आमा तिमी मात ! (भिडियोमा राजु स्याङ्तानका दुई कविता)

A+ A A-

आमा तिमी मात

आमा !
मलाई तिमी मातेको मन पर्छ

मातेकै सुरमा
यो नरभक्षी व्यवस्थाले जन्माएको
हिटलरको दरसन्तानजस्तो बाउसँग
मुखमुखै लागेको मन पर्छ
तिम्रो सपना रुँदै हिँड्ने
त्यो एकान्त डगरमा
तिमी मातेर लरबराउँदै हिँडेको मन पर्छ

अरू बेला तिमीसँग त्यत्रो हिम्मत कहाँ ?
अरू बेला तिमीसँग त्यत्रो साहस कहाँ ?
तिमी त आमा कम, नोकर बढी देखिन्छ्यौ
दाम्लाले बाँधिएकी दासीजस्ती देखिन्छ्यौ

दुःखको ढिकी-जाँतोले
तिमीलाई पच्छ्याउन कहिल्यै छाडेन
आधारातमा उठेर मकै पिस्यौ
मकैसँगै केही घुन पिस्यौ
तर पिसेनौ कहिल्यै उपियाँ
दासताको झन्डा बोकेर उफ्रिरह्यो उपियाँ
र छाया बनेर पच्छाइरह्यो तिमीलाई

झिसमिसेमै उठेर ढिकी कुट्यौ
तर ढिकी कुटेनौ तिमीले
ढिकीले तिमीलाई कुटिरह्यो
कङ्गारुको जस्तो कुप्रियो तिम्रो शरीर
कुल्चिदियो मलाई ताते गराउने औँलाहरू
आज त्यही बाङ्गो औँला देखाउँदै
आँगनमा निस्किएर
दुनियाँलाई गाली गरेको मन पर्छ

गैरीगाउँको चमेली फुपूलाई
कुनै अन्जान परदेशीले पेट बोकाएर गयो
कहिल्यै नफर्किने परदेशीको नाममा
गलबन्दी बुनेर बसेकी छन् फुपू
तिनै बन्न नसकेकी लाहुरेनी फुपूलाई
चौतारामा घिस्याउँदै ल्याई
मैलो सारी माथि-माथि उचाल्न लगाई
नाच्न लगाएको मन पर्छ

आमा तिमी मात तिमी मातेको मन पर्छ
यो दुनियाँ तिम्रै रगत चुसी
मातिरहेछ आदिमकालदेखि
मातेकै सुरमा
शासन गरिरहेछ तिमीमाथि
आमा, तिमी मात
मलाई तिमी मातेको मन पर्छ

०००

च्याङ्बाको रहर

याम्बु'मा जान्छु त भन्यौ च्याङ्बा
के तिमी बाटो किन्न सक्छौ ?
माटो किन्न सक्छौ ?
त्यहाँ त माया किन्नुपर्छ
तिम्रो आफ्नै छाया किन्नुपर्छ

यो चिसो सुर्जे
जसको राग लुटिएको छ
धेरै वर्षअघि नै
उसैको धमिलो प्रकाश पनि किन्नुपर्छ
त्यो निलो आकाश
जसको अंशबन्डा गरिएको छ
धेरै वर्षअघि नै
त्यो खण्डित आकाशको टुक्रा पनि किन्नुपर्छ

छ्योर्तेन र गुम्बाका लुङ्दारहरूमा
सेलो गाउन आउने
हावाको झोक्का पनि किन्नुपर्छ
के तिमी किन्न सक्छौ ?

किन्न सक्दैनौ भने
तिमीलाई किन्नेछ याम्बुले
उसले किनेपछि
माग्नेछ तिम्रो मुटु
माग्नेछ तिम्रो आँखा
तिम्रो जिब्रो
बक्खु, तागी, डम्फु
अनि डम्फु माथिको चरी पनि

तिमी बन्नेछौ
आधुनिक च्याङ्बा
तिम्रो नाम बन्नेछ च्याङ
बजाउनेछ याम्बुले
पिपा बसेका तिम्रै
जिजुबाजेको छालाको आधुनिक डमरु
तिमी आफ्नै सपनाको मुर्दाघरबाहिर
हातमा आफ्नै अस्थिपञ्जरको टुङ्ना बजाएर
गाउनुपर्नेछ गीत
'सयौँ थुंगा फूलका हामी एउटै माला नेपाली'

च्याङ्बा !
हेर कस्तो नसुहाएको
यो तामाङ टोपीमा !

भो नबन आधुनिक च्याङ्बा
बरु निकाल आदिम ढ्याङ्ग्रो
जाऔँ तिमी र म
ऊ त्यो ज्योमोगाङ्मामा उक्लिएर
जोड-जोडले बजाऔँ
अनि सुनाऔँ सबै सबैलाई
लुटिएको हाम्रो
याम्बुको कथा

०००

याे पनि..

प्रकाशित मिति: शनिबार, जेठ २०, २०८० ०७:००