बीमा :: राजु स्याङ्तान :: Shilapatra शिलापत्र

A+ A A-

म अहिले प्रेममा छु
मलाई थाहा छ
यो बजारमा माया बिक्री हुन्छ
मायालुको छायाँ पनि बिक्री हुन्छ
मलाई यतिबेला
मेरो ज्यानको होइन
प्रेमको बीमा गर्नु छ
तपाईंको कम्पनीमा
प्रेमको बीमा हुन्छ ?

म आफ्नै लागि नहाँसेको जुग भइसक्यो
मान्छेहरू भन्छन्–यसको मुस्कान फरक छ
तर हाँसिरहेकै हुन्छु
मालिकको अघि
सरकारको अघि
म हाँसिनँ भने
सरकारले मलाई कर तिराउँछ
म रोएँ भने
सरकारले मलाई जेल हाल्छ
म रिसाएँ भने त झन्
सरकारले मलाई गोली नै ठोक्छ
हाँसो रित्तिएको दिन
म हुने छैन यो संसारमा
यतिबेला मलाई दाँतको होइन
मुस्कानको बीमा गर्नु छ
तपाईंको कम्पनीमा
मुस्कानको बीमा हुन्छ ?

दुनियाँ नियाल्नुपर्ने आँखामा
शासकहरूले लगाइदिन्छन् थरीथरीका चश्मा
चश्मा भित्रैबाट मेरो आँसु
निर्यात भइरहेको छ बजारमा
आँसु रित्तिएपछि
कुनै पनि बेला म
निकालिन सक्छु बजारबाट
यतिबेला मलाई आँखाको होइन
आँसुको बीमा गर्नु छ
तपाईंको कम्पनीमा
आँसुको बीमा हुन्छ ?

मेरो गाउँ
कोक र रुस्लान भोड्काका रित्ता बोतलहरूमा डुबेर
निसास्सिएको धेरै भइसक्यो
मेरो गाउँमा अचेल
मान्छेभन्दा पहिले
मानवता मरिरहेको छ
मलाई यतिबेला मान्छेको होइन
मानवताको बीमा गर्नु छ
तपाईंको कम्पनीमा
मानवताको बीमा हुन्छ ?

प्रत्येक वर्ष मेरो घरको छाना
हुरीेले उडाएर लान्छ
मेरो आपा
हुरीले खोस्दै गरेको घरको खाँबा समाउँदै
ओ कोन्ज्योसोम ! ओ कोन्ज्योसोम ! भन्नुहुन्छ
यतिबेला मलाई
मेरो झुपडीको होइन
आपाले हुरीसँग जुधेको
हिम्मतको बीमा गर्नु छ
तपाईंको कम्पनीमा
हिम्मतको बीमा हुन्छ ?

मेरी आमा भोको पेटमा पटुकी कसेर
आधा रातदेखि जाँतोमा
चिसो मकै पिस्नुहुन्छ
मकै पिस्दापिस्दै आमा
भोकले त्यहीँ ढल्नुहुन्छ
मलाई यतिबेला जाँतोको होइन
आमाको तागतको बीमा गर्नु छ
तपाईंको कम्पनीमा
तागतको बीमा हुन्छ ?

कहिले पठेङ्ग्री बेचेर
कहिले हजुरआमाको जडौरी बुलाकी बेचेर
प्रिमियम बुझाउन लौरो टेक्दै
सदरमुकाम धाउनुहुन्छ हजुरबा
आफ्नो शेखपछि झुप्रो घरमा
झलमल्ल ताराहरू फल्ने
आश्वासन दिइएको छ हजुुरबालाई
मलाई यतिबेला हजुरबाको होइन
हजुरबाको हृदयमा दौडिरहने
इमानको बीमा गर्नु छ
तपाईंको कम्पनीमा
इमानको बीमा हुन्छ ?

यो देशमा
तस्कर, घूसखोरी र बलात्कारीलाई
कानुनका दफाहरू बनाएर बीमा गरिन्छ
निर्मला, अंगिरा र सम्झनाहरूलाई
न्यायालयको ढोकाबाहिरै मारिन्छ
यतिबेला मलाई बलात्कारीको होइन
प्रतिरोध गर्दै सम्झनाहरूले
अन्तिम पटक चिच्याएको
त्यो विद्रोहको बीमा गर्नु छ
तपाईंको कम्पनीमा
विद्रोहको बीमा हुन्छ ?