खप्तडमा पहिलाेपल्ट 'अन्तर्राष्ट्रिय आध्यात्मिक सम्मेलन' हुँदै, भारतबाट रामदेव आउने

खप्तडमा पहिलाेपल्ट 'अन्तर्राष्ट्रिय आध्यात्मिक सम्मेलन' हुँदै, भारतबाट रामदेव आउने

सुदूरपश्चिम प्रदेश सरकारका मुख्यमन्त्री कमलबहादुर शाह । तस्वीर- सुशील श्रेष्ठ/शिलापत्र ।

A+ A A-

नेपालकै प्रसिद्ध पर्यटकीय क्षेत्र खप्तडमा पहिलोपल्ट ‘अन्तर्राष्ट्रिय आध्यात्मिक सम्मेलन’ आयोजना गरिने भएको छ । सुदूरपश्चिम सरकारका मुख्यमन्त्री कमलबहादुर शाहले मंगलबार काठमाडौंमा पत्रकार सम्मेलन गरी यही जेठ २३ देखि २५ गतेसम्म सम्मेलन गर्न लागिएको जानकारी दिए । भृकुटीमण्डपस्थित पर्यटन बोर्डको सभाहलमा मुख्यमन्त्रीसहित सदूरपश्चिम सरकारका अन्य पाँच जना मन्त्री, सभामुख, सांसद, पूर्वमुख्यमन्त्री, पूर्वमन्त्रीलगायत उपस्थित थिए ।

मुख्यमन्त्री शाहले भने, ‘आर्थिक समद्धिको यात्रामा हामी सबै एक ठाउँमा छौँ भन्ने सन्देश पनि हो । प्रथम खप्तड अन्तर्राष्ट्रिय आध्यात्मिक सम्मेलनलाई भव्यरूपमा सफल बनाउन सिङ्गाे सरकार, प्रतिपक्ष र प्रदेशसभा एक छ ।’

खप्तड क्षेत्रलाई आध्यात्मिक ध्यान केन्द्रका रूपमा विकास गर्ने उद्देश्यले सम्मेलन गर्न लागिएको उनले बताए ।

शाहका अनुसार, सम्मेलनको उद्घाटन प्रधानमन्त्री पुष्पकमल दाहाल ‘प्रचण्ड’ले गर्नेछन् । सम्मेलनमा भारतबाट योगगुरु रामदेव, ‘जगतगुरु’ बालसन्त, ‘आयुर्वेद शिरोमणि’ बालकृष्ण आचार्य पनि आउने सम्मेलन तयारी तथा व्यवस्थापन समितिका संयोजक हर्कबहादुर सिंहले जानकारी दिए । सम्मेलनमा प्रदेश सरकारले बोलाएका पाँच सयभन्दा बढी अतिथि उपस्थित हुने उनले बताए । सिंह खप्तड क्षेत्र पर्यटन विकास तथा व्यवस्थापन समितिका अध्यक्ष पनि हुन् ।

‘अन्तर्राष्ट्रिय तहमा खप्तड क्षेत्रको महिमा प्रचारप्रसार भई छिमेकी मुलुक भारतलगायत तेस्रो मुलुकबाट पर्यटकहरूको आगमन बढाउन यो सम्मेलन कोसेढुंगा साबित हुने विश्वास लिएका छौँ’, सिंहले भने ।

तयारीका लागि मुख्यमन्त्री शाहको संयोजकत्वमा ४ सय १ सदस्यीय मूल आयोजक समारोह समिति गठन भइसकेको उनले बताए ।

सुदूरपश्चिम प्रदेशमा विकासको मुख्य आधार पर्यटन विकास नै भएको मुख्यमन्त्री शाहले बताए । प्रदेशमा खप्तडसहित बडिमालिका, रामारोशन, बुढीनन्दा, वैजनाथ, त्रिपुरासुन्दरी, मालिकार्जुन, शैलेश्वरी, उग्रतारा पनि प्रसिद्ध पर्यटन गन्तव्य भएकाले यी सबैं क्षेत्रको पर्यटन प्रवर्द्धन गर्न सके आर्थिक समृद्धिको अभियान सार्थक बन्ने उनले बताए ।

प्रकाशित मिति: मंगलबार, जेठ ९, २०८० १५:५०