सिटौलालाई काखी च्यापेपछि देउवा समूहमा पहिराे, यी नेताहरू बाहिरिँदै

A+ A A-

शेरबहादुर देउवाले सभापतिमा दोहोरिनका लागि कृष्णप्रसाद सिटौलासँग तालमेल गरेर आफ्नो पक्षका नेतालाई बेवास्ता गर्न थालेपछि कांग्रेसकाे संस्थापन समूहमा अलमल देखिएको छ ।

लामो समयदेखि सहयोग गर्दै आएका नेताहरू समेत बिच्किन थालेपछि देउवाको चुनावी तालमेलमा समस्या देखिन थालेको हाे ।

गुट भित्रको आन्तरिक प्रतिस्पर्धालाई समेत बेवास्ता गर्दै देउवाले सिटौला गुटका नेतालाई साथ दिन थालेसँगै नेताहरू बिच्किएका छन् । विमलेन्द्र निधिले देउवालाई छोडेपछि एक प्रकारको समस्या त परेको छैन । तर प्यानल घोषणा हुनुअगावै देउवालाई साथ दिँदै आएका युवा नेताहरू विश्व-प्रकाश शर्मा र एनपी साउँदले देउवा गुट छाड्ने संकेत गरिसकेका छन् ।

आन्तरिक छलफलका क्रममा देउवाले अहिले डा. प्रकाशरण महत र प्रदीप पौडेललाई महामन्त्रीको प्रस्ताव गरेसँगै महामन्त्रीमा दाबी गरेका आधा दर्जन नेताहरू रुष्ट बनेका छन् ।

देउवा गुटबाट बालकृष्ण खाँण, ज्ञानेन्द्रबहादुर कार्की, विश्वप्रकाश शर्मा, एनपी साउँद, रमेश लेखकले पनि महामन्त्रीमा दाबी गरेका थिए । यति धेरै आकांक्षी हुँदा हुँदै पनि सिटौलासँगको तालमेलमा प्रदीप पौडेललाई महामन्त्री बनाउने भएपछि उनीहरूले असन्तोष जनाएका छन् ।

'देउवा समूहभित्र शर्मा, खाँण, कार्की, महत र साउँदबीच आन्तरिक प्रतिस्पर्धा थियो, तर प्रदीप पौडेललाई भित्राएपछि आन्तरिक प्रतिस्पर्धा समेत हुन पाएन' शर्मा निकट एक नेताले शिलापत्रसँग भने 'यो देउवाको लागि खतरायुक्त हुन्छ' ।

१३औँ महाधिवेशनमा तत्कालीन संस्थापन पक्षमा रहेमा नेताहरूलाई यसै गरी व्यवस्थापन गर्न नसक्दा पराजय बेहोर्नु परेको थियो । १३औँ महाधिवेशनको पूर्वसन्ध्यामा अर्जुननरसिंह केसी, अर्जुन जोशी, चन्द्र भण्डारी लगायतका नेता देउवा क्याम्पमा खुलेका थिए । अहिले देउवालाई स्वयम त्यही समस्या पर्ने देखिएको छ ।

माथि उल्लेखित नेताहरूमध्ये खाँण र कार्कीले अहिले पनि महामन्त्रीमा आफूलाई प्यानलमा राख्न प्रयास गरिरहेका छन् । प्यानलमा नपर्दा के गर्ने भन्ने विषयमा उनीहरूले धारणा बनाइसकेका छैनन् ।

यता संस्थापनइतर पक्षबाट विगतमा सिटौला क्याम्पमा रहेका गगन थापा र देउवा क्याम्पमा रहेका विश्वप्रकाश शर्मालाई महामन्त्री बनाउने छलफल चलेको छ ।

यसो हुँदा महामन्त्रीमा प्रमुख दाबी गरेका मीनेन्द्र रिजालले के गर्छन् भन्ने विषयमा चासो बढेकाे छ । रिजालले अहिले छलफलमा रहेको र कसरी अघि बढ्ने भन्ने विषयमा छिट्टै निर्णय लिने शिलापत्रलाई बताए ।

प्रकाशित मिति: शनिबार, मंसिर २५, २०७८ १३:५८