विन्ध्यवासिनी मन्दिरमा ‘नवदुर्गा महोत्सव’ हुँदै

A+ A A-

विन्ध्यवासिनी मन्दिरमा नवदुर्गा महोत्सव २०७६ आयोजना गरिने भएको छ । विन्ध्यवासिनी धार्मिक क्षेत्र विकास समितिको आयोजनामा आगामी १२ गते (घटस्थापना) देखि नवमीसम्म उक्त महोत्सव आयोजना गर्न लागिएको हो ।

समितिका सचिव तीर्थ श्रेष्ठले सो महोत्सवको शुभारम्भ शोभायात्रामार्फत गरिने बताए । उनले नवकन्या आरुढ नौ रथ, विन्ध्यवासिनी मन्दिरको झाँकी, नेपाली सेना, नेपाल प्रहरी, सशस्त्र प्रहरी, नेपाल स्काउट, राष्ट्रिय सेवा दल, बटुकहरू, जलकलशसहित मातृशक्ति, विभिन्न आमा समूहहरू, सामाजिक धार्मिक तथा जातीय सांस्कृतिक बैंक तथा वित्तीय संस्थाहरू, शैक्षिक संस्थाहरू, भजन समूहहरू र वाणिज्य तथा वस्तुगत संघहरूको उपस्थितिमा शोभायात्रा गर्दै महोत्सव सुरु हुने बताए । महोत्सव अवधिभर रात्रिकालीन आरतीसमेत गरिने श्रेष्ठले बताए ।

नवमीसम्म सञ्चालन हुने सो महोत्सवमा युवा पण्डित नारायण देवकोटाले संगीतमय झाँकीसहित श्रीमद्देवी भागवतको कथा प्रस्तुत गर्ने बताए । श्रेष्ठका अनुसार प्रत्येक दिन बिहान ९ देखि १२ बजेसम्म र मध्यान्नदेखि अपरान्ह ४ बजेसम्म महायज्ञ हुनेछ ।

उनले विजया दशमीको दिन बिहान ४ बजेदेखि नित्य पूजा आरम्भ भई ५ बजेबाट भक्तजनहरूका लागि खुला गरिने श्रेष्ठले बताए ।

विश्व शान्ति तथा मानव कल्याणको कामना गर्दै जातीय सद्भाव तथा धार्मिक पर्यटनको विकासमा टेवा पुग्याउने उद्देश्यले महोत्सवको आयोजना गरिएको समितिका अध्यक्ष गणेशबहादुर श्रेष्ठले बताए । महोत्सवमा श्रीमद् भागवतदेवी ज्ञान महायज्ञसमेत हुने भएको छ । महायज्ञ प्रत्येक दिन बिहान ९ बजेदेखि मध्याह १२ बजेसम्म र मध्यान्ह ११ बजेबाट अपरान्ह ४ बजेसम्म चल्नेछ ।

विजया दशमीको अवसरमा मन्दिरमा बिहान ४ बजेदेखि पूर्वान्हः ५ बजेसम्म नित्य पूजा आजा गर्ने व्यवस्था समितिले मिलाएको अध्यक्ष श्रेष्ठले जनाए । प्रत्येक साँझ ६ बजे भने आरती गरिने भएको छ ।

शोभायात्राको नेतृत्व गण्डकी प्रदेशका प्रमुख बाबुराम कुँवरले गर्ने भएका छन् भने शोभायात्राको समापन गण्डकी प्रदेशका भौतिक पूर्वाधार विकास मन्त्री रामशरण बस्नेतले गर्ने कार्यक्रम तय गरिएको अध्यक्ष श्रेष्ठले बताए ।

मन्दिरमा भक्तजनहरूले चढाएको भेटीबाटै समितिले विभिन्न सामाजिक कार्य गर्दै आएको उनले बताए । गत वर्ष समितिले करिब २ करोड ७५ लाख रुपैयाँ भेटी संकलन गर्न सफल भएको सचिव श्रेष्ठले बताए ।

समितिले अपांग तथा असहायहरूका लागि केही समयअघि मन्दिर परिसरमा लिफ्टसमेत सञ्चालनमा ल्याएको छ । लिफ्ट शारीरिक अशक्त, अपांगता भएका र ज्येष्ठ नागरिकहरूलाई निःशुल्क छ भने अन्य लिफ्ट प्रयोग गर्ने नेपाली नागरिकलाई समितिले प्रतिव्यक्ति ५० र विदेशीलाई १ सय रुपैयाँ लिने गरेको छ ।

प्रकाशित मिति: मंगलबार, असोज ७, २०७६ २२:५७