सीआईबीले भन्यो- ललितानिवास प्रकरणमा हदम्याद लागू हुँदैन (भिडियो)

A+ A A-

बालुवाटारस्थित ललितानिवासको ११३ रोपनी सरकारी जग्गा व्यक्तिको नाममा कायम गर्ने क्रममा भएको कीर्तेमा हदम्याद नलाग्ने प्रहरीले दाबी गरेको छ ।

बुधबार प्रहरीको केन्द्रीय अनुसन्धान ब्युरो (सीआईबी) ले पत्रकार सम्मेलन गरी नयाँ मुलुकी ऐन जारी हुनुअघिकै अवस्थाको कानुनका आधारमा मुद्दा दायर हुने बताएको हो । पुरानो कानुनअनुसार मुद्दा चलाउँदा हदम्याद नलाग्ने प्रावधान रहेको प्रहरीको भनाइ छ ।

सीआईबी प्रमुख प्रहरी अतिरिक्त महानिरीक्षक (एआईजी) किरण बज्राचार्यले मुलुकी ऐन २०२० अनुसार सरकारी लिखित कीर्तेमा हदम्यादको व्यवस्था नभएकाले ललितानिवास प्रकरणमा हदम्याद लागू नहुने बताइन् । उनले यो प्रकरण नयाँ मुलुकी ऐन आउनुभन्दा अघिको भएकाले अहिलेको कानुन आकर्षित नहुने बताउँदै मुद्दा दर्ता नहुने भन्ने प्रश्न नै नआउने बताइन् ।

एआईजी बज्राचार्यले यो प्रकरणमा केही चलखेल हुन सक्ने भएकाले प्रहरीसँग जवाफ दिन यथेष्ठ प्रमाण रहेको बताइन् । ‘यो मुद्दा दर्ता नगर्ने प्रश्न नै आउँदैन । हामीले धेरै नै मेहनत गरेर प्रमाण जुटाएका छौँ । मुद्दा दर्ता हुन्छ र अनुसन्धान अघि बढाउँछौँ,’ उनले भनिन् ।

सीआईबीका एसएसपी दिनेश आचार्यले २०४७ पछिका चरणचरणमा ललितानिवासको १४३ रोपनी जग्गा हिनामिना भएको बताए । उनले राणालाई फिर्ता गरेको नाममा, नक्कली मोही खडा गरेर, गुठी खडा गरेर जग्गा हिनामिना गरिएको बताए ।

एसएसपी आचार्यले ललितानिवास जग्गा प्रकरणमा मीनबहादुर गुरुङ, तत्कालीन मालपोत अधिकृत धर्मप्रसाद गौतम, मालपोत कर्मचारी गोपाल कार्की र भक्तपुर मालपोतका तत्कालीन हाकिम सुधीर शाह पक्राउ परेको भन्दै अनुसन्धान जारी रहेको बताए ।

ललितानिवास प्रकरणमा अख्तियार दुरुपयोग अनुसन्धान आयोगले दायर गरेको मुद्दा अदालतमा विचाराधीन छ ।

प्रकाशित मिति: बुधबार, असार १३, २०८० १३:१७