ललितानिवास प्रकरण: सीआईबीलाई १८ दिनभित्रै अनुसन्धान सक्नुपर्ने चुनौती, किन पक्राउ परेनन् अन्य आरोपी ?

ललितानिवास प्रकरण: सीआईबीलाई १८ दिनभित्रै अनुसन्धान सक्नुपर्ने चुनौती, किन पक्राउ परेनन् अन्य आरोपी ?

A+ A A-

प्रहरीको केन्द्रीय अनुसन्धान ब्युरो (सीआईबी) ले ललितानिवासको जग्गा हिनामिना प्रकरणमा मुछिएका सात जना आरोपीलाई गत मंगलबार पक्राउ गर्‍यो ।

जग्गा हिनामिना प्रकरणमा मुछिएका निर्वाचन आयोगका पूर्वआयुक्त सुधीर शाह, व्यवसायी मीनबहादुर गुरुङ, डिल्लीबजार मालपोतका प्रमुख कलाधर देउजा, मालपोतका कर्मचारी सुरेन्द्रमान कपाली, हुपेन्द्रमणि केसी, तत्कालीन खरिदार गोपाल कार्की र मालपोतका तत्कालीन शाखा अधिकृत धर्मप्रसाद गौतमलाई सीआईबीले पक्राउ गरेको थियो । यीमध्ये देउजा, कपाली र केसीलाई सर्वोच्च अदालतको ‘स्टे अर्डरका’ कारण प्रहरीले पक्राउ परेकै दिन छोडेको थियो ।

लामो समयदेखि रोकिएको ललितानिवास प्रकरणको फेरि सीआईबीले अनुसन्धान थालेको हो । प्रहरीले सरकारी लिखत किर्ते मुद्दामा अनुसन्धान अघि बढाएको छ । ललितानिवासको जग्गा हिनामिना प्रकरणमा सीआईबीले ४ सय ६ जनालाई थुनामा राखेर अनुसन्धान गर्न अदालतबाट पक्राउ पुर्जी लिएको दाबी गरेको छ ।

तर, सीआईबीले गत मंगलबारपछि कसैलाई पक्राउ गर्न सकेको छैन । पक्राउ पुर्जी जारी भएकामध्ये हालसम्म १७ जनाले भने ‘स्टे अर्डर’ लिएको खुलेको छ । पक्राउ पुर्जी जारी भएकामध्ये अख्तियारका पूर्वप्रमुख आयुक्त दीप बस्न्यात, भूमि सुधार मन्त्रालयका पूर्वसचिवद्वय छविराज पन्त र दिनेशहरि अधिकारी हाल सम्कर्पविहीन भएका छन् ।

मंगलबार पूर्वआयुक्त शाह, व्यवसायी गुरुङसहितका आरोपी पक्राउ परेलगत्तै उनीहरू फरार भएका हुन् ।ललितानिवासको जग्गा व्यक्तिको नाममा नामसारी गर्ने मुख्य योजनाकार रामकुमार सुवेदी र उनकी पत्नी माधवी सुवेदीलाई भने प्रहरीले यसअघि नै पक्राउ गरेर छुटेका कारण फेरि सोही मुद्दामा पक्राउ गर्न मिल्दैन ।

सीआईबीका एसएसपी दिनेश आर्चायका अनुसार पक्राउ परेकामाथि बयान भइरहेको बताए । ‘पक्राउ परेकामाथिको अनुसन्धान जारी छ । अन्यको हकमा हामी आवश्यकता अनुसार काम गरिरहेका छौँ,' एसएसपी आर्चायले भने । सीआईबीले मंगलबार नै अधिकांश आरोपीहरूलाई पक्राउ गर्न खोजेको थियो । तर, गुरुङसहितका आरोपी पक्राउ परेको सूचना चुहिँदा अन्य केही पक्राउ गर्नैपर्ने आरोपी भागेको सीआईबीका एक अधिकारीले बताए ।

‘हामीले मीनबहादुर गुरुङसहितका केही आरोपीलाई पक्राउ गर्न २-३ दिनअघिदेखि नै गोप्य रूपमा टोली पठाएका थियौँ । सकेसम्म साझँपख पक्राउ गर्दा अधिकांश आरोपी पक्राउ गर्न सकिने हाम्रो योजना थियो । तर, गुरुङलाई काठमाडौं बाहिर रहेका कारण पक्राउ गर्न सकिएन । मंगलबार बिहान मात्रै उनी काठमाडौं फर्किए, त्यहीँ कारण बिहानै पक्राउ गर्नुपर्‍यो,’ ती अधिकारीले भने ।

सीआईबीका प्रमुख एआईजी किरण बज्राचार्यले ललितानिवासका आरोपी पक्राउबारे तीन जना डीएसपीलाई गोप्य निर्देशन दिएकी छिन् । किर्ते अनुसन्धान मुद्दामा प्रहरीले २४ दिन थुनामा राखेर अनुसन्धान गर्न मिल्ने कानुनी व्यवस्था छ । अब प्रहरीले ललितानिवास प्रकरणमा १८ दिनभित्र अनुसन्धान सकेर अनुसन्धान प्रतिवेदन सरकारी वकिलको कार्यालयमा पेस गरिसक्नु पर्नेछ । सीआईबी स्रोतका अनुसार अन्य आरोपी पक्राउ गर्न सीआबीईले अपरेसन नै चलाउने तयारी गरेको छ ।