तिहारका चार दिन कस्ताे रहनेछ देशभरकाे माैसम ?

A+ A A-

यस वर्ष तिहारका बेला देशका केही स्थानमा वर्षा हुन सक्ने जल तथा माैसम विज्ञान विभाग, माैसम पूर्वानुमान महाशाखाले जनाएकाे छ ।

महाशाखाले जारी गरेकाे तिहार विशेष माैसम बुलेटिनमा उल्लेख भएअनुसार आजदेखि २९ गतेसम्म कोशी, बागमती, सुदूरपश्चिम, कर्णाली र गण्डकी प्रदेशका पहाडी भू-भागमा आंशिकदेखि सामान्य बदली रही केही स्थानमा मेघगर्जन र चट्याङसहित हल्का वर्षाको सम्भावना रहकाे उल्लेख छ ।

यसबाहेकका भू-भागमा मौसम सामान्यतया सफा रहने देखिएकाे जानकारी दिइएकाे छ । साथै देशका उच्च पहाडी तथा हिमाली क्षेत्रका थोरै स्थानहरूमा हल्का हिमपातको सम्भावना रहेको छ । साथै उक्त दिनहरूमा अधिकांश स्थानहरूमा अधिकतम तथा न्यूनतम तापक्रम सरदर भन्दा थोरै घट्ने देखिएकाे पनि बुलेटिनमा उल्लेख छ ।

महाशाखाले भूकम्प प्रभावित सुदूरपश्चिम र कर्णाली प्रदेशका पहाडी भू-भागमा आगामी केही दिनमा आंशिकदेखि सामान्य बदली रही एक-दुई स्थानमा मेघगर्जन र चट्याङसहित हल्का वर्षाको सम्भावना रहेकाे पनि जनाएकाे छ ।

साथै उक्त प्रदेशका उच्च पहाडी तथा हिमाली क्षेत्रका एक-दुई स्थानहरूमा हल्का हिमपातको सम्भावना देखिएकाे र उक्त दिनहरूमा अधिकतम तथा न्यूनतम तापक्रम सरदर भन्दा थोरै घट्ने देखिएकाे जनाइएकाे छ ।

आजकाे माैसम कस्ताे ?

अहिले बिहान देशका पहाडी भू-भागमा आंशिक बदली रही बाँकी भू-भागको मौसम सामान्यतया सफा रहेको छ । आज दिउँसो कोशी प्रदेशको पहाडी भू-भागमा आंशिक बदली रही बाँकी भू-भागको मौसम सामान्यतया सफा रहनेछ ।

कोशी प्रदेशको पहाडी भू-भागका एक-दुई स्थानमा मेघगर्जन र चट्याङसहित हल्का वर्षाको सम्भावना रहेको छ । देशको उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको छ ।