उग्र बन्दै भारत-क्यानडा विवाद, एकअर्काको देश सुरक्षित नभएको आरोप

भारत र क्यानडाको विवाद चर्कंदै जाँदा एकअर्काको देश सुरक्षित नभएको आरोप र प्रत्यारोपमा उत्रिएका छन् । खालिस्तान समर्थक सिख नेता हरदीप सिंह निज्जरको हत्यासँगै क्यानडा र भारतबीच कूटनीतिक विवाद चर्किएको हो ।

यसै हप्ता क्यानडाले हरदीप सिंहको हत्यामा भारतीय एजेन्टको संलग्नता भएको प्रमाण आफ्ना खुफिया एजेन्सीले पत्ता लगाएको बताउँदै क्यानडाले यसमा भारत जवाफदेही हुनुपर्ने जनाएको छ । क्यानडाले एक भारतीयलाई देश निकाला पनि गरिदिएको छ ।

यस्तोमा भारतले पनि एक वरिष्ठ क्यानडेली कूटनीतिज्ञलाई देश छाड्न आदेश दिएको छ । त्यसपछि क्यानडाले मंगलबार मात्र भारतका मणिपुर, जम्मु–कस्मिर र आसाम घुम्न नजान भन्दै एड्भाइजरी जारी गरेको थियो । क्यानडाले यी स्थानमा आतंकवाद र अपहरणको खतरा भएको जनाएको थियो ।

भारतले पनि बुधबार क्यानडाको घोषणविरुद्ध नयाँ एड्भाइजरी जारी गरेको छ जहाँ क्यानडा भारतीयहरूका लागि असुरक्षित बन्दै गएको विषय उल्लेख छ । भारतको विदेश मन्त्रालयले जारी गरेको एड्भाइजरीमा भनिएको छ, ‘क्यानडामा जारी भारतविरोधी गतिविधि मध्यनजर गर्दै हामी क्यानडामा रहेका भारतीयलाई र त्यहाँ जान लागेका नागरिकलाई यो सल्लाह दिन चाहन्छौँ कि सबै सतर्क हुनुहोस् ।’

भारतले क्यानडामा रहेका विद्यार्थीहरूलाई सतर्क भएर बस्न र उनीहरूको सुरक्षाको लागि क्यानडाका अधिकारीहरूसँग आफूहरू सम्पर्कमा रहेको बताएको छ । जरुरीबाहेक क्यानडा भ्रमण नगर्न भारतले आफ्ना नागरिकलाई सुझाव दिएको हो ।

बुधबार राति नै क्यानडाले भारतको एड्भाइजरीलाई खारेज गर्दै आफ्नो देश सबै देशका नागरिकको लागि सुरक्षित भएको जनाएको छ । क्यानडाका सार्वजनिक सुरक्षामन्त्री डोमिनिक लेब्लेंकले ओटावामा पत्रकारहरूसँग कुराकानी गर्दै क्यानडा सुरक्षित भएको बताएका हुन् ।

यसबीचमा क्यानडामै फेरि अर्का खालिस्तान समर्थक सुखदुल सिंह गिलको हत्या भएको छ । क्यानडामा हरदीप सिंह निज्जरको हत्या भएको दुई महिनापछि सुखदुल सिंहको पनि हत्या भएको हो । हरदीप सिंहको हत्यामा भारतको हात रहेको आशंका गरिएको छ भने सुखदुल सिंहको हत्याको विषयमा केही खुलाइएको छैन ।

यी दुवैको नाम भारतको आतंकवादी सूचीमा उल्लेख थियो ।