प्रत्यक्ष प्रसारणले 'भद्र' कांग्रेस बैठक

A+ A A-

एक वर्षपछि बस्न लागेको कांग्रेस केन्द्रीय कार्यसमिति बैठकमा गर्मागर्मी छलफल हुने अनुमानविपरीत बैठकको बुधबार दोस्रो दिनको अवस्था हेर्दा त्यस्तै गर्मागर्मी देखिएन । बरु शालीन र भद्र देखियो । किन पनि बहस गर्मागर्मी हुने अनुमान थियो भने बैठकअघि एजेन्डाकै विषयमा नेताहरूले सार्वजिनक रूपमा चर्को बोलिरहेका थिए । महामन्त्री गगन थापाले त पार्टी सभापति शेरबहादुर देउवालाई संसदीय दलको नेताबाट विस्थापित गर्ने पटकपटक बोलिरहेका थिए । एक वर्षसम्म बैठक नबोलाएको भन्दै देउवाको आलोचना गरिरहेका थिए । तर, दुई दिनको बैठकमा त्यसको कुनै छाया देखिएन ।

सदस्यहरू नेतृत्वप्रति कडा रूपमा प्रस्तुत हुने र नेतृत्वले पनि तत्कालै जवाफ फर्काउने गरिन्थ्यो यसअघिका बैठकमा । तर, मंगलबारदेखि सुरु भएको यसपटकको कांग्रेस केन्द्रीय समिति बैठक भने भद्र देखिएको छ ।

हरेक वक्तालाई ७ मिनेटको समय दिइएको छ । एक वर्षपछि भएको बैठकमा चुनावी समीक्षा, सदन र सरकारमा कांग्रेसको प्रस्तुति, नक्कली भुटानी शरणार्थी प्रकरणमा पुर्पक्षका लागि थुनामा रहेका नेता बालकृष्ण खाँणको विषय, विधानको पालनाको विषयमा कुरा उठिरहेको छ ।

बैठक नेपाली कांग्रेसको आधिकारिक फेसबुक पेजबाट प्रत्यक्ष प्रसारण भइरहेको छ । प्रत्यक्ष प्रसारण भएकाले केन्द्रीय सदस्यहरू शालिन रूपमा प्रस्तुत भएको बताइन्छ ।

पहिले हुन्थ्यो नोकझोँक

२०७९ असार २९ गतेको बैठकमा केन्द्रीय सदस्य सञ्जयकुमार गौतमले गठबन्धन गर्दा पार्टीले हार्ने भयो भनेपछि सभापति शेरबहादुर देउवा आक्रोशित भएका थिए ।

आफूलाई बारम्बार जिस्क्याउने हो भने पार्टी विधान संशोधन गरेर भए पनि तेस्रो कार्यकाल सभापति भइदिने चेतावनी पनि देउवाले नेताहरूलाई दिएका थिए । 'मलाई नजिस्क्याउनुस्, विधान संशोधन गरेर भए पनि तेस्रोपल्ट सभापति हुन सक्छु,’ देउवाको भनाइ उद्धृत गर्दै एक जना नेताले भनेका थिए, 'होटलहोटलमा गएर बैठक नगर्नू, अब मलाई पार्टी सभापति हुने रहर छैन । जिस्क्याउनुहुन्छ भने म विधान संशोधन गरेर भए पनि सभापति हुन्छु । मलाई अब नपेल्नुस्, म फेरि सभापति हुने दौडमा छैन ।’

त्यस्तै, असार ३० गतेको बैठकमा केन्द्रीय सदस्य बलबहादुर केसीले कांग्रेस असनमा छाडेको साँढेजस्तो भएको बताएका थिए । ‘अहिले गठबन्धनका कारण सत्ता पाए पनि पार्टी कमजोर भएको छ । सभापतिले बलियो छ भन्दैमा म मान्दिनँ । गाउँगाउँमा गठबन्धनका कारण पार्टी अनुशासनभन्दा बाहिर गएको छ,’ उनले भनेका थिए, ‘नेपाली कांग्रेसको हालत असनमा साँढे छोडेजस्तो भएको छ । यो बैठकमा हप्काएजस्तो गाउँमा स्थिति छैन ।’

तर, योपटक जारी बैठकमा झनक्क रिसाउने स्वभावका सभापति देउवा कम बोलिरहेका छन् । योपटक उनी ‘सबैले बोल्न पाउनुहुन्छ’, ‘समय सकियो भन्या ...’ लगायतका छोटा वाक्य बोलिरहेका छन् । अप्ठेरो परेको ठाउँमा सभापतिलाई उपसभापति पूर्णबहादुर खड्काले सहजीकरण गरिरहेका छन् । बोल्नका लागि प्रत्येक सदस्यलाई सात मिनेटको समय दिइएको छ । समय सकिएपछि जनाउ घण्टी बज्ने गरेको छ ।

प्रत्यक्ष प्रसारणले बैठक भद्र बनेको केन्द्रीय सदस्य गुरु बराल बताउँछन् । ‘नेताहरूमा संयमता बढाएको छ । भद्रता देखिन्छ । सार्वजनिक खपतका लागि बाहिर अर्को कुरा बोल्नेलाई गाह्रो भएको छ,’ उनले शिलापत्रसँग भने । उनै बरालले बैठकमा भने आज आफ्नो कुरा रेकर्डमा राख्न र फेसबुकमा लाइभ नगर्न भनेका थिए ।

दोस्रो दिनका मुख्य घटना

दोस्रो दिनमा प्रदेश सभापतिहरूले अधिकारको कुरा उठाए । उनीहरूले जिम्मेवारी नदिने प्रदेश संरचना खारेज गर्नुपर्ने आवाज पनि उठाए ।

कांग्रेसको प्रदेश संरचनाः केन्द्रले समन्वय नै गर्दैन, प्रदेश सभापतिहरू न तल न माथि

दुई जना प्रदेश सभापतिले आफूविरुद्ध गठबन्धन र पार्टीबाट बागी बनेर चुनाव जित्नेलाई जिम्मेवारी दिन लागेकोमा असन्तुष्टि व्यक्त गरे । कांग्रेसको जारी केन्द्रीय समति बैठकमा लुम्बिनी प्रदेश सभापति अमरसिंह पुनले प्रदेशमन्त्रीका लागि सिफारिस भएका रोल्पाका दीपेन्द्र पुनका विषयमा असन्तुष्टि जनाए । गठबन्धनबाट विद्रोह गरेका पुनले चुनावमा सभापति पुनलाई हराएका थिए । दीपेन्द्रलाई माओवादी संसदीय दलले मन्त्रीका लागि सिफारिस गरेपछि कांग्रेसले विरोध गरिरहेको छ ।

कांग्रेस केन्द्रीय समिति बैठकमा दुई प्रदेश सभापतिका पीडा

‘रोल्पामा मेरो उम्मेदवारीविरुद्ध उम्मेदार भएका व्यक्तिलाई अहिले उही गठबन्धनले कसरी सम्मान दिने, म देशव्यापी गठबन्धनको साझा उम्मेदार बनेको थिएँ, उही गठबन्धनको अहिले प्रदेश र संघमा सरकार छ, अनि त्यही गठबन्धनविरुद्ध लाग्नेलाई कसरी हामीले समर्थन गरेर अगाडि बढ्ने ? यो विषयमा प्रस्ट हुन जरुरी छ, हामीलाई त्यो स्वीकार्य हुँदैन,’ पुनले भने ।

त्यस्तै, पार्टीकै बागीसँग चुनाव हारेका कर्णाली प्रदेशका सभापति ललितजंग शाहीले पनि बैठकमा विधानविपरीत कारबाही फुकुवा गरिएको बताए ।

उनले स्थानीय, प्रदेश र संघीय चुनावको समीक्षा पार्टीले नगरेको बताए । ‘मैले यो बैठकलाई चुनावी समीक्षाकै निरन्तरताका रूपमा लिएको छु,’ उनले भने ।

विधानविपरीत अनुशासन समितिले कारबाही फुकुवा गरिदिएको उनको भनाइ छ । ‘बागी उम्मेदवारी दिएपछि विधानअनुसार स्वतः कांग्रेस सदस्यता खारेज भएकाहरूलाई अनुशासन समितिका संयोजक आनन्द ढुंगानाको एकल निर्णयले फुकुवा हुन सक्छ ?,’ सभापति देउवा र महामन्त्रीद्वय गगन थापा र विश्वप्रकाश शर्मालाई ध्यानाकर्षण गराउँदै उनले भने, ‘अनुशासन समितिले विधानविपरीत काम गर्न सक्दैन ।’

उनी जुम्ला प्रदेश (क) मा बागी उम्मेदवार देवेन्द्रबहादुर शाहीसँग पराजित भएका थिए । कांग्रेसले असार दोस्रो साता देवेन्द्रको कारबाही फुकुवा गरेको थियो । त्यसपछि शाही असन्तुष्ट छन् ।

कांग्रेसको विधानमा पार्टीका तर्फबाट विद्रोही भएका उम्मेदवार, उनका प्रस्तावक र समर्थकको साधारण सदस्य नरहने उल्लेख छ ।

खाँणको बचाउ

नक्कली भुटानी शरणार्थी प्रकरणमा पुर्पक्षका लागि थुनामा रहेका नेता बालकृष्ण खाँणको बचाउमा केन्द्रीय सदस्यले धारणा राखेका छन् ।

कांग्रेस बैठकमा घलेको प्रश्न– आफ्नै पार्टीका नेतालाई जेल हाल्दा गृहमन्त्रीलाई बधाई दिन मिल्छ ?

बैठकमा बोल्दै केन्द्रीय सदस्य राधा घलेले आफ्नो साथी तथा पार्टीको नेता पक्राउ पर्दा पार्टी नेतृत्व संवेदनशील भएर बचाउमा उत्रनुपर्नेमा उल्टो गृहमन्त्रीलाई भेटेर बधाई दिनु कति उपयुक्त हो भन्दै प्रश्न गरिन् ।

‘आज एउटा नेतालाई, साथीलाई बिनाकारण समातेर लग्दै गर्दा आफ्नै पार्टीका साथीहरू संवेदनशील नहुनु, गृहमन्त्रीलाई बधाई दिन जानु कति उपयुक्त हुन्छ ?,’ उनले प्रश्न गरिन् ।

घलेले आफ्नो नेताको बचाउमा उत्रेर साथ दिनुपर्नेमा पार्टीका नेताहरू विरोधमा उत्रिएको भन्दै गुनासो गरिन् । ‘एउटा साथीलाई दुःख पर्दा काँध हाल्न सक्दैनौँ । आरोप लाग्दैमा कोही पनि दोषी हुँदैन,’ उनले भनिन्, ‘जबसम्म दोषी सावित हुँदैन, कमसेकम एउटालाई पर्दा हामीभित्रैका साथीहरूले साथ दिँदैनौँ भने एउटालाई खाने बाघले अरुलाई पनि खान्छ ।’

महामन्त्रीलाई चेतावनी

केन्द्रीय सदस्य लक्ष्मी खतिवडाले महामन्त्रीद्वय गगन थापा र विश्वप्रकाश शर्माको विकल्प खोज्न सकिने बताएकी छन् । उनलले महामन्त्रीद्वयलाई दायरा फराकिलो बनाउन आग्रह गरिन् ।

गगन र विश्वप्रकाशलाई खतिवडाको कटाक्ष- विकल्प खोज्छौँ भन्नुहुन्छ, तपाईंहरूको विकल्प खोज्ने दिन नआओस् (भिडियो)

‘दुई जना नै महामन्त्रीलाई विनम्रतापूर्वक आग्रह छ, कांग्रेस बलियो बनाउन कांग्रेसलाई एक ढिक्का बनाएर सही रोडम्याममा लैजाने उद्देश्यका साथ तपाईंहरू हामी सबैको नेतृत्व लिने गरी अगाडि बढ्नुहोला,’ बैठकमा उनले भनिन्, ‘तपाईंहरूले दायरा फराकिलो बनाउनुभएन भने जसरी तपाईंहरू अरु कसैको विकल्प खोज्छौँ भन्दै हुनुहुन्छ, तपाईंहरूको विकल्प पनि हामीहरूले खोज्ने दिन नआओस् ।’ उनले सबै दोष सभापतिलाई लगाएर उन्मुक्ति नपाइनेसमेत बताइन् ।

महामन्त्री थापाले संसदीय दलको नेताको विकल्प खोजिने बताउँदै आएका छन् ।

बुधबारको बैठकमा केन्द्रीय सदस्यहरू जीवनबहादुर शाही, कृष्णचन्द्र नेपाली पोखरेल, केशवकुमार वुढाथोकी, देवेन्द्रराज कँडेल, बहादुर सिंह (लामा) तामाङ, नारायणबहादुर कार्की, मानबहादुर नेपाली, नैनसिंह महर, गोविन्दबहादुर शाह, डा. रणबहादुर रावल, दिलमान पाख्रिन, रामहरि खतिवडा, सरस्वती अर्याल तिवारी, गुरु बराल, कुन्दनराज काफ्ले, जावेदा खातुन जागा, हरिशरण नेपाली, जानकी सिंह, सुशीला भट्ट मिश्र, नागिना यादव, नानु बाँस्तोला, मदनकृष्ण श्रेष्ठ, नृपबहादुर बड, कान्तिका सैजुवाल, सुशीला थिङ, सीताकुमारी राना, सुशीला ढकाल (आचार्य), गणेश लामा, रुपा विक, विद्यादेवी तिमिल्सिना, शान्ति परियार विक, जीवन राना, राधा घले, रुक्मिणी कोइराला, उर्मिला थपलिया, कल्याणी रिजाल, गोमाकुमारी भट्टराई, लक्ष्मी खतिवडा, गंगा शाही र सीतादेवी देवकोटा, आमन्त्रित प्रदेश सभापतिहरू— कृष्णप्रसाद यादव (मधेश प्रदेश), इन्द्रबहादुर वानिया (बागमती प्रदेश), शुक्रराज शर्मा (गण्डकी प्रदेश), अमरसिंह पुन (लुम्बिनी प्रदेश), ललितजंग शाही (कर्णाली प्रदेश) र वीरबहादुर बलायर (सुदुरपश्चिम प्रदेश) गरी ४६ जनाले आ–आफ्नो धारणा राखे ।

प्रकाशित मिति: बुधबार, साउन ३, २०८० २०:३०