कांग्रेस केन्द्रीय समिति बैठकमा दुई प्रदेश सभापतिका पीडा

A+ A A-

कांग्रेसको जारी केन्द्रीय समति बैठकमा लुम्बिनी प्रदेश सभापति अमरसिंह पुनले प्रदेशसभाको लागि सिफारिस भएका रोल्पाका दीपेन्द्र पुनका विषयमा असनतुष्टि जनाए । गठबन्धनबाट विद्रोह गरेका पुनले चुनावमा सभापति पुनलाई हराएका थिए । दीपेन्द्रलाई माओवादी संसदीय दलले मन्त्रीका लागि सिफारिस गरेपछि कांग्रेसले विरोध गरिरहेको छ ।

‘रोल्पामा मेरो उम्मेदवारीविरुद्ध उम्मेदार भएका व्यक्तिलाई अहिले उही गठबन्धनले कसरी सम्मान दिने, म देशव्यापी गठबन्धनको साझा उम्मेदार बनेको थिएँ, उही गठबन्धनको अहिले प्रदेश र संघमा सरकार छ, अनि त्यही गठबन्धनविरुद्ध लाग्नेलाई कसरी हामीले समर्थन गरेर अगाडि बढ्ने ? यो विषयमा प्रष्ट हुन जरुरी छ, हामीलाई त्यो स्वीकार्य हुँदैन,’ पुनले भने ।

त्यस्तै पार्टीकै बागीसँग चुनाव हारेका कर्णाली प्रदेशका सभापति ललितजंग शाहीले पनि बैठकमा विधान विपरित कारबाही फुकुवा गरिएको बताए ।

उनले स्थानीय, प्रदेश र संघीय चुनावको समीक्षा पार्टीले नगरेको बताए । ‘मैले यो बैठकलाई चुनावी समीक्षाकै निरन्तरताका रूपमा लिएको छु,’ उनले भने ।

विधानविपरीत अनुशासन समितिले कारबाही फुकुवा गरिदिएको उनको भनाइ छ । ‘बागी उम्मेदवारी दिएपछि विधानअनुसार स्वतः कांग्रेस सदस्यता खारेज भएकाहरूलाई अनुशासन समितिका सभापति आनन्द ढुंगानाको एकल निर्णयले फुकुवा हुन सक्छ ?’ सभापति देउवा र महामन्त्रीद्वय गगन थापा र विश्वप्रकाश शर्मालाई ध्यानाकर्षण गराउँदै उनले भने, ‘अनुशासन समितिले विधानविपरीत काम गर्न सक्दैन ।’

सभापति शाही जुम्ला प्रदेश (क) मा बागी उम्मेदवार देवेन्द्र बहादुर शाहीसँग पराजित भएका थिए । कांग्रेसले असार दोस्रो साता देवेन्द्रको कारबाही फुकुवा गरेको थियो । त्यसपछि शाही असन्तुष्ट छन् ।

कांग्रेसको विधानमा पार्टीका तर्फबाट विद्रोही भएका उम्मेदवार, उनका प्रस्तावक र समर्थकको साधारण सदस्य नरहने उल्लेख छ ।

प्रकाशित मिति: बुधबार, साउन ३, २०८० १९:१०