गठबन्धनपछि देउवाले कांग्रेसभित्रै मिलाउनुपर्ने छ भागबन्डा, १० सिटमा सिटौलाका आँखा

गठबन्धनपछि देउवाले कांग्रेसभित्रै मिलाउनुपर्ने छ भागबन्डा, १० सिटमा सिटौलाका आँखा

A+ A A-

पार्टीभित्र समूह बनाएर हिस्सा माग्ने हैसियत बनाएका कांग्रेसका पूर्वमहामन्त्री कृष्णप्रसाद सिटौलाले १४औँ महाधिवेशनमा त्यसलाई निरन्तरता दिन सकेनन् ।

तेस्रो शक्ति बनाएर अघि बढेका सिटौलाकाे समूहबाट १३औँ महाधिवेशनमा महामन्त्री लडेका गगन थापा १४औँ महाधिवेशनमा अर्कैतिर गए । सिटाैलाले युवा नेता प्रदीप पौडेललाई महामन्त्री, उमाकान्त चौधरीलाई सहमहामन्त्रीमा लडाएर शेरबहादुर देउवा समूहमा आफ्नो समूह विलय गराए । सहमहामन्त्रीमा चौधरीले जिते । सभापतिमा उनले देउवालाई सघाए । सिटौलाले कुन्दन काफ्ले र शेखर समूह छाडेका भीम पराजुलीलाई केन्द्रीय सदस्य जिताए । अझै, सभापति देउवासँग उनले भाग माग्न छाडेका छैनन् । १० महिला केन्द्रीय सदस्य मनोनीत गर्दा सिटौला कोटाबाट धना खतिवडा परिन् ।

सिटाैला अब देउवालाई गत महाधिवेशनमा लगाएकाे गुनकाे बदलामा चुनावी सिट भाग लगाउन चाहन्छन् । मंसिर ४ मा हुने संघ र प्रदेशको चुनावका लागि बनाइएको सत्ता गठबन्धन सिट बाँडफाँट कार्यदलको संयोजक छन् सिटाैला । अपुरो प्रतिवेदन बुझाएको कार्यदलमा उनी पार्टीका संस्थापन र इतर समूह दुवैकाे चित्त बुझाउने गरी मध्यमार्गी उपायको खोजीमा देखिए ।

शेखर कोइराला समूहकाे १०० सिटे अडान र ८६ सिटमा चित्त बुझाउने देउवाकाे मन बुझेका सिटाैलाले ९० सिट कांग्रेसका भागमा हुनुपर्ने मध्यमार्गी बाटो औंँल्याए । कार्यदल संयोजक भएकाले अन्य दलसहित पार्टीभित्रको दुई गुटकाे पनि चित्त बुझाउनुपर्ने भूमिकामा छन् उनी । कांग्रेसभित्रै सिटाैलाकाे समूहले केकति सिट खाेजेकाे छ, यसबारे नेताहरूले केही बाेलेका छैनन् ।

कांग्रेसले ८० सिट पाएको खण्डमा आफूलाई १०-१२ प्रतिशत हिस्सा चाहिने लबिङमा सो समूह रहेकाे बताएन्छ । गठबन्धनबाट कति सिट कांग्रेसको भागमा पर्छ, त्यसको आधारमा आफ्नो हिस्सा दाबी गर्ने तयारी सिटाैलाकाे छ । ‘८० सिट मात्र कांग्रेसको भागमा पर्‍यो भने कम्तिमा १०-१२ प्रतिशत हामीलाई चाहिने देखिन्छ’, सिटौला निकट एक नेताले शिलापत्रसँग भने ।

सिटौला समूहले पहिलो प्राथमिकताको सूची र दोस्रो प्राथमिकताको सूची तयार पारेको छ । पहिलो प्राथमिकतामा सिटौलासहित सहमहामन्त्री उमाकान्त चौधरी, भीमसेनदास प्रधान र प्रदीप पौडेल छन् । यी ४ जनापछि प्राथमिकतामा केन्द्रीय सदस्य कुन्दन काफ्ले छन् । प्रदेश १ का सभापति उद्धव थापा, बाग्लुङ सभापति जित शेरचन, विराटनगरका पूर्वनगरप्रमुख भीम पराजुली, झपाका सुधिर शिवाकोटी, देउमान थेवे, काभ्रेबाट शिव हुमागाईंलगायतका पनि प्राथमिकतामा छन् ।

झापा- ३ बाट ०७४ को प्रतिनिधिसभा चुनावमा हारेका सिटौला सोही क्षेत्रबाट एकल सिफारिसमा परेका छन् । प्रदेश १ सभापति थापा झापा-२ बाट सिफारिसमा परेका छन् । प्रतिनिधिसभामा टिकट नदिँदा उनलाई मुख्यमन्त्री बनाउने गरी प्रदेशसभामा उठाउने तयारी रहेकाे बताइन्छ । झापा-२ बाट पूर्वकेन्दीय सदस्य शिवाकोटी पनि सिफारिसमा परेका छन् । झापा- ४ बाट जिल्ला सभापति थेवे एकल सिफारिसमा परेका छन् ।

सिटौला समूहका नेविसंघ पूर्वउपाध्यक्ष उत्तम चापागाईं भोजपुरबाट चुनाव लड्ने आकाङ्क्षा देखाइरहेका छन् । संखुवासभाबाट तारामान गुरुङ सिफारिसमा भएका छन् । ताप्लेजुङबाट जिल्ला सभापति गजेन्द्रप्रसाद तुम्याङ सिफारिसमा परेका छन् । भीम पराजुली मोरङ-४ बाट सिफारिसमा परेका छन् । सहमहामन्त्री बारा-४ बाट सिफारिसमा परेका छन् ।

काठमाडौं-६ बाट भीमसेन दास प्रधान सिफारिसमा परेका छन् । धना खतिवडा ललितपुर-३ बाट सिफारिसमा परेकी छन् । काभ्रेबाट शिव हुमागाईं पनि सिफारिसमा भएका छन् । दोलखाबाट कुन्दन काफ्ले सिफारिसमा परेका छन् । तनहुँ-२ बाट प्रदीप पौडेल सिफारिसमा परेका छन् । बर्दिया-२ बाट माली सोडारी सिफारिसमा परेकी छन् । बाजुराबाट पूर्व राज्यमन्त्री जनक गिरि सिफारिसमा परेका छन् ।

२ निर्वाचन क्षेत्र रहेको बाग्लुङमा गठबन्धनबाट जनमोर्चा र माओवादीको दाबी छ । बाग्लुङ- २ मा माओवादीका देवेन्द्र पौडेल विजयी भएका थिए । बाग्लुङ-१ मा भने जनमोर्चाका अध्यक्ष चित्रबहादुर केसी सिफारिस भएका छन् । गठबन्धनबाट कांग्रेसले बाग्लुङ नपाएमा सिटौला समूहका उम्मेदवार बन्न शेरचन बञ्चित हुनेछन् । त्यसैले उनी शीर्ष नेता भेट्न र बाग्लुङका कांग्रेस कार्यकर्ताको सन्देश सुनाउन काठमाडौंमा छन् ।

'पार्टीमा यो पक्ष र त्याे पक्ष गर्दै फेरी पनि भागबन्डा गरेर टिकट दिने हो भने पार्टीको अवस्था राम्रो हुन्न, कृष्ण दाइ स्वभाविक रूपमा नेता हुनुहुन्छ, टिम बनाएर बस्नुभएको छ, त्यो सबैलाई थाहा छ’, कांग्रेस बाग्लुङ सभापति शेरचनले शिलापत्रसँग भने, ‘निर्वाचन क्षेत्रमा संयन्त्र प्रयोग गरेर कसले निर्वाचन जित्छ ? जनताले जसलालाई चाहेका छन्, उसैलाई टिकट दिएर पठाउनुपर्छ । यसको पक्षमा यो पर्‍यो भनेर बिल्ला लगाउन हुन्न भन्ने मेराे मत हो ।’

काठमाडौंका रैथाने तथा लामो समय राजनीतिमा सक्रिय नेता प्रधानले टिकट नपाए काठमाडौंका १० वटै निर्वाचन क्षेत्र प्रभावित हुन सक्ने चेतावनी उनी निकट नेताहरूले दिन थालेका छन् । ‘भीमसेन दाइ काठमाडौंको पूर्वसभापति हुनुहुन्छ, उहाँले संगठन बलियो पार्नुभएको छ’, प्रधाननिकट एक नेताले भने, ‘उहाँले टिकट पाउनुभएन भने काठमाडौंको १० वटै निर्वाचन क्षेत्रको मत परिणाम प्रभवित हुन सक्छ ।’

पूर्वरक्षामन्त्री प्रधान अकुपाई टुँडिखेलका अभियन्ता पनि थिए । ‘२ पटक चुनाव लडे र जनताले विश्वास गर्नुभयो । अब अन्तिम पटक लड्छु’, प्रधानले शिलापत्रसँग भने, ‘काठमाडौंको ६ र १० मा कांग्रेस बलियो रहेको स्थानीय तहको नतिजाले पनि देखाउँछ ।’

दोलखामा काफ्लेले टिकट पाएमा गठबन्धन नभए पनि जित्ने सिटौला समूहकाे दाबी छ । विद्यार्थी राजनीतिदेखि टिम बनाएर राजनीतिक अभ्यास गरेका काफ्ले सिटौला र देउवा दुवैलाई मनाउन लागि परेका छन् ।

नेता सिटौला आफू पछाडि हटेर भए पनि गठबन्धन र कांग्रेस जिताउन लाग्ने काफ्ले बताउँछन् । ‘कृष्ण दाइ गुट बनाउने, समूह सञ्चालन गर्नेभन्दा पनि पार्टी बनाउन नेतृत्वलाई सहयोग गर्ने पक्षमा हुनुहुन्छ । समूहमा रहेकाहरूलाई न्यायपूर्ण ढंगबाट टिकट वितरण गर्नुहुन्छ’, पाैडेलले भने, 'कार्यदलको संयोजक रहेपछि गठबन्धन प्रभावकारी बनाउने काम कृष्ण दाइको प्राथमिकतामा छ ।’

प्रकाशित मिति: शनिबार, भदौ २५, २०७९ ०९:१८