गुण्डाराज अन्त्य गर्ने अभियानमा उत्तर प्रदेशका मुख्यमन्त्री आदित्यनाथ (भिडियो)

गुण्डाराज अन्त्य गर्ने अभियानमा उत्तर प्रदेशका मुख्यमन्त्री आदित्यनाथ (भिडियो)

A+ A A-

सन् २०१७ मा उत्तर प्रदेशको मुख्यमन्त्री बनेपछि भाजपाका नेता योगी आदित्यनाथ गुण्डाराज र माफियाविरुद्ध खरो रूपमै उत्रिएका छन् ।

उनले आफ्नो राज्यमा गुण्डा र फटाहालाई स्थान नहुने बताउँदै उनीहरूविरुद्ध विशेष अभियान नै चलाएका छन् जसले गुण्डा र माफियाहरू यतिबेला उनीदेखि ज्यादै डराउँछन् ।

गत अप्रिलको तथ्यांकअनुसार आदित्यनाथ उत्तर प्रदेशको मुख्यमन्त्री बनेयता १८३ गुण्डाहरू प्रहरीसँगको मुठभेडमा मारिएका छन् । सो अवधिमा २३ हजार ३ सय गुण्डालाई आदित्यनाथ सरकार गिरफ्तार गर्न पनि सफल भएको छ ।

साथै, गुण्डा र माफियाहरूबाट त्यहाँको सरकारले अर्बौंको सम्पत्ति पनि जफत गरेका छन् । केन्द्रीय सरकारको प्रधानमन्त्री आवास योजनालाई टेवा पुग्ने गरी ती अवैध जग्गा जमिन र पैसा गरिबका लागि घर बनाउन प्रयोग गरिएको छ ।

गतहप्ताको शुक्रबार मात्र मुख्यमन्त्री योगी आदित्यनाथले एउटा ठूलो अपार्टमेन्ट भवनको उद्घाटन गरे । गुण्डा नाइके तथा पूर्व सांसद अतिक अहमदबाट जफत गरिएको अवैध जमिनमा उत्तर प्रदेश सरकारले आवसीय भवन निर्माण गरिदिएको हो ।

प्रयागराजमा आयोजित कार्यक्रममा आदित्यनाथले भवनका ७६ वटा फ्ल्याट गरिब जनतालाई बाँडिदिए । यसरी धेरै गुण्डा र फटाहाबाट जफत गरिएको सम्पत्तिबाट गरिबहरूलाई घर बनाउने अभियान त्यहाँ चलाइएको छ ।

अतिक अहमद ती व्यक्ति हुन् जसको गत अप्रिल १५ मा मात्र प्रहरीकै अगाडि गोली हानी हत्या भएको थियो । अतिक अहमद उत्तर प्रदेशको प्रयागराजबाट सन् २००४ देखि सन् २००९ सम्म समाजवादी पार्टीको तर्फबाट लोकसभाको सांसद बनेका थिए ।

राजनीतिमा प्रवेश गर्नुअगाडि र राजनीतिमै हुँदा पनि उनी गुण्डागर्दी, अपहरण र हत्याजस्ता गतिविधिमा संलग्न थिए । उनीमाथि हत्या र अपहरणको मुद्दाहरू दर्ता भएका थिए ।

सन् २००७ मा अतिक अहमद समाजवादी पार्टीका सांसद छँदै आदित्यनाथले गुण्डाराजविरुद्ध आन्दोलन गर्दा उनलाई तत्कालीन समाजवादी पार्टीको सरकारले ११ दिनसम्म गिरफ्तार गरेर हिरासतमा लिएको थियो । उनलाई प्रहरीले प्रताडित गरेको आदित्यनाथले संसदमा रुँदै बताएका थिए । त्यसबेलादेखि नै उनले सो राज्यमा गुण्डाराज खतम गर्ने वाचा गरेका थिए । हिन्दुस्तान टाइम्स र एजेन्सीको सहयोगमा

(भिडियो)

प्रकाशित मिति: सोमबार, असार १८, २०८० १५:२६