भारतबाट फर्केपछि प्रचण्डले भने– भारतीय प्रधानमन्त्रीको सीमाबारे अभिव्यक्तिबाट उत्साहित छौँ

भारतबाट फर्केपछि प्रचण्डले भने– भारतीय प्रधानमन्त्रीको सीमाबारे अभिव्यक्तिबाट उत्साहित छौँ

तस्वीरहरू : सुशील श्रेष्ठ/शिलापत्र

A+ A A-

प्रधानमन्त्री पुष्पकमल दाहाल प्रचण्ड चार दिने भारत भ्रमण सकेर शनिबार साँझ स्वदेश फर्किएका छन् । उनी नेपाल एयरलाइन्सको विमानमार्फत स्वदेश फर्किए । नेपाल फर्केपछि त्रिभुवन विमानस्थलको विशिष्ट कक्षमा पत्रकारहरूसँग कुरा गर्दै प्रचण्डले आफ्नो भ्रमण उत्साहजनक रहेको बताए ।

प्रचण्डको यो भ्रमणका क्रममा विभिन्न ७ बुँदे सहमति तथा सम्झौता भएका थिए । प्रधानमन्त्री प्रचण्डले भारतीय प्रधानमन्त्री नरेन्द्र मोदीले संयुक्त पत्रकार सम्मेलनका क्रममा सीमा विवादबारे दिएको अभिव्यक्तिले आफू उत्साहित भएको बताए । मोदीले प्रतिनिधिमण्डलस्तरको वार्तापछि दिल्लीस्थित हैदरवाद हाउसमा आयोजित संयुक्त पत्रकार सम्मेलनमा सीमा समस्या समाधान गरिने बताएका थिए ।

प्रधानमन्त्री प्रचण्डले धेरैपछि भारतीय प्रधानमन्त्रीबाट सीमाबारे स्पष्ट भनाइ आएको भन्दै त्यसबाट उत्साहित भएको बताए ।

प्रधानमन्त्री प्रचण्डले भने, ‘नेपाल र भारतबीच रहेको बहुआयामिक सम्बन्धलाई समानता र आपसी लाभको आधारमा थप मजदुत बनाउन यस भ्रमणले योगदान गरेको छ । भारतका प्रधानमन्त्री श्री नरेन्द्र मोदीसँग खुलस्त रुपमा कुराकानी भई विश्वासको वातावरण सिर्जना भएको छ भने थाती रहेका विषयलाई सम्बोधन गर्न सकिने विश्वासको राम्रो आधार तयार भएको छ । नयाँ आम निर्वाचन पश्चातको पहिलो विदेश भ्रमणको रुपमा रहेको यो भारत भ्रमण मैले विगतका भ्रमणभन्दा फरक पाएको छु । सारभूत रुपमा यो भ्रमण परिणाममुखी रहेको छ । र, भविष्यका लागि स्पष्ट मार्गदर्शनसमेत गरेको छ ।’

भारतमै रहेका बेला प्रधानमन्त्री प्रचण्डले सीमा विवाद बंगलादेश मोडलमा समाधान गर्न सकिने अन्तर्वार्तामा बताएका छन् । भारत र बंगलादेशबीच सीमा समस्या समाधान गर्न सट्टापट्टा गरिएको थियो । प्रचण्डले नेपाल र भारतबीच सीमा समस्या समाधान गर्न सट्टापट्टा गर्न सकिने बताएका हुन् । उनले यो विषय भारतीय पक्षसँगको वार्तामा प्रवेश भने नगरेको बताएका थिए ।