अमेरिकी विदेश सहायकमन्त्री लुको भ्रमणलगत्तै नेपाल आउँदै छ चिनियाँ टोली

सीपीसीका पोलिटब्युरो सदस्य युआन जुयान ।

A+ A A-

अमेरिकी विदेश सहायकमन्त्री डोनाल्ड लु नेपाल भ्रमणबाट फर्केपछि उच्चस्तरीय चिनियाँ प्रतिनिधि नेपाल भ्रमणमा आउन लागेका छन् ।

लुको नेपाल भ्रमण सकिएको अर्को साता चिनियाँ प्रतिनिधिमण्डल काठमाडौं आउन लागेको हो । अमेरिकी सहायता परियोजना (एमसीसी) को प्रगति विवरण बुझ्न नेपाल आउन लागेका लुको भ्रमणलाई राजनीतिक सन्देशका रूपमा पनि विश्लेषण भइरहेको छ । लुको नेपाल भ्रमण यसै साता हुने बताइएको छ ।

केही घण्टाका लागि नेपाल आउन लागेका लुको भ्रमण सार्वजनिक भएपछि चिनियाँ कम्युनिस्ट पार्टीको उच्चस्तरीय भ्रमण हुन लागेको हो । चिनियाँ कम्युनिस्ट पार्टी (सीपीसी) का पोलिटब्युरो सदस्य युआन जुयान ७ साउनमा नेपाल भ्रमणमा आउँदै छन् । उनी जोङ्किङ शहरको प्रतिनिधिमण्डलको नेतृत्व गरेर आउन लागेका हुन् ।

नेपाल भ्रमणका क्रममा चिनियाँ प्रतिनिधिमण्डलले उच्चस्तरीय राजनीतिक भेटघाट गर्ने कार्यक्रम छ । साथै, नेपाल र चीनको विकास साझेदारीका विषयमा पनि छलफल गर्ने कार्यक्रम छ । उनको भ्रमणको तयारीका लागि अहिले चिनियाँ टोली काठमाडौंमा छ । विभिन्न सरोकारवालासँग छलफल गरिरहेको यो टोलीपछि युआन नेतृत्वको टोली काठमाडौं ओर्लिन लागेको हो ।

प्रधानमन्त्री पुष्पकमल दाहाल प्रचण्डको चीनको भ्रमणको पूर्वसन्ध्यामा युआनको भ्रमण हुन लागेको छ । त्यसैले पनि यो प्रतिनिधिमण्डलको भ्रमणलाई अर्थपूर्ण रूपमा हेरिएको छ । पछिल्ला दिनमा अमेरिकी र चिनियाँ प्रतिनिधिहरूको नेपाल भ्रमण निकै बाक्लो भएको छ । चिनियाँ प्रतिनिधिमण्डल काठमाडौंबाट फर्केपछि अमेरिकी सहायता परियोजना (एमसीसी) का प्रमुख कार्यकारी अधिकृत एलिस बी अलब्राइट काठमाडौं आउने कार्यक्रम छ ।