पोखरा महानगरका स्वास्थ्य महाशाखा प्रमुखले फालिदिए कम्प्युटर, कर्मचारीको हातखुट्टा भाँचिदिने धम्की

पोखरा महानगरका स्वास्थ्य महाशाखा प्रमुखले फालिदिए कम्प्युटर, कर्मचारीको हातखुट्टा भाँचिदिने धम्की

A+ A A-

मंगलबार पोखरा महानगरपालिकामा बबण्डर मच्चिएको छ । महानगरपालिकाको स्वास्थ्य महाशाखा प्रमुख कृष्णप्रसाद अर्यालले लेखा अधिकृतमाथि आक्रोश पोख्दा स्थिति तनावग्रस्त बनेको एक कर्मचारीले जानकारी दिए । उनका अनुसार अर्यालले हतखुट्टा भाँचिदिने सम्मको धम्की दिए ।

आफूले नियुक्ति दिएका कर्मचारीलाई लेखा अधिकृतले तलब भुक्तानी नदिएपछि अर्याल आक्रोशित बनेको कर्मचारी बताउँछन् । सोही क्रममा अर्यालले मंगलबार कार्यालयको कम्प्युटर तोडफोड गरेर लेखा अधिकृत श्याम पराजुलीलाई धम्क्याएको एक कर्मचारीले जानकारी दिए ।

तलब नपाउनेमा महाशाखा प्रमुख अर्यालका छोरा सन्देशसहित डाक्टर, ल्याब असिस्टेन्ट र कार्यालय सहयोगी गरेर आठ जना छन् । उनीहरूको नियुक्ति नै गैरकानुनी रहेको भन्दै लेखा अधिकृत पराजुलीले तलब खुवाउन इन्कार गरेका छन् ।

कानुनविपरीतको नियुक्ति भएको भन्दै लेखा शाखाले गत फागुनदेखि उनीहरूको तलब रोकिदिएको छ । त्यसैको रिस प्रमुख अर्यालले मंगलबार लेखा अधिकृत पराजुलीले प्रयोग गर्ने कम्प्युटर फालेर पोखेको महाशाखाका एक कर्मचारीले बताए ।

‘हाकिम सा’बले डेक्स्टप फाल्दिनुभयो । त्यसपछि त्यहाँ हात–खुट्टा भाँचिदिने कुरा पनि आयो,’ एक कर्मचारीले भने, ‘महाशाखाबाट निस्केर जानसम्म भन्ने कुरा भयो ।’

गैरकानुनी नियुक्ति भएका करार र ज्यालादारीका कर्मचारीको गरेर करिब पाँच लाख रुपैयाँ भुक्तानी रोकिएको महाशाखाका कर्मचारीको भनाइ छ । लेखा शाखाले महानगर कार्यपालिकाको निर्णय नभएको र तोकको आधारमा नियुक्ति भएकालाई संघ र प्रदेश सरकारको कानुनले तलब भुक्तानी गर्न नमिल्ने भन्दै तलब दिन मानेको छैन ।

आफू फस्न सक्ने र पछि महालेखाको प्रतिवेदनले बेरुजु देखाउने भएकाले लेखा शाखाले रकम निकासा दिएको छैन । यही विषयमा विवाद हुँदा महाशाखा प्रमुख अर्यालले मंगलबार आक्रोशित बनेर ‘बल प्रदर्शन’मा उत्रिएको कर्मचारी बताउँछन् ।

लेखा प्रमुख पराजुली आफ्नै कार्यकक्षमा बसिरहेका बेला दिउँसो एक्कासि महाशाखा प्रमुख अर्यालले डेक्स्टप भुइँमा फालिदएका थिए । त्यसपछि भनाभन सुरु भएको थियो । कर्मचारीहरूका अनुसार महाशाखा प्रमुख र लेखा अधिकृतबीच भएको भनाभन यस्तो थियोः

लेखा अधिकृत पराजुली – तिम्रा बा’को सम्पत्ति फालेको हो ?

प्रमुख अर्याल – भुक्तानी किन भएन ?

अधिकृत पराजुली – नियुक्ति प्रक्रिया अवैधानिक हो । कार्यपालिकाको निर्णय नभई तलब खुवाउँदिनँ । निर्णय ल्याउनुभयो मैले केही भन्नु छैन । म यसमा फस्दिनँ ।

प्रमुख अर्याल – निस्किहाल कार्यालयबाट । नभए हात–खुट्टा भाँच्दिन्छु । चुट्न परेको ?

अधिकृत पराजुली – तिम्ले नियुक्ति गरेको हो र म जा भन्दैमा जाने ? मसँग हात चलाउने होइन । स्पष्टीकरण सोधे जवाफ दिन्छु ।

भनाभन भएपछि महाशाखा प्रमुख अर्याल लेखा शाखाबाट निस्किएका थिए । त्यसपछि अधिकृत पराजुलीले आफ्नो कार्यकक्षमा ताला लगाएर निस्किए । उनले घटनाको छानबिन गरेर कारबाही गर्न माग गर्दै प्रमुख प्रशासकीय अधिकृत वीरेन्द्रदेव भारतीलाई मंगलबार नै निवेदन दिएका छन् ।

अभद्र व्यवहार भएको, तनावपूर्ण वातावरण सिर्जना भएकाले महाशाखा प्रमुखलाई कारबाही माग गर्दै आफूले निवेदन दिएको लेखा अधिकृत पराजुलीले बताए । उनले आन्तरिक विषय भएकाले यसबारे थप नबोल्ने बताए । घटनाबारे बुझ्न पटकपटक फोन गर्दा, म्यासेज गर्दा महाशाखा प्रमुख अर्याल सम्पर्कमा आउन चाहेनन् ।

डराउँछन् कर्मचारी

महानगरको स्वास्थ्य महाशाखामा गैरकानुनी नियुक्ति खाएकाको तलब दिन मिल्दैन भनेको भरमै तनावपूर्ण स्थिति बनेको भन्दै कर्मचारी तर्सिएका छन् । ‘अब यो कार्यालयमा बक्सिङ सिकेकाहरू आउनुपर्ने भयो,’ मंगलबार एक जना कर्मचारीले भने ।

पोखरा महानगरपालिकाका स्वास्थ्य महाशाखा प्रमुखले पदको शक्ति प्रयोग गरेर छोरालाई जागिर खुवाउन करारमा एउटा पद नै सिर्जना गरेको आरोप छ । महानगरपालिकाले गत वैशाख ११ गते १४ पदमा ४७ जना भर्ना गर्न सूचना निकालेकोमा एक जना पाँचौँ तहको कम्प्युटर अपरेटर मागेको थियो । त्यसमा पूर्वयोजनाअनुसार नै स्वास्थ्य महाशाखा प्रमुख अर्यालका छोराले आवेदन दिएको एक कर्मचारीले बताए ।

सम्बन्धित समाचार

नीतिगत बठ्याइँ: स्वास्थ्यका हाकिमका छोरालाई जागिर खुवाउन पद सिर्जना

गैरकानुनी भर्ना गर्न लागिएको विषय सार्वजनिक भएपछि त्यो विज्ञापनमा आएका आवेदनबारे के गर्ने अझै अन्यौल छ । महानगरका कर्मचारीले बताएअनुसार आर्थिक वर्ष सकिएपछि त्यो विज्ञापन स्वतः खारेज हुन्छ र आवेदन दिएकालाई पैसा फिर्ता दिनुपर्छ ।

अर्यालका छोरा सन्देश हाल स्वास्थ्य महाशाखाकै राजस्व संकलन फाँटमा कार्यरत छन् । उनलाई करारमा नियुक्त गर्न अनुकूल योग्यता राखेर, एक जना मात्रै माग गरेर महाशाखा प्रमुखले नीतिगत बठ्याइँ गरेको ती कर्मचारीले बताए । कम्प्युटर अपरेटरमा दरखास्त दिन प्रमाणपत्र तह उत्तीर्ण गरेको र कम्प्युटरमा डिप्लोमा गरेको हुनुपर्ने योग्यता छ ।

महाशाखाको राजस्व संकलनमा काम गरिरहेका कर्मचारीलाई शिशुवा अस्पताल सरुवा गराएर महाशाखा प्रमुखले आफ्नो छोरालाई ज्यालादारीमा राखेका थिए । त्यसपछि त्यहाँ पद खाली भएको प्रमुख प्रशासकीय अधिकृतलाई देखाएर छोरालाई नै योग्यता मिल्ने गरी यो पदमा विज्ञापन खोलिएको थियो ।

स्थानीय सरकार सञ्चालन ऐन, २०७४ र गण्डकी सरकारले बनाएको स्थानीय सेवाको गठन, सञ्चालन तथा सेवाको सर्त सम्बन्धमा व्यवस्था गर्न बनेको ऐन, २०७९ अनुसार करारमा कर्मचारी भर्ना गर्न मिल्दैन । उपल्लो सरकारले बनाएको कानुनअनुसार करारमा कर्मचारी भर्ना गर्नै नपाइने भएपछि धनराज आचार्य मेयर भएर आएको एक महिनापछि गत असार २४ गते महानगरपालिकाले सेवा करारमा प्राविधिक कर्मचारी व्यवस्थापनसम्बन्धी कार्यविधि, २०७९ स्थानीय राजपत्रमा प्रकाशन गरेको थियो ।

महानगरपालिकाका प्रमुख प्रशासकीय अधिकृत वीरेन्द्रदेव भारतीले ज्यालादारीमा काम गरिरहेका स्वास्थ्य महाशाखा प्रमुखका छोरालाई काम नगराउन जेठ २ गते नै निर्देशन दिएका थिए । निर्देशन अटेर गर्दै उनले आफ्ना छोरालाई अझै हटाएका छैनन् ।

प्रकाशित मिति: मंगलबार, असार २६, २०८० २१:३२