तस्करसँग किन मिल्यौ भनेर सोध्दा पत्रकार महासंघकै लेटरप्याडमा आरके अदिप्त गिरीविरुद्ध जाहेरी

तस्करसँग किन मिल्यौ भनेर सोध्दा पत्रकार महासंघकै लेटरप्याडमा आरके अदिप्त गिरीविरुद्ध जाहेरी

A+ A A-

मंगलबार पर्वतका स्वतन्त्र पत्रकार एवं कालीगण्डकी संरक्षण अभियन्ता आरके अदिप्त गिरीविरुद्ध प्रहरीले पक्राउ पुर्जी जारी गर्‍यो । उनलाई थुनाउन पर्वतकै पत्रकारहरू तम्सेका छन् । पर्वतका डीएसपी मधुसुधन न्यौपानेका अनुसार गिरीविरुद्ध प्रहरीमा १८ गते जाहेरी परेको थियो । गिरीको कसुरचाहिँ पर्वते पत्रकारको प्रवृत्तिविरुद्ध सामाजिक सञ्जालमा टिप्पणी गर्नु थियो । यही कसुरमा उनीविरुद्ध ‘साइबर क्राइम’ मुद्दा चलाउन लागिएको छ । 'हामी प्रारम्भिक अनुसन्धान गर्दै छाैँ,' डीएसपी न्याैपानेले फाेनमा शिलापत्रसित भने ।

सामान्य मान्यता के छ भने, पत्रकारले समाजमा भएका विकृति, विसंगतिविरुद्ध खबरदारी गर्छ । तर, जानकारहरूका अनुसार पर्वतमा ठीक उल्टो भइरहेको थियो । पत्रकारिताभित्रकै जवाफशून्यता, दलाली र पक्षधरताविरुद्ध ३८ वर्षे गिरीले खबरदारी गर्दै आएका थिए । 'उनको खबरदारी सहन नसक्नेहरू केवल पत्रकार मात्रै हाेइनन्, एनजीओका कर्मचारी, दलका कार्यकर्ता, मेयरका पीएसम्म छन् । अर्थात् पत्रकार पनि तिनै, एनजीओका कर्मचारी पनि तिनै, जनप्रतिनिधिका सहयोगी र पीए पनि तिनै', एक स्थानीयले भने ।

कालीगण्डकी जोगाउन कस्सिएका फोटोग्राफर

'जिल्लामा बदमासी गर्नेहरूसँग नै पत्रकार मिलेको भन्ने व्यापक असन्तुष्टि नागरिकस्तरमै छ, यो कुराले आरकेजी झन् धेरै फ्रस्ट्रेटेड हुनुहुन्थ्यो । अरुले असन्तुष्टि चियापसल, चोकचौतारा अनि मनमै सीमित गरे, उहाँले सामाजिक सञ्जालमार्फत अभिव्यक्त गर्नुभयो,' म्यासेन्जर च्याट संवादमा कुश्माका ती स्थानीयले भने ।

कुनै बेला गिरी काठमाडौंमै बसेर पत्रकारिता गर्थे । बागलुङको जैमिनी नगरपालिका ७ जैदीका उनी कवि, फाेटाे पत्रकारका रूपमा पनि चिनिन्थे । करिब अढाइ वर्षअघि गिरी कुश्मा फर्केर शताब्दी घर सञ्चालन गरी बस्दै आएका थिए । साथै स्वतन्त्र पत्रकारितासँगै कालीगण्डकी जोगाऔँ अभियानमा जोडिए उनी । यस क्रममा आफूले जिल्लाको पत्रकारिता क्षेत्रको विकृति नजिकबाट देखेको उनी बताउँछन् । त्यसैले बेलाबखत उनले सामाजिक सञ्जालबाट जिल्लाका पत्रकार र पत्रकारिताबारे तिखो टिप्पणी गर्दै आएका थिए ।

पत्रकारको नाममा देखिएको लाखौँ बेरुजु, तस्करहरूसँग पत्रकारको मिलिभगत, सामाजिक मुद्दाप्रति पत्रकारको उदासीनता, कालीगण्डकी नदीको गैरकानुनी दोहनमा पत्रकारको मौनतालगायतबारे गिरीले प्रश्न उठाइरहेका थिए । हुन पनि, महालेखा परीक्षण कार्यालयले पर्वतका पत्रकारहरूको नाममा बेरुजु ३५ लाख देखाएको थियो ।

खासगरी लोककल्याणकारी विज्ञापनबापतको रकम दुरुपयोग गरेको आरोप पर्वतका पत्रकारहरूलाई लाग्दै आएको छ । जिल्लामा ११ वटा पत्रिका दर्ता भएर राज्यबाट विज्ञापन रकम लिए पनि बजारमा असाध्यै न्यून पत्रिका बिक्रीवितरण हुने गरेको ती स्थानीयले बताए । आफू पनि पत्रकारिता नै गरिरहेकाले पत्रकारका नाममा हुने यस्ता बदमासीको भण्डाफोर गर्दै आएकाे गिरी बताउँछन् ।

‘मैले पर्वतमा सक्रिय सबै पत्रकार गलत हुन् भन्न खोजेको होइन । तर, पत्रकारिता देखाएर अन्य धन्दा चलाइरहेको मैले हेर्न सकिनँ र विरोध गरेँ’, गिरीले शिलापत्रसित भने ।

कालीगण्डकी बचाऔँ अभियानका अभियन्ता आरके अदिप्त गिरीविरुद्ध पक्राउ पुर्जी जारी

महासंघकाे लेटरहेडमा उजुरी

साउन दोस्रो साता पत्रकार महासंघको शुद्धीकरण अभियानबाट पर्वतमा पत्रकारसमेत भनिने २६ जना कारबाहीमा परे । यसरी महासंघको सदस्यता खोसिनेहरूको पेसा पत्रकारिता मात्रै थिएन । कोही एनजीओका कर्मचारी थिए, कोही मेयरका पीए, कोही पार्टीको केन्द्रीय सदस्य थिए, कोहीचाहिँ गाउँपालिकाका कर्मचारी थिए । जागिर अन्तै खाने तर पत्रकार महासंघको सदस्यता देखाएर पत्रकार हुँ भन्दै हिँड्नेविरुद्ध पनि गिरीले तिखाे टिप्पणी गर्दै आएका थिए ।

सामाजिक सञ्जालमा असन्तुष्टि पोख्दा उनले कुनै पत्रकारको नाम भने कतै पनि लिएको देखिँदैन । कमेन्ट गर्न आउने केहीसँगचाहिँ उनको भनाभन भएको देखिन्छ । यसरी भनाभन गर्ने जाेहेरीकर्ताहरू नै हुन् ।

पत्रकारिताभित्रको बेथिति औँल्याएकै आधारमा आफूलाई पत्रकार भन्नेहरूले गिरीविरुद्ध जाहेरी दिनु लज्जास्पद रहेको भन्दै सामाजिक सञ्जालमा चर्को विरोध भइरहेको छ । लेखक प्राध्यापक सञ्जीव उप्रेतीले शिलापत्रसित भने, ‘त्यसमाथि अभिव्यक्ति स्वतन्त्रताको पक्षधर हुनुपर्ने पत्रकारले नै आफ्नो क्षेत्रविरुद्ध बोलेकोमा कसैलाई मुद्दा लगाउनु अशोभनीय छ ।’

स्वतन्त्रताको स्पेस खुम्चिँदा त्यसको सबैभन्दा ठूलो मूल्य पत्रकारले नै चुकाउनुपर्ने उनी बताउँछन् । भन्छन्, ‘भारत, पाकिस्तान, बंगलादेशमा हेर्नुस् न, स्वतन्त्रताको स्पेस खुम्चिँदा हालत कस्तो छ । नेपालमा त कम्तीमा हामीले बोल्न र खबरदारी गर्न पाएका छौँ । आफूलाई पत्रकार भन्नेहरूले नै यो स्वतन्त्रतामाथि धक्का पुर्‍याउनु राम्रो होइन ।’

गिरीलाई पक्रेर साइबर अपराध मुद्दा चलाउन पत्रकार महासंघ पर्वतका अध्यक्ष सन्ताेष थापा, निवर्तमान अध्यक्ष छविलाल तिवारीसहित साजन परियार, रोशन तिवारी, गणेश पौडेल र वैकुण्ठ गिरीले जाहेरी दिएका हुन् । उनीहरूमध्ये इन्सेक नेपालका कर्मचारी भएकाले थापा, नेपाली कांग्रेसकाे क्षेत्रीय 'ख' सचिव भएकाले तिवारी र सीप विकास कार्यालय पर्वतका कर्मचारी भएकाले पाैडेल नेपाल पत्रकार महासंघले चलाएकाे शुद्धीकरण अभियानअन्तर्गत कारबाहीमा परेका थिए । यस हिसाबले हेर्दा उनीहरूले पत्रकार महासंघको लेटरप्याडसमेत दुरुपयोग गरेको देखिन्छ ।

गिरीविरुद्ध ६ जनाको जाहेरीसँगै पत्रकार महासंघको लेटरप्याडबाट समेत उजुरी परेको डीएसपी न्यौपानेले बताए ।

पत्रकार महासंघ पर्वतका अध्यक्ष सन्तोष थापाले वर्ष दिनदेखि गिरीले सीमित पत्रकारलक्षित आक्षेप लगाउँदै आएको दाबी गरे । भने, ‘उनले श्रृङ्खलाबद्ध रूपमा पर्वतका पत्रकारविरुद्ध लेख्थे, दलाल, झोले, फटाहाजस्ता शब्द प्रयोग गर्थे । हामीले यसो नगर्नुहोस्, कुनै असन्तुष्टि भए बसेर छलफल गरौँ भनेका पनि हौँ, कतै दलाली गरेको प्रमाणित भए हामीविरुद्ध जाहेरी दिनुस् नभनेका पनि होइनौँ । तर हामीमाथि अपमानजनक शब्द प्रयोग गर्न छाडेनन् । हामीलाई परिवार र समाजमा समेत अप्ठेरो भएपछि जाहेरी दिएका हौँ ।’

‘गिरीले फेसबुकमा राखेको स्टाटसमा त कसैको पनि नाम मेन्सन भएको देखिँदैन नि ?’

यो प्रश्नमा अध्यक्ष थापाले भने, 'पत्रकारिताबारे प्रश्न उठेपछि निश्चित रूपमा मसहित केही साथीले ‘किन यस्तो लेख्नुहुन्छ भनेर प्रश्न गर्‍यौँ, गिरीले तथानाम गाली गर्दै रिप्लाइ गरे ।

महासंघको लेटरहेड दुरुपयोगबारे उनले प्रहरीले मागेकाले लेटरहेडमा लेखेर दिएको दाबी गरे ।

यसैबीच, ‘कालीगण्डकी बचाऔँ अभियान’ ले गिरीविरुद्धको पक्राउ पुर्जीप्रति आपत्ति जनाएको छ । अभियानले यसलाई अभिव्यक्ति स्वतन्त्रतामाथिको आक्रमण भनेको छ । ‘यो कदमले अभिव्यक्ति स्वतन्त्रताको संविधाप्रदत्त मौलिक हकमाथि नै आघात पुर्‍याएको छ’, अभियानले जारी गरेको विज्ञप्तिमा भनिएको छ ।