१२ वर्षको जेल सजाय माग्दै सन्दीप लामिछानेविरुद्ध अदालतमा मुद्दा दर्ता

A+ A A-

बालिका बलात्कार आरोपमा पक्राउ परेका क्रिकेटर सन्दीप लामिछानेविरूद्ध सरकारी वकिलको कार्यालयले जिल्ला अदालत काठमाडाैंमा मुद्दा दर्ता गरेकाे छ ।

काठमाडाैंस्थित कार्यालयका प्रमुख एवं सहन्यायाधिवक्ता अच्यूतमणि नेउपानेले आज दिउँसो मुद्दा दर्ता भएकाे जानकारी दिए । सन्दीपविरुद्ध १२ वर्षको कैद सजाय माग गरिएकाे छ । मुद्दा दर्ता भएसँगै उनलाई आजै प्रहरीले अदालतमा उपस्थित गराउन सक्नेछ ।

२० असाेजमा त्रिभुवन अन्तर्राष्ट्रिय विमानस्थलबाट पक्राउ परेका सन्दीपलाई तीन पटकसम्म म्याद थप गरी प्रहरीले अनुसन्धान गरेको थियो । अदालतमा मुद्दा दर्ता भएसँगै अब थुनछेक बहस चल्नेछ ।

नुवाकोटकी एक नाबालिकालाई ५ भदौमा गौशालाको एक होटलमा राखेर लामिछानेले बलात्कार गरेको उजुरी प्रहरीमा परेको थियो । सोही आरोपमा लामिछाने २० असोजमा पक्राउ परेका थिए । यसअघि प्रहरीले छामिछानेमाथि अनुसन्धान गर्न अदालतबाट तीनपटक म्याद थप गरेर अनुसन्धान गरेको थियो ।

उजुरी पर्दा लामिछाने क्यारेबियन लिग खेल्ने सिलसिलामा वेस्ट इन्डिजमा थिए । उजुरी पर्दा पनि लामो समय प्रहरीको सम्पर्कबाहिर बसेपछि पक्राउ गर्नका लागि नेपाल प्रहरीले अन्तर्राष्ट्रिय प्रहरी संगठन इन्टरपोललाई गुहारेको थियो ।

इन्टरपोलले लामिछानेविरुद्ध डिफ्युजन नोटिस जारी गरेको थियो । उनी नेपाल फर्किंदा त्रिभुवन अन्तर्राष्ट्रिय विमानस्थलबाट पक्राउ परेका हुन् । प्रहरीको अनुसन्धानमा लामिछानेले नाबालिका बलात्कार गरेको यथेष्ट प्रमाण पेस गरेको दाबी गरिएको छ ।

नाबालिका बलात्कार गरेको अभियोग अदालतबाट पुष्टि भए १० देखि १२ वर्षसम्म कैद सजाय हुने कानुनी व्यवस्था छ ।

सम्बन्धित समाचार

प्रकाशित मिति: सोमबार, कात्तिक १४, २०७९ १३:२४