विद्यार्थीको अभिभावक : नेपाल एडुफेयर

A+ A A-

विभिन्न ठाउँमा छरिएका कलेज । कलेज कहाँ छ भनेर पत्ता लगाउन विद्यार्थीलाई सकस । कलेज खोज्दै हिँड्नुपर्ने बाध्यता । कुन कलेज आफ्ना लागि उपयुक्त हो, विषय र कलेज छनोटबारे अलमलमा विद्यार्थी ।

अब कलेज खोज्दै हिँड्नुपर्ने दिन सकिएको छ । घरमै बसेर कलेज भिजिट र शैक्षिक परामर्श लिन सकिन्छ । कलेज र विद्यार्थीलाई सहजीकरण गर्न नेपाल एडुफेयरडटकमले भर्चुअल शैक्षिक मेलाको आयोजना गरेको छ ।

डिजिटल पत्रिका शिलापत्रले गत आइतबारदेखि आयोजना गरेको भर्चुअल शैक्षिक मेलामा विद्यार्थीले उत्साहजनक सहभागिता जनाएका छन् । एक हप्तामा ५० हजारभन्दा बढी विद्यार्थीले भिजिट गरिसकेका छन् ।

‘मेलामा विद्यार्थीले उत्साहजनक सहभागिता जनाएका छन्,’ मेलाका संयोजक सुरेश सिम्खडाले भने, ‘शिलापत्र उज्ज्वल स्कलरसिप भएकाले पनि विद्यार्थीको आकर्षण बढेको हो । ’ उनका उनुसार उज्ज्वल स्कलरसिपका लागि २ हजार बढी विद्यार्थीले फम भरेका छन् । स्कलरसिपका लागि पहिलो चरणको परीक्षा सकिएको छ । ५० प्रतिशत लिखित परीक्षाअन्तर्गत पहिलो चरणको परीक्षा गत शुक्रबार भएको हो ।

अब दोस्रो चरणको ५० प्रतिशत परीक्षा आगामी मंगलबार साउथ वेस्टर्न स्टेट कलेज बसुन्धरामा हुने संयोजक सिम्खडाले जानकारी दिए । परीक्षा बिहान ८ बजेदेखि शुरू हुनेछ ।

यसलगत्तै ३० प्रतिशत कलेजको अन्तरवार्ता र २० प्रतिशत एसईई र प्लस टुको ग्रेडलाई पनि मापन गरिनेछ । जसले सबैभन्दा बढी अंक ल्याउँछ, तीमध्येका आठ जनाले छात्रवृत्ति पाउनेछन् ।

शंकरदेव कलेजको बीबीए, राजधानी मोडेल कलेजको बीएचएम, टेक्सास कलेजको बीआईटी, मेधावी कलेजको बीसीआईएस, ग्लोबल इन्टरनेसनल कलेजको बीटीटीएम, नेपाल मेगा कलेजको बीबीएम, ग्लोबल कलेज अफ म्यानेजमेन्टको बीबीएस, के एन्ड के कलेजको बीएसडब्लूूमा स्कलरसिपको व्यवस्था गरिएको छ ।

भर्चुअल परामर्श अभिभावक

‘पहिले अभिभाकसँग कलेज खोज्दै हिँड्नुपथ्र्यो, अहिले घरमै बसेर सबै कलेज भिजिट गर्न पाएका छौं,’ स्कलरसिप परीक्षामा सहभागी सुशान्त रिमाल भन्छन्, ‘टेक्नोलोजीले सजिलो बनाएको छ ।’

उनले इन्स्टाग्रामबाट भर्चुअल शैक्षिक परामर्शबारे थाहा पाएका हुन् । ‘इन्स्ट्राग्रामको वालबाट भर्चुअल पारमर्शबारे थाहा पाएको हुँ,’ उनले भने, ‘अहिले स्कलरसिपको परीक्षा दिएको छु, परीक्षा राम्रो भएको छ । रिजल्ट राम्रै आउँछ भन्ने आशा छ ।’

त्यस्तै, प्रविन आचार्यले नयाँ पत्रिकाबाट थाहा पाएका हुन् । ‘पत्रिकामा हेरेर नेपाल एडुफेयरडटकम भिजिट गरेको हुँ,’ उनले भने, भिजिट गरेपछि मन पर्यो अनि स्कलरसिपको परीक्षा दिएको हुँ ।’ शैक्षिक परामर्श र कलेजबारे जानकारी लिन एडुफेयरले सहज बनाएको उनको भनाइ छ ।
त्यस्तै, प्रशान्त अधिकारी पनि स्कलरसिपमा नाम निस्कनेमा आशावादी छन् । ‘लिखित परीक्षा राम्रो भएको छ । अझै अरु परीक्षा पनि बाँकी छ । राम्रै हुन्छ भन्ने विश्वास,’ उनले भने ।

डिजिटल युग

हरिसिंह केसी, सहायक क्याम्पस प्रमुख, साउथ वेस्टर्न स्टेट कलेज

यो डिजिटल युग हो । घरमै बसेर सबै कलेज र विषयबारे परामर्श लिन सकिन्छ । इन्टरनेट पुगेको ठाउँका विद्यार्थीले कलेज कस्तो छ ? कुन विषयको पढाइ हुन्छ ? कस्ता शिक्षकले पढाउँछन्लगायतका बारेमा जानकारी थाहा पाउन सकिने भएकाले भर्चुअल मेला अहिलेको आवश्यकता हो । भर्चुअल टुरबाट विद्यार्थीहरु कलेज आउने गरेका छन् । धेरैभन्दा धेरै इन्फर्मेसन भर्चुअल मेलाबाट पाउने भएकाले अभैm प्रभावकारी बनाउनुपर्छ ।

समय सान्दर्भिक शैक्षिक मेला

कृष्ण श्रेष्ठ, प्राइम कलेज, प्रिन्सिपल

नेपाल एडुफेरडटकमले आयोजना गरेको भर्चुअल शैक्षिक मेला समयसान्दर्भिक छ । भौतिक उपस्थितिबिना नै सम्पूर्ण परामर्श पाउनु शिक्षामा नयाँ आयाम हो । कलेजको लोकेसन, कक्षा कोठा, लाइब्रेरी, शिक्षकलगायतका सम्पूर्ण विषय घरबाटै हेर्न सकिन्छ । यो समयको माग हो । त्यसैले विद्यार्थी र कलेजबाट राय सल्लाह लिएर थप फिचर पनि थप्दै लानुपर्छ ।

अभिभावक र कलेजहरूलाई सहज

सवीन्द्र महर्जन, सीईओ, आईआईएमएस कलेज

भर्चुअल शैक्षिक मेला नेपालका लागि आवश्यक हो । नेपाल एडुफेयरडटकमले शुरुवात गरेको यो मेलाले विद्यार्थी, अभिभावक र कलेजहरूलाई सहजीकरण गरेको छ । भर्चुअल मेलामा सबै कलेज भिजिट गरेर मन परेको कलेज पढ्न मात्र गए भयो । एक क्लिक गर्र्दा सबै कलेज घुम्न सकिने भएकाले यसलाई प्रभावकारी बनाउनुपर्छ ।

शिक्षामा नयाँ आयाम

विदुर दाहाल, अर्किड इन्टरनेसनल कलेज

नेपाल पनि टेक्नोलोजीमा अगाडि बढ्दै छ । यसको उदाहारण हो भर्चुअल शैक्षिक मेला । जहाँ हो, त्यहीँबाट शैक्षिक परामर्श पाउनु विद्यार्थीका लागि राम्रो अवसर हो । यो अवसरलाई विद्यार्थीले सदुपयोग गर्नुपर्छ । कुन कलेज पढ्ने ? कुन विषय पढ्ने भन्ने दोधारमा रहेका विद्यार्थीलाई भर्चुअल शैक्षिक मेलाले सजिलो बनाएको छ । कलेज र विषय छनोट गर्न विद्यार्थीलाई सजिलो भएको छ ।

भर्चुअल शिक्षा अहिलेको आवश्यकता

राजकुमार आचार्य, शैक्षिक निर्देशक, प्रिमियर कलेज

भर्चुअल शिक्षा अहिलेको आवश्यकता हो । विश्व प्रविधिमय भएको छ । नेपाल पनि आईटीमा बामे सर्दै छ । यसको उदाहरण हो । भुर्चअल शैक्षिक मेला । भौतिक उपस्थितिबिना नै शैक्षिक परामर्श दिन शुरू गरिएको छ । राज्यले गर्नुपर्ने काम प्राइभेट क्षेत्रबाट भएको छ । यसलाई सकारात्म रूपमा लिएर शिक्षामा राज्यले टेक्नोलोजीसँग जोड्नुपर्छ ।

कलेज डुल्नु परेन

शंकर शर्मा, प्रिन्सिपल, आदिम कलेज

कुन कलेज आफ्ना लागि उपयुक्त हो, त्यो विद्यार्थीले थाहा पाउने भए । त्यो पनि घरमै बसेर । दिनभर कलेज डुल्नु परेन । थोरै समयमा धेरैभन्दा धेरै परामर्श विद्यार्थीले पाउने भए । नेपाल एडुफेयरले कलेज रोज्न विद्यार्थीलाई सहजीकरण गरेको छ । सबै इन्फर्मेसन पाउने भएकाले भर्चुअल शैक्षिक मेला आजको आवश्यकता हो ।

भर्चुअल शैक्षिक मेलाका लागि शिलापत्रले विज्ञ समूह बनाएर ५० भन्दा बढी विषयमा शैक्षिक सामग्री बनाएको छ ।

कक्षा १२ पछि के पढ्ने ? कुन विषय पढेकाले के पढ्न पाउँछन् ? पढेपछि के बन्ने ? के कस्ता अवसर छन् ? विषय कसरी छनोट गर्ने ? नेपालमा के–कस्ता विषयको पढाइ हुन्छ ? विश्व बजारमा प्रतिस्पर्धा गर्न कुन विषय उपयुक्त हुन्छ ? यी र यस्तै प्रश्नलाई समेटेर कक्षा १२ उत्तीर्ण भएका विद्यार्थीलाई विषयको महत्त्व, सम्भावना, छनोट आदिका विषयमा सहयोग गर्न शिलापत्रले ‘प्लस टु पछिको गन्तव्य’ स्तम्भ पनि शुरू गरेको हो ।
गत आइतबारदेखि तेस्रो भर्चुअल शैक्षिक मेला शुरू भएको हो । मेला मिटिङ प्वाइन्टको व्यवस्थापन र नयाँ पत्रिकाको सहकार्यमा आयोजना गरिएको हो । मेलामा २१ वटा कलेजको सहभागिता छ ।