी आदित्यनाथसँग समेत प्रसाईंले भेट गरेका छन् । यद्यपि, प्रचारमुखी स्वभावका प्रसाईंले साँच्चै मोदी र आदित्यनाथलाई भेटेका हुन्थे भने यसबारे फुटानी लगाउन उनले यति विलम्ब गर्ने थिएनन् । भारत र नेपालबाट केही हिन्दुवादी गुट वा संस्थाले भने उनलाई साथ दिएको कुरा उनको अभियानको बदलिँदो नाम र नारा हेरेर अनुमान लगाउन सकिन्छ । पछिल्लो समय नेपालमा धर्मको एजेण्डाबाट बढी नै बाह्य चलखेल भइरहेको सुरक्षा स्रोतको निष्कर्ष छ ।

याे पनि..

दुर्गा प्रसाईंले पूर्वमन्त्री महेश बस्नेतलाई दिएको 'ड्युटी'

७ मंसिरको कार्यक्रममा भारतबाट ‘बाबा’हरू पनि आउने प्रसाईं स्वयम्‌ले भनेका छन् । भारतमा रहेका नेपाली समुदायबाट पनि उनले सहयोग पाएका छन् । ४ मंसिरमा ऋषि धमलालाई दिएको अन्तर्वार्तामा उनले आफूलाई भारत वा अन्य कुनै देश वा शक्तिको साथ रहेको कुरा इन्कार गरेका छन् ।

करोडौँ खर्च कसले गर्छ ?

प्रसाईं तिनै व्यवसायी हुन्, जोमाथि विभिन्न बैंकबाट ५ सय करोडभन्दा बढी ऋण लिएर नतिरेको आरोप छ । उनले उल्टै बैंक तथा वित्तीय संस्थाका प्रतिनिधिलाई कालो मोसो दल्ने धम्की दिने गरेका छन् । उनै प्रसाईंले ४० करोड खर्च गरेर काठमाडौंमा मान्छे उतार्छु भन्दा धेरै अचम्मित छन् । युट्युबलगायत सामाजिक सञ्जालमा प्रसाईंले ७ मंसिरमा हुने कार्यक्रममा ४० करोड खर्च हुने दाबी गर्दै आएका छन् । प्राइम टाइम्स टीभीमा हालै प्रसारित अन्तर्वार्तामा प्रसाईंलाई धमलाले सोधेका छन्, 'यत्रो पैसा कहाँबाट ल्याउँदै हुनुहुन्छ ?’

प्रसाईंले प्रस्ट जवाफ दिएका छैनन् । घरि उनले आफैँ खर्च गर्छु भनेका छन् भने घरि १ रुपैयाँदेखि ५ लाख रुपैयाँसम्म चन्दा उठाएको बताएका छन् । धेरैले स्वतःस्फूर्त सहयोग गरेको उनको दाबी छ । उनले यस्तो पनि भनेका छन्, ‘यत्रो पैसा कसरी, कहाँबाट आयो भनेर जनताले हेर्ने, खोज्ने होइन, त्यसबाट कस्तो स्वादको फल आयो, त्यो हेर्ने हो ।'

प्रकाशित मिति: मंगलबार, मंसिर ५, २०८० १८:३८