फलोअप: ककनी गाउँपालिकाले १८ वटा पालिकालाई भन्यो- मानव कंकालसहितको फोहोर फिर्ता पठाउँछौँ

फलोअप: ककनी गाउँपालिकाले १८ वटा पालिकालाई भन्यो- मानव कंकालसहितको फोहोर फिर्ता पठाउँछौँ

A+ A A-

काठमाडौंको फोहोर विसर्जनस्थल बञ्चरेडाँडाको ल्यान्डफिल साइटमा मानव कंकाल भेटिएपछि नुवाकोटको ककनी गाउँपालिकाले १८ वटा पालिकालाई पत्र लेख्दै कंकालसहितको फोहोर फिर्ता पठाउने बताएको छ ।

‘मानव कंकाल र अस्पतालको फोहोर ल्यान्डफिल साइटमा ल्याउन पाइँदैन । कंकालसहितको फोहोरका गाडी काठामाडौंमै फिर्ता पठाउँछौँ,’ शिलापत्रसँग ककनी गाउँपालिकाका अध्यक्ष सुमन तामाङले भने । उनका अनुसार थप अनुसन्धान गर्न जिल्ला प्रशासन कार्यालय काठमाडौं र नुवाकोटलाई पनि पत्र पठाइएको छ ।

ककनीले काठमाडौंका १८ वटा पालिकालाई फोहोर फिर्ता गर्ने चेतावनी दिँदै कसरी मानव कंकालसहितको फोहोर पुगेको हो अनुसन्धन गरी दोषीलाई कारबाही गर्न भनेको छ । ककनीले लेखेको पत्रमा भनिएको छ, ‘फोहोरमैला व्यवस्थापन ऐन २०६८ को दफा ३८ बमोजिम कसुर गरेमा सोही ऐनको दफा ३९ को ८ बमोजिम ५० हजार रुपैयाँदेखि १ लाखसम्म जरिवाना गर्न सक्नेछ । सोही कसुर पुन: गरेमा पहिलोपटक गरेको जरिवानाको दोब्बर जरिवाना गरी सम्बन्धित निकायमा पत्राचार गर्न सक्नेछ ।’

ककनीले काठमाडौं महानगरपालिका, ललितपुर महानगरपालिका, कागेश्वरी मनोहरा नगरपालिका, कीर्तिपुर नगरपालिका, गोकर्णेश्वर नगरपालिका, चन्द्रागिरी नगरपालिका, टोखा नगरपालिका, तारकेश्वर नगरपालिका, दक्षिणकाली नगरपालिका, नागार्जुन नगरपालिका, बूढानीलकण्ठ नगरपालिका, शंखरापुर नगरपालिका, चाँगुनारायण नगरपालिका, भक्तपुर नगरपालिका, मध्यपुर थिमी नगरपालिका, सूर्यविनायक नगरपालिका, गोदावरी नगरपालिका र महालक्ष्मी नगरपालिकालाई पत्र पठाएको हो ।

बञ्चरेडाँडा ल्यान्डफिल साइटमा कहाँबाट पुग्याे मानव कंकालका बाकस ? (भिडियोसहित)

ककनी गाउँपालिकाले फोहोरमैलालाई जैविक र अजैविक फोहोर विभाजन गरी स्रोतमै छुट्याएर विसर्जन गर्न भनेको छ । ‘फोहोरमैला व्यवस्थापन ऐन २०६८ को दफा ६ को उपदफा १ मा स्थानीय तहले फोहोरमैलालाई कम्तीमा जैविक र अजैविकलगायत विभिन्न प्रकारमा विभाजन गरी स्रोतमै छुट्याउने गरी तोक्नुपर्ने भन्ने व्यवस्था भएको र दफा ७ को उपदफा २ मा हानिकारक फोहोरमैला वा रासायनिक फोहोरमैला उत्पादन गर्ने व्यक्ति, संस्था वा निकायले त्यस्तो फोहोरमैला वा रासायनिक फोहोरमैला संकलन केन्द्र वा स्थानान्तरण केन्द्रमा निष्कासन गर्न पाइने छैन भन्ने व्यवस्था छ,’ ककनीले १८ वटा पालिकालाई स्मरण गराएको छ ।

शिलापत्र फलोअप : बञ्चरेडाँडा मानव कंकाल प्रकरण संसदमा प्रवेश

करिब १० दिनअघि ल्यान्डफिल साइटमा फोहोर टिप्नेहरूले कंकालसहितका चार-पाँचवटा बाकस भेटेका थिए । ल्यान्डफिल साइटका कर्मचारीहरूले उक्त घटना गुपचुप राखेपछि स्थानीयले प्रशासन गुहारेपछि घटना बाहिर आएको हो । ल्यान्डफिल साइटमा मानव कंकाल भेटिएपछि स्थानीय बासिन्दा त्रसित भएका छन् । घटनाबारे जिल्ला प्रहरी कार्यालय नुवाकोटले थप अनुसन्धान गरिरहेको छ ।

प्रकाशित मिति: मंगलबार, असार ५, २०८० १३:५१