ललितानिवासको जग्गा हिनामिना प्रकरण: सीआईबीले फेरि थाल्याे अपरेसन, को-को छन् पक्राउको सूचीमा ?

ललितानिवासको जग्गा हिनामिना प्रकरण: सीआईबीले फेरि थाल्याे अपरेसन, को-को छन् पक्राउको सूचीमा ?

फाइल तस्वीर ।

A+ A A-

प्रहरीको केन्द्रीय अनुसन्धान ब्युरो (सीआईबी) ले ललितानिवासको सरकारी जग्गा हिनामिना प्रकरणको अनुसन्धान फेरि सुरु गरेको छ ।

सीआईबीले मंगलबार ललितानिवासको जग्गा हिनामिना प्रकरणमा जोडिएका व्यक्तिलाई पक्राउ गर्न थालेको हो ।सीआईबीको टोलीले यही प्रकरणमा मुछिएका भाटभटेनी सुपरमार्केटका सञ्चालक मीनबहादुर गुरुङ र चार जना तत्कालीन डिल्लीबजार मालपोतका कर्मचारीलाई पक्राउ गरेको छ ।

पक्राउ पर्नेमा गुरुङसहित भुपेन्द्रमणि केसी, कलाधर देउजा, सुरेन्द्रमान कपाली र धर्मप्रसाद गौतम छन् । देउजा डिल्लीबजार मालपोत कार्यालयका पूर्वप्रमुख हुन् । जग्गा अनियमिततामा सुरुमा अख्तियारले अनुसन्धान थालेको थियो । अख्तियारले दायर गरेको भ्रष्टाचार मुद्दा विशेष अदालतमा विचाराधीन छ ।

प्रहरीलाईसमेत २०७५ मा मन्त्रिपरिषद्ले कीर्तेमा अनुसन्धान गर्न निर्देशन दिएको थियो । यसअघि सीआईबीले अनुसन्धान प्रतिवेदनसमेत जिल्ला सरकारी वकिल कार्यालय बुझाएको थियो । तर, सरकारी वकिल कार्यालयले पुन: अनुसन्धान गर्न निर्देशन दिँदै मुद्दा दायर नगरेपछि अनुसन्धान रोकिएको थियो । सोही अनुसन्धान फेरि सुरु गरिएको सीआईबीका प्रमुख एआईजी किरण बज्राचार्यले जानकारी दिए । सीआईबी स्रोतका अनुसार ललितानिवास प्रकरणमा करिब ४५ जनालाई पक्राउ गर्ने तयारी सीआईबीको छ ।

स्रोतका अनुसार ललितानिवासको १८ रोपनी सरकारी जग्गा सनराइज बैंकका पूर्वनिर्देशक कैलाशकुमार चन्द्र गोयलको परिवारसमेत जोडिएको छ । उनका परिवार सदस्यहरू श्रवण गोयल, सन्दीपकुमार सारडा र शिवरतन सारडालाई पनि प्रहरीले पक्राउ गर्ने तयारी गरेको छ । यीबाहेक राष्ट्रिय खेलकुद परिषद् (राखेप) का पूर्वउपाध्यक्ष पिताम्बर तिम्सिनामाथिसमेत अनुसन्धान गर्ने सीआईबीले जनाएको छ ।

यसअघि ललितानिवासको जग्गा एमाले उपाध्यक्ष विष्णु पौडेलका छोरा नवीन पौडेलको नाममा ८ आना रहेको खुलेको थियो । सो जग्गा फिर्ता गर्ने बाचा गरेपछि उनीमाथि अख्तियार दुरुपयोग अनुसन्धान आयोगले मुद्दा चलाएको थिएन ।

यो पनि पढ्नुस् :

ललितानिवासको जग्गा हिनामिना प्रकरण: भाटभटेनी सुपरमार्केटका सञ्चालक मीनबहादुर गुरुङ पक्राउ

प्रकाशित मिति: मंगलबार, असार १२, २०८० १३:५७