सबै खसआर्य मन्त्री लिएर मञ्च उक्लेका मुख्यमन्त्रीलाई प्रश्न, 'अरु जातिका योग्य भेट्नुभएन ?'

सबै खसआर्य मन्त्री लिएर मञ्च उक्लेका मुख्यमन्त्रीलाई प्रश्न, 'अरु जातिका योग्य भेट्नुभएन ?'

A+ A A-

काठमाडौंमा सम्भवतः पहिलाेपल्ट एउटै मञ्चमा देखिए, सुदूरपश्चिम प्रदेश मन्त्रिपरिषद्का सदस्यहरू । नेपाल पर्यटन बोर्डको हलमा उनीहरू ‘प्रथम खप्तड अन्तर्राष्ट्रिय आध्यात्मिक सम्मेलन’ बारे जानकारी दिन भेला भएका थिए ।

टीठलाग्दो के भने, लहरै बसेका मुख्यमन्त्री र मन्त्री सबै खसआर्य थिए । त्यसमाथि मञ्चमा सबै पुरुष मात्रै- मुख्यमन्त्री कमलबहादुर शाह, भौतिक पूर्वाधारमन्त्री प्रकाशबहादुर देउवा, आर्थिक मामिलामन्त्री नरेशकुमार शाही, कानुनमन्त्री पृथ्वीबहादुर सिंह, सामाजिक विकासमन्त्री झपटबहादुर साउँद र उद्योग, पर्यटन, वन तथा वातावरणमन्त्री रमेशसिंह धामी । मञ्चमा सभामुख भीमबहादुर भण्डारी पनि थिए ।

झण्डै चार महिनासम्म पनि पूर्ण हुन नसकेको मन्त्रिपरिषद्मा अहिले मुख्यमन्त्रीसहित ७ सदस्य छन् । यस अवधिमा तीनपल्ट मन्त्रिपरिषद् विस्तार गर्दा मुख्यमन्त्री शाहले माओवादी केन्द्रकी गीतादेवी माललाई राज्यमन्त्री बनाएका थिए । तर, पर्यटन बोर्डमा आयोजित पत्रकार सम्मेलनमा गीतादेवी देखिइनन् । मञ्चमा सबै पुरुष, त्यो पनि खसआर्य मन्त्रीहरू मात्रै देखिँदा स्टेजमा पुरुषहरू, त्यो पनि खसआर्यहरूको सम्मेलन भइरहेजस्ताे देखिएकाे टिप्पणी गरियाे ।

सुदूरपश्चिममा अहिलेका सबै मन्त्रीहरू यिनै हुन् । २६ माघमा मुख्यमन्त्री नियुक्त कांग्रेस नेता शाहले त्यसको भोलिपल्ट आफ्नै पार्टीका प्रकाशबहादुर देउवा र नेकपा एसका नरेश शाहीलाई मन्त्री बनाएका थिए । २१ फागुनमा विश्वासको मत लिएका शाहले दोस्रोपल्ट तीन मन्त्री छान्दासमेत महिला देखेनन् । तेस्रोपल्टमा उनले माओवादी केन्द्रको सिफारिसमा गीतादेवीलाई राज्यमन्त्री बनाएका हुन् ।

सुदूरपश्चिम प्रदेशका मुख्यमन्त्री कमलबहादुर शाह । तस्वीरः सुशील श्रेष्ठ/शिलापत्र ।

‘सुदूरपश्चिमको क्याबिनेट यति असमावेशी किन ?’ सम्पूर्ण क्याबिनेटसामु मुख्यमन्त्री शाहलाई हामीले सोध्यौँ ।

मन्त्रिपरिषद् असमावेशी रहेको स्वीकार्दै उनले फेरि गरिने विस्तारमा समावेशितामा ध्यान दिने बाचा गरे । ‘असमावेशी किन भन्ने जुन प्रश्न आयो, यो हामीले महसुस गरिरहेको कुरा हो । अझै एक मन्त्रालय नागरिक उन्मुक्ति पार्टीका लागि खाली नै छ, मन्त्रिपरिषद् फेरि विस्तार गर्दा ध्यान दिइने छ’, उनले जवाफ दिए ।

स्टेजबाहिर पनि त्यस्तै

सुदूरपश्चिम प्रदेशमा यही जेठ २३ देखि २५ गतेसम्म ‘खप्तड अन्तर्राष्ट्रिय आध्यात्मिक सम्मेलन’ गर्दै छ । सोही विषयमा जानकारी दिन गरिएको पत्रकार सम्मेलनमा सुदूरपश्चिमको मन्त्रिपरिषद् नै पर्यटन बोर्डकाे हलमा हाजिर थियो । असमावेशी मन्त्रिपरिषद्को ‘रिप्लेक्सन’ पत्रकार सम्मेलनमा पनि देखिन्थ्यो ।

त्यहाँ सघीय सांसदहरू, संविधानसभा सदस्य, पूर्वमुख्यमन्त्री, पूर्वमन्त्रीलगायत उपस्थित थिए । मञ्च त असमावेशी थियो नै, कार्यक्रममा बोलाइएका अतिथिहरू, जो मञ्चतिर फर्किएको पहिलो रोहमा बसेका थिए, त्यो लस्करसमेत समावेशी थिएन । पूर्वमन्त्रीहरू भानुभक्त जोशी, वीरबहादुर बलायर, शेरबहादुर कुँवर, प्रकाशबहादुर रावल, सांसद बद्री पाण्डे, पुष्पबहादुर शाह, संविधानसभा सदस्य हर्कबहादुर सिंहलगायत थिए ।

यो लहरमा राष्ट्रियसभा सदस्य गरिमा शाहले कार्यक्रमकाे गरिमा राखिदिएकी थिइन् । उनीबाहेक अरु महिला त्यहाँ देखिएनन् । न दलित, न थारु, मधेसी र जनजाती अरु कुनै समुदायका प्रतिनिधित्व त्यहाँ देखिएन । एउटा सामाजिक संस्था खोल्दासमेत टिम समावेशी हुनुपर्ने संवैधानिक व्यवस्था छ । तर प्रदेश सरकार नै यति चरम असमावेशी हुनु चिन्ताको विषय रहेको प्रदेश सांसद जुना दानीले बताइन् ।

केही समयअघि राजनीतिक, साहित्यिक, आर्थिक वा अन्य कुनै पनि कार्यक्रम हुँदा मञ्चमा महिलाको उपस्थिति नभए त्यसलाई बहिष्कार गर्ने अभियान चलेको थियो । दुई वर्षअघि पोखरामा वडा नम्बर ६ का महिलाहरूले मञ्चमा पुरुषहरू मात्र राखिएको भन्दै कार्यक्रम बहिस्कार गरेपछि आयोजकले माफी माग्नुपरेको थियो । जनकपुर साहित्य महोत्सवमा पनि यस्तै भएको थियो ।

प्रकाशित मिति: मंगलबार, जेठ ९, २०८० १७:२४