कांग्रेसमा तेस्रो धार ब्युँताउने प्रयासमा सिटौला : पहिला देश घुम्ने अनि बोल्ने

कांग्रेसमा तेस्रो धार ब्युँताउने प्रयासमा सिटौला : पहिला देश घुम्ने अनि बोल्ने

A+ A A-

कांग्रेसको संस्थापन समूह र संस्थापन इतर समूहभन्दा बाहिर रहेर तेस्रो समूहकाे अगुवाइ गरिरहेका नेता कृष्णप्रसाद सिटौलाले १४औँ महाधिवेशनमा आफ्नाे गुट संस्थापनलाई जिम्मा लगाएका थिए । सभापति शेरबहादुर देउवालाई सघाएका उनी १३औँ महाधिवशेनमा जस्तो सभापतिमा उम्मेदवार बनेनन् ।

१३औँ महाधिवेशनपछि पार्टीभित्र समूह बनाएर हिस्सा मागिरहेका सिटौला १४औँ महाधिवेशनपछि गुमनामजस्तै बने । १३औँ महाधिवेशनमा सिटाैलालाई साथ दिएका गगन थापा १४औँ अर्कैतिर गए । सिटौलाले देउवा समूहबाट प्रदीप पौडेललाई महामन्त्री र उमाकान्त चौधरीलाई सहमहामन्त्रीमा लडाएर देउवा समूहमा आफ्नो समूह विलय गराए । सहमहामन्त्रीमा चौधरीले जिते । सिटौलाले कुन्दन काफ्ले र शेखर समूह छाडेका भीम पराजुलीलाई केन्द्रीय सदस्य जिताए ।

गत संघीय चुनावमा गठबन्धनको चुनावी क्षेत्र बाँडफाँट कार्यदलको संयोजक भएर काम गरे । दोस्रो कार्यकाल सभापति भए पनि देउवाले आफूलाई आवश्यक पर्ने ठाउँमा सिटाैलाले खोजी गरे । तर, चुनावमा टिकट दिने, पार्टीका जिम्मेवारी बाँडफाँट गर्नेसहितका भूमिकामा देउवाले सिटौलाको सहयोग आवश्यक ठानेनन् ।

पार्टीभित्र सिटाैलाकाे अहिले केन्द्रीय सदस्यबाहेक कार्यकारी पद र भूमिका छैन । जसका कारण सक्रिय राजनीतिबाट केही सुस्ताएका थिए सिटौला । तर, उनी अब फेरि आफ्नाे समूह सक्रिय बनाउने तयारीमा जुटेका छन् । एकपटक कार्यकर्ताको मत बुझ्न देश दौडाहामा जाने र त्यसपछि समूहलाई सक्रिय बनाउने याेजनामा लागेका छन् । उनीनिकट एक नेताका अनुसार सिटाैलाले केही हदसम्म शक्ति सञ्चयको अभ्यास गर्नेछन् ।

‘टक सेन्टर'को नामबाट सक्रिय भएर जनस्तरसम्म समूह र आफ्नो पकड बढाउन सक्रिय हुनुभएको हो । टक सेन्टरको ब्यानरमा प्रदेशस्तरीय कार्यक्रम हुन्छ । सम्पर्क पातलिएका साथीभाइसँग जोडिएर समूहको स्ट्रेन्थलाई आकार दिनका लागि सक्रिय हुने रणनीति हो,’ उनीनिकट एक नेताले शिलापत्रसँग भने ।

सिटौला सक्रिय नहुँदा उनीनिकट रहेका केन्द्रीय नेताहरू पनि टाढिएका छन् । संघीय चुनावपछि उनले समूहलाई व्यवस्थापन गर्ने प्रयास गरे । कोशी प्रदेशमा उद्धव थापालाई प्रदेश सभापति बनाउन सफल भएका थिए सिटौला । थापा अहिले मुख्यमन्त्री छन् । कोशी प्रदेशमा प्रदेश महामन्त्री र कांग्रेसको प्रदेशसभा सचेतक बनाउन सफल भए । बाग्लुङ सभापति जित शेरचनलाई प्रदेशसभा सदस्य बनाउन सफल भए ।

शिव हुमागाईंलाई काभ्रेमा प्रतिनिधिसभा सदस्यको टिकट दिलाए पनि उनी पराजित भए । महामन्त्रीमा आफ्नो समूहको प्रतिनिधित्व गराएका प्रदीप पौडेलले काठमाडौं ५ बाट चुनाव जिते । संसदीय दलको चुनावको समयमा पौडेलले सभापति देउवालाई नसघाएर इतर समूहका उम्मेवार महामन्त्री गगन थापालाई सघाए । पौडेल त्यसयता सिटौला समूहमा रहेका छैनन् ।

विगतमा सिटौलानिकट मानिएका लिला बोखिम, मुक्ता यादवलगायत समानुपातिक सांसद पनि सिटौला कित्तामा देखिँदैनन् ।

थापा, पौडेललगायतका विद्यार्थी आन्दोलनबाट उदाएका नेताहरूले आफ्नो लागि मात्र काम गर्ने रहेछन् भन्ने बुझाइ सिटौलामा देखिन्छ । ‘नेविसंघका केटाहरू आफूलाई हेरेर मात्र काम गर्दा रहेछन् । पहिलो गगन अहिले प्रदीप पौडेल पनि टिमबाट हिँडेपछि त्यसलाई थप पुष्टि गर्‍याे भन्ने खालका कुराहरू हुने गर्छ,’ सिटौलानिकट नेता भीमसेनदास प्रधानले भने ।

राष्ट्रपति बन्ने समयमा कांग्रेसबाट रामचन्द्र पौडेल र सिटौला दुवै मैदानमा थिए । प्रधानमन्त्री पुष्पकमल दाहाल प्रचण्डको रोजाइमा पनि सिटौला थिए । ‘राष्ट्रपतिको कुरा आयो तर, रामचन्द्र दाइलाई दिइयो । शेरबहादुर दाइलाई यहाँसम्म पुर्‍याउन सिटौला दाइको हात छ नि ! जसका लागि गरे पनि धोका भएपछि उहाँ निराश हुनुभएको हो,’ प्रधानले भने ।

‘टक सेन्टर’ बाट सिटौला अघि बढ्ने प्रयासमा छन् । केन्द्रीय सदस्य काफ्ले, कोशी कांग्रेस महामन्त्री राई र बागलुङ कांग्रेस सभापति शेरचनको अगुवाइमा 'टक सेन्टर’ खोलिएको हो । सेन्टरबाट सिटौलालाई केन्द्रमा राखेर काम भइरहेको छ । महाराजगञ्जमा कार्यालय रहेको सेन्टरले समसामयिक राजनीतिक घटनाक्रम र विभिन्न विषयमा केन्द्रित रहेर संवादहरू चलाइरहेको छ ।

गत आइतबार टक सेन्टरले ‘संविधान कार्यान्वयन र जनप्रतिनिधिका भूमिका’ विषयमा सभागृहमा कार्यक्रम गरेको थियो । ‘संविधानमा सबै कुरा छन् । भएका कुराहरू कार्यान्वयन भएनन् भन्ने निचोड निस्कियो । कृष्ण दाइले सातै प्रदेशमा बोलायौँ भने आएर सुन्छु भन्नुभएको छ,’ केन्द्रीय सदस्य काफ्लेले शिलापत्रसँग भने । टक सेन्टरको पार्टीगत उद्देश्य नभएको उनले बताए ।

१३औँ महाधिवशेनमा सभापति लडे, १४औँमा देउवालाई सघाए । अब सक्रियता बढेसँगै १५औँ महाधिवेशनको तयारी हो भन्ने प्रश्नमा काफ्लेले भने, ‘१५औँ महाधिवेशनको तयारी हुन सक्ला तर मलाई त्यस्तो लाग्दैन ।’

टक सेन्टरले भदौ १ गते विराटनगरमा कार्यक्रम गर्दै छ भने प्रदेश, जिल्लाहुँदै स्थानीयस्तरमा कार्यक्रम लैजानेछ । निकटहरूसँग सिटौलाले आफ्नो कुरा खोलिसकेका छैनन् ।

‘भदौ महिनाभर देश घुमौँ । त्यसपछि म मेरा कुरा भन्छु भन्नुभएको छ । अहिले उहाँ मौन हुनुहुन्छ,’ सहमहामन्त्री चौधरीले भने । कार्यक्रम गर्दा मान्छे भेला हुन्छन् भन्ने सन्देश दिएको उनले बताए ।

प्रकाशित मिति: बुधबार, साउन २४, २०८० २०:३३