धरानमा डेंगीले ‘क्रिटिकल' स्थिति, हालसम्म ९ जनाको मृत्यु, कोभिड अस्पताललाई डेंगी अस्पताल बनाइयो

धरानमा डेंगीले ‘क्रिटिकल' स्थिति, हालसम्म ९ जनाको मृत्यु, कोभिड अस्पताललाई डेंगी अस्पताल बनाइयो

A+ A A-

धरानस्थित बीपी कोइराला स्वास्थ्य विज्ञान प्रतिष्ठानमा जेठयता डेंगीका कारण ९ जनाको मृत्यु भएको छ । पछिल्लो १० दिनको अवधिमा मात्र ५ जनाको मृत्यु भएको प्रतिष्ठानले जनाएको छ । मृत्यु हुनेमा बालबालिकादेखि ज्येष्ठ नागरिकसम्म छन् । ‘मृत्यु भएकामा दीर्घरोगी पनि देखिएको छ,’ प्रतिष्ठानका सहप्रवक्ता डा. चुडामणि पोखरेलले भने ।

जेठदेखि नै डेंगीका बिरामी प्रतिष्ठानमा आए पनि असार दोस्रो सातादेखि धरानमा तीव्र रूप लिएको हो ।

हाल प्रतिष्ठानमा डेंगीका बिरामी भरिभराउ रहेको डा. पोखरेलले बताए । ‘असार दोस्रो सातादेखि तीव्र रूपमा फैलिएको हो । जेठयता ९ जनाको मृत्यु भएको छ । बिरामीले इमर्जेन्सी भरिभराउ हुन्छ,’ उनले भने ।

अस्पतालमा उपचारका लागि आएका १०० जना बिरामीमध्ये ४० जना डेंगीका बिरामी हुने गरेका छन् । ‘क्रिटिकल छ । बिरामीको अत्यधिक चाप छ । इमर्जेन्सी र ओपीडीमा पनि डेंगीकै बिरामी हुन्छन्,’ उनले भने, ‘डेंगीको लक्षण भएका बिरामी धेरै आउने गरेका छन् ।’

डेंगी क्लिनिक

प्रतिष्ठानमा डेंगीका बिरामीको चाप बढेपछि ‘डेंगी क्लिनिक’ सञ्चालनमा ल्याइएको डा. चुडामणि पोखरेलले बताए । क्लिनिकमा शनिबारसमेत बिरामीलाई उपचार सेवा दिइएको प्रतिष्ठानले जनाएको छ । ‘बिरामीले पालो कुर्नु नपरोस् भनेर सहज बनाउन क्लिनिक सञ्चालनमा ल्याएका हौँ,’ उनले भने । प्रतिष्ठानले डेंगी क्लिनिकमा निःशुल्क उपचारको व्यवस्था गरेको छ ।

२९ असारदेखि प्रतिष्ठानले क्लिनिक सञ्चालनमा ल्याएको हो । डेंगी क्लिनिकमा हालसम्म १६ सय १५ जनाको परीक्षण गर्दा १२ सय ८ जनामा डेंगी पोजिटिभ देखिएको डा. पोखरेलले बताए । ‘८० प्रतिशतमा डेंगी देखिएको छ,’ उनले भने ।

चिकित्सक र कर्मचारीमा पनि डेंगी

प्रतिष्ठानका चिकित्सक र कर्मचारीसमेत डेंगीको मारमा परेका छन् । १० प्रतिशत चिकित्क र कर्मचारीलाई डेंगी भएको छ । चिकित्सकलाई डेंगी भएपछि उपचार सेवा प्रभावित हुने संकेत देखिएको छ । ‘इमर्जेन्सीमा चाप बढिरहेको छ । अन्य रोगका बिरामी पनि आइरहेका छन् । चिकित्सक र कर्मचारीमा पनि डेंगी देखिएको छ । काम प्रभावित हुन सक्छ,’ डा. पोखरेलले भने ।

कोभिड अस्पताललाई डेंगी अस्पताल बनाइयो

डेंगीका बिरामीको चाप बढेपछि कोभिड महामारीमा सञ्चालनमा ल्याइएको कोभिड अस्पताललाई डेंगी अस्पताल बनाइएको छ । बेडको अभाव हुन नदिन ७ साउनदेखि कोभिड अस्पताललाई डेंगी अस्पताल बनाइएको सहप्रवक्ता डा. पोखरेलले बताए । उक्त अस्पतालमा ३० बेड सञ्चालनमा ल्याइएको छ । प्रतिष्ठानमा हाल ५४ जना डेंगीका बिरामी भर्ना भएका छन् ।

‘सिकिस्त बिरामी आएका छन् । बिरामीको अवस्था आईसीयूमा राख्नुपर्नेलाई आईसीयूमा राखेर उपचार गरिरहेका छौँ,’ उनले भने । इपिडिमियोलोजी तथा सरुवा रोग नियन्त्रण महाशाखाले प्रतिष्ठानलाई किट उपलब्ध गराएको छ ।

धरान उपमहानगरपालिकाले नियन्त्रणका लागि लामखुट्टे लार्भा खोज र नष्ट गर अभियान चलाइरहेको जनाएको छ । ‘लामखुट्टेको वृद्धि विकास हुन नदिन लार्भा खोज र नष्ट गर अभियान चलाइरहेका छौँ,’ उपमहानगरको स्वास्थ्य महाशाखाका जनस्वास्थ्य अधिकृत उमेश मेहताले भने ।

असोजसम्म उच्च जोखिम

इपिडिमियोलोजी तथा रोग नियन्त्रण महाशाखाको बुधबारसम्मको तथ्याङ्कअनुसार देशभर ४ हजार ६ सय १९ जनामा संक्रमण पुष्टि भइसकेको छ । महाशाखाका निर्देशक डा. रुद्र मरासिनीका अनुसार पानी परिरहेका कारण सरसफाइमा ध्यान नपुर्‍याउँदा डेंगी संक्रमितको संख्या बढ्दै गइरहेको छ ।

‘यो जोखिम असोजसम्म उच्च रहन्छ । लामखुट्टेको लार्भा खोज्ने र नष्ट गर्ने अभियानलाई सबैले अपनाउन आवश्यक छ,’ उनले भने । सरकारले डेंगी नियन्त्रणका लागि ‘खोज र नष्ट गर’ अभियान देशभर सञ्चालन गरिरहेको छ ।

१० वटा जिल्ला धेरै प्रभावित

अहिले देशका १० वटा जिल्ला सबैभन्दा धेरै प्रभावित भएको महाशाखाको तथ्याङ्कले देखाएको छ । महाशाखाका अनुसार सुनसरीमा सबैभन्दा धेरै २ हजार ७३७, धादिङमा ४८३, कास्कीमा २०८, दार्चुलामा १९०, काठमाडौंमा ८८, संखुवासभामा ७५, म्याग्दीमा ५४, कञ्चनपुरमा ५२, रुपन्देहीमा ४५ र झापामा ४२ जनामा संक्रमण देखिएको छ ।

डेंगीको संक्रमण भएमा टाउको दुख्ने, आँखाको गेडी तथा आँखाको पछिल्लो भाग दुख्ने, ढाड, जोर्नी तथा मांसपेशी दुख्ने, शरीरमा बिमिरा आउने, वाकवाकी लाग्ने, पेट दुख्नेजस्ता लक्षणहरू देखा पर्ने गर्छन् । तर, कतिपय व्यक्तिमा भने नाक वा गिजाबाट रगत बग्ने, शरीरमा रक्तश्राव हुने, बेहोस हुने पनि हुन सक्छ । यस्तो अवस्थामा बिरामीलाई जतिसक्यो चाँडो अस्पताल पुर्‍याउनुपर्ने चिकित्सकहरूको सुझाव छ ।

सम्बन्धित समाचार

प्रकाशित मिति: शुक्रबार, साउन १२, २०८० १९:१४