लिखित परीक्षा सकियो, रिजल्ट यसै साता

A+ A A-

‘शिलापत्र उज्ज्वल स्कलरसिप’ अन्तर्गत ५० प्रतिशतको लिखित परीक्षा सकिएको छ । डिजिटल पत्रिका शिलापत्रडटकमले गरिब तथा जेहनदार विद्यार्थीलाई छात्रवृत्तिमा पढाउन परीक्षा लिएको हो । परीक्षा सोमबार साउथ वेस्टर्न स्टेट कलेज, बसुन्धरामा भएको थियो ।

‘५० लाख रुपैयाँबराबरको स्कलरसिप स्नातक तहका ८ विद्यार्थीलाई दिनेछौं,’ भर्चुअल शैक्षिक मेलाका संयोजक सुरेश सिम्खडाले भने, ‘जसअन्तर्गत ५० प्रतिशतको लिखित परीक्षा सकिएको छ ।’

उनका अनुसार ५ हजार विद्यार्थीले परीक्षाका लागि नेपाल एडुफेयरडटकममा फाराम भरेका थिए । ३ हजार विद्यार्थीले लिखित परीक्षा दिएको उनले जानकारी दिए ।

अब ३० प्रतिशत कलेजको अन्तर्वार्ता र २० प्रतिशत एसईई र प्लस टुको ग्रेडका आधारमा विद्यार्थी छनोट गरिनेछ । जसले सबैभन्दा बढी अंक ल्याउँछ, तीमध्येका ८ विद्यार्थीले छात्रवृत्ति पाउनेछन् । संयोजक सिम्खडाका अनुसार स्कलरसिप परीक्षाको परीक्षाफल यही साता सार्वजनिक गरिनेछ ।

शंकरदेव कलेजको बीबीए, राजधानी मोडेल कलेजको बीएचएम, टेक्सास कलेजको बीआईटी, मेधावी कलेजको बीसीआईएस, ग्लोबल इन्टरनेसनल कलेजको बीटीटीएम, नेपाल मेगा कलेजको बीबीएम, ग्लोबल कलेज अफ म्यानेजमेन्टको बीबीएस, के एन्ड के कलेजको बीएसडब्लूूमा स्कलरसिपको व्यवस्था गरिएको छ ।

७० हजार भिजिटर

शिलापत्र डटकमले आयोजना गरेको भर्चुअल शैक्षिक परामर्श मेलामा ७० हजार विद्यार्थीले भिजिट गरेका छन् ।

मेलाबाट विद्यार्थीले प्लस टुपछि के पढ्ने ? कुन कलेजमा पढ्ने ? कलेजको भौतिक संरचना कस्तो छ ? ल्याब, लाइब्रेरी कस्तो छ ? कस्ता शिक्षकले पढाउँछन् ? विश्व बजारमा प्रतिस्पर्धा गर्ने शिक्षा छ कि छैनलगायतका विषयमा परामर्श लिएका छन् । विद्यार्थीले नेपालएडुफेयरडटकम भिजिट गरेर परामर्श लिएका हुन् ।

उत्कृष्ट परामर्श

विद्यार्थीहरूले नेपालएडुफेयरडटकमबाट राम्रो परामर्श पाएको बताएका छन् । ५० भन्दा बढी विषय र कलेजबारे राम्रो परामर्श पाएका विद्यार्थीहरूले बताएका छन् । शिलापत्रडटकमले विज्ञ टोली बनाएर ५० भन्दा बढी विषयको सामग्रीसमेत बनाएको थियो ।

‘मेलाबाट स्कलरसिपका साथै धेरै शैक्षिक ज्ञान पाइयो,’ परीक्षामा सहभागी ओमकार बस्नेतले भने, ‘अब कुन विषय पढ्ने भन्ने समस्या हुँदैन ।’ उनले नेपाल एडुफेयरबारे फेसबुकबाट जानकारी पाएका हुन् ।

सुमित्रा राई स्नातक तहमा के पढ्ने भनेर सोच्दै थिइन् । उनकी दिदीले उज्ज्वल स्कलरसिपबारे जानकारी दिइन् । अनि नेपाल एडुफेयरडटकममा फाराम भरेर लिखित परीक्षा दिएकी हुन् । ‘हामीजस्ता गरिब तथा जेहनदार विद्यार्थीका लागि यो राम्रो अवसर हो,’ उनले भनिन् ।

नीडर सोडारी अछामबाट पढ्नका लागि काठमाडौं आएका हुन् । उनी पनि के पढ्ने, कहाँ पढ्ने भन्ने चिन्तामा थिए । कलेज र विषयबारे भर्चुअल मेलाबाट राम्रो परामर्श पाएको उनले बताए ।

‘पढ्नका लागि खर्च जुटाउन समस्या छ । शिलापत्र उज्ज्वल स्कलरसिपबारे फेसबुकबाट थाहा पाएर परीक्षा दिएको हुँ,’ उनले भने ।
मिटिङ प्वाइन्टको व्यवस्थापन र नयाँ पत्रिकाको सहकार्यमा भर्चुअल शैक्षिक मेलाको आयोजना गरिएको हो ।

यो पनि

विद्यार्थीको अभिभावक : नेपाल एडुफेयर

गरिब विद्यार्थीका लागि ‘शिलापत्र उज्ज्वल स्कलरसिप’

५० लाख राशीको ’शिलापत्र उज्ज्वल स्कलरसिप’ घोषणा

प्रकाशित मिति: मंगलबार, असोज ७, २०७६ ०२:२९