क्यान अध्यक्ष चन्द भन्छन्, 'अदालतको ढिलाइले सन्दीपको खेल खस्कियो' (भिडियाेसहित)

क्यान अध्यक्ष चन्द भन्छन्, 'अदालतको ढिलाइले सन्दीपको खेल खस्कियो' (भिडियाेसहित)

A+ A A-

नेपाल क्रिकेट संघ (क्यान) का नवनिर्वाचित अध्यक्ष चतुरबहादुर चन्दले क्रिकेटर सन्दीप लामिछानेको मुद्दामा सुनुवाइ गर्न अदालतबाट भएको ढिलाइप्रति असन्तुष्टि व्यक्त गरेका छन् । सर्वोच्चले नै अग्राधिकार दिएर सुनुवाइ गर्नु भनी आदेश गरेको मुद्दालाई निरन्तर सारिनु बिडम्बना भएको चन्दले बताए ।

शिलापत्रसँगको संवादमा अध्यक्ष चन्दले अदालतकै चक्करका कारण सन्दीपको खेल खस्किएको जिकिर पनि गरे । एसियाड खेल्न सन्दीपलाई चीन पठाउने विवादित निर्णयबारे प्रश्न गर्दा जान नमान्दा-नमान्दै पनि क्यानका सचिव पारस खड्का र आफूले सन्दीपलाई मनाएको चन्दले बताए ।

‘ऊ मानसिक रूपमा निकै विक्षिप्त थियो । अदालतले दोषी नै करार गरिदियो भने जेल बस्छु तर फैसला नआएकाले तनाव रहिरह्यो भन्दै थियो, यही तनावले पछिल्लाे समय उसकाे खेल पनि खस्केकाे छ’, चन्दले भने ।

एसियाड खेल्न पाउनु कुनै पनि खेलाडीका लागि महत्त्वपूर्ण अवसर भएकाले नगुमाउन आफूहरूले सन्दीपलाई सुझाएको र उनले यो कुरा मानेको पनि चन्दले बताए ।

किशाेरीमाथि जबर्जस्ती करणी आराेपी सन्दीपलाई क्यानले देशको प्रतिनिधित्व गरी एकपछि अर्काे अन्तर्राष्ट्रिय खेल खेल्न पठाउँदा पीडित भनिएकी किशोरी थप मर्माहत भइनन् होला ? भन्ने प्रश्नमा चन्दले प्रतिप्रश्न गरे, ‘मुद्दा फैसला नै भएको छैन कसरी पीडित ?’

उनले अदालतबाट चाँडोभन्दा चाँडो सन्दीपबारे मुद्दाको सुनुवाइ हुनुपर्ने, दोषी देखिए सजाय, निर्दोष देखिए तनावबाट मुक्त गरिदिनुपर्ने पनि बताए ।

नुवाकोटकी एक किशाेरीलाई ५ भदौमा गौशालाको एक होटलमा राखेर बलात्कार गरेको उजुरी परेपछि सन्दीप २० असोज २०७९ मा पक्राउ परेका थिए ।

तीन पल्ट म्याद थप गरी प्रहरीले उनीमाथि अनुसन्धान गरेकाे थियाे । त्यसपछि जिल्ला अदालत काठमाडाैंले सन्दीपलाई पुर्पक्षका लागि थुनामा पठाउने आदेश गरेकाे थियाे । जिल्लाकाे आदेशविरुद्ध सन्दीपका वकिलले उच्च अदालतमा पुनरावेदन दिएका थिए । २८ पुस २०७९ मा उच्च अदालत पाटनले जिल्लाकाे आदेश उल्टयाउँदै सन्दीपलाई २० लाख रुपैयाँ धराैटी लिएर छाेड्ने आदेश गर्‍याे । पछि सर्वाेच्चले उनलाई विदेश खेल्न जान पनि अनुमति दियाे । साथै सन्दीपबारे मुद्दालाई अग्राधिकार दिएर सुनुवाइ गर्न पनि सर्वाेच्चले भनेकाे थियाे ।

चन्दसँग गरिएकाे विस्तृत भिडियाे कुराकानी शनिबार बिहान ९ बजे शिलापत्रकाे फेसबुक पेज र शिलापत्र प्लस युट्युब च्यानलमा प्रसारण हुने छ ।

प्रकाशित मिति: शनिबार, असोज १३, २०८० ०५:५८