राप्रपाको सम्पत्ति: पशुपति शमशेरबाट २ करोडको जग्गा र भवन सहयोग, कमल थापाको ७ लाख (प्रतिवेदनसहित)

राप्रपाको सम्पत्ति: पशुपति शमशेरबाट २ करोडको जग्गा र भवन सहयोग, कमल थापाको ७ लाख (प्रतिवेदनसहित)

A+ A A-

निर्वाचन आयोगले दलहरूको आयव्यय प्रतिवेदनमाथि शंका गर्दै अनुसन्धान गर्न महालेखापरीक्षकको कार्यालयलाई विज्ञ कर्मचारी खटाउन अनुरोध गर्‍यो । आर्थिक वर्ष २०७८-७९ को लेखापरीक्षण प्रतिवेदन बुझाउने ८२ दलको अनुसन्धान गर्न आयोगले महालेखापरीक्षकको कार्यालयलाई कर्मचारी खटाउन पत्र पठाएको हो ।

राजनीतिक दलसम्बन्धी ऐन, २०७३ को दफा ४० को उपदफा (१) मा दलले आफ्नो आय र व्ययको वास्तविक हिसाबकिताब देखिने गरी लेखा राख्नुपर्ने व्यवस्था गरेको छ । उक्त दफाको उपदफा (४) मा आयोगले तोकेको अधिकृत वा विशेषज्ञले दलको हिसाबकिताब र लेखा जुनसुकै बखत माग गर्न वा निरीक्षण गर्न सक्ने व्यवस्था छ ।

सोहीअनुसार आयोगले दलहरूको सम्पत्ति अनुसन्धान गर्न लागेको हो । दलहरूको लेखापरीक्षण पारदर्शी नभएको गुनासो आएपछि आयोगले पहिलोपटक अनुसन्धान गर्न लागेको हो । यसअघि हामीले प्रमुख दलहरूले आयोगमा बुझाएको लेखापरीक्षण प्रतिवेदन सार्वजनिक गरेका थियौँ । आज पञ्चहरूको पार्टी राष्ट्रिय प्रजातन्त्र पार्टी (राप्रपा)को आयव्यय प्रतिवेदन सार्वजनिक गरेका छौँ ।

०००

पशुपति शमशेर राणाकाे २ करोडको जग्गा र भवन सहयोग, कुन नेताको सहयोग कति ?

राप्रपालाई वरिष्ठ नेता पशुपति शमशेर राणाले २ करोड बराबरको जग्गा र भवन सहयोग गरेका छन् । राप्रपाले निर्वाचन आयोगमा बुझाएको लेखापरीक्षण प्रतिवेदनमा राणाले काठमाडौं चाबहिलमा रहेको २ करोड ११ लाख ३९ हजार ५१५ रुपैयाँ बराबरको जग्गा र भवन सहयोग गरेको उल्लेख छ ।

राप्रपाका अनुसार राणाले २०६३ सालमा पार्टीलाई जग्गा र भवन सहयोग गरेका हुन् । यसलाई राप्रपाले प्रत्येक वर्ष लेखापरीक्षण प्रतिवेदनमा सम्पत्तिमा समावेश गर्ने गरेको छ । ‘उहाँले डेढ रोपनी जग्गा र दुई तलाको घर पार्टीलाई सहयोग गर्नुभएको हो,’ राप्रपाको मुख्य लेखापाल केशव प्रसाद श्रेष्ठले भने । यस वर्ष राणाले छुट्टै पैसा पनि सहयोग गरेका छन् । लेखापरीक्षण प्रतिवेदनमा राणाले ४० लाख ५० हजार सहयोग गरेका छन् ।

‘पार्टी सञ्चालनका लागि पूर्वअध्यक्षहरूबाट संकलन गर्ने गरेका छौँ,’ लेखापाल श्रेष्ठले भने । प्रतिवेदन अनुसार सबैभन्दा धेरै सहयोग गर्नेमा राणा देखिन्छन् । त्यसैगरी, पूर्वअध्यक्ष र अन्य नेताबाट पनि सहयोग रकम लिएको राप्रपाले उल्लेख गरेको छ । अर्का नेता डा. प्रकाशचन्द्र लोहनीले ३० लाख ५० हजार रुपैयाँ सहयोग गरेका छन् ।

राप्रपा छोड्नुअघि पूर्वअध्यक्ष कमल थापाले ७ लाख सहयोग गरेका छन् । उनले २०७८ माघ २५ मा राप्रपा छोडेका थिए । अध्यक्षमा पराजित भएपछि थापाले राप्रपा परित्याग गरेर राप्रपा नेपाल गठन गरेका छन् ।

२ करोड आम्दानी, स्रोत के हो ?

राजसंस्थाको वकालत गर्ने राप्रपालाई पूर्वराजपरिवारबाट सहयोग रकम आउने गरेको आरोप लाग्ने गरेको छ । तर, लेखापरीक्षण प्रतिवेदनमा पार्टीका नेताबाहेक गर्ने अन्य व्यक्ति कोबाट सहयोग रकम आएको हो उल्लेख गरेको छैन । राप्रपाका कोषाध्यक्ष निलकण्ठ काफ्ले पूर्वराजपरिवारबाट सहयोग रकम प्राप्त नभएको दाबी गर्छन् ।

‘राजपरिवारबाट सहयोग आएको छैन । बाहिर आएको हल्ला हो,’ उनले भने, ‘नेताहरूबाट सहयोग लिएर पार्टी चलाएका छौँ ।’ राप्रपाले अन्य सहयोग शीर्षकमा ४० लाख रुपैयाँ सहयोग आएको प्रतिवेदनमा उल्लेख छ । तर, यो रकम कोबाट आएको हो उनीहरूको नाम राखिएको छैन ।

‘धेरै जनाबाट थोरैथोरै सहयोग आएकाले नाम नराखिएको हो,’ लेखा प्रमुख श्रेष्ठले भने । २० देखि ५० हजार रुपैयाँसम्म सहयोग गर्नेहरूको नाम धेरै हुने भएकाले सार्वजनिक नगरिएको उनी बताउँछन् । आम्दानीमा सदस्यता शुल्क, केन्द्रीय कार्यसम्पादन समितिको लेबी, केन्द्रीय कार्यसमितिको लेबी र सांसदहरूको लेबीलाई देखाएको छ । प्रतिवेदनमा लेबी नियमित प्राप्त नभएको र उठ्न बाँकी रहेको औँल्याइएको छ ।

राप्रपाको प्रतिवेदनमा चन्दा शीर्षकमा सहयोग आएको देखिँदैन । ‘सानो पार्टीलाई चन्दा नआउने रहेछ,’ लेखा प्रमुख श्रेष्ठले भने । प्रतिवेदनमा जम्मा आम्दानी ३ करोड २१ लख १६ हजार ४५० रुपैयाँ भएको देखाएको छ । र, आम्दानी र खर्च कटाएर राप्रपाको २ करोड ४ लाख ३९ हजार ५९३ रूपैयाँ सम्पत्ति रहेको प्रतिवेदनमा देखिन्छ ।

नाफामा राप्रपा

राप्रपाले पार्टी सञ्चालन, व्यवस्थापन, स्थानीय निकायको निर्वाचन, पार्टीको महाधिवेशन, तथा विभिन्न कार्यक्रममा खर्च भएको प्रतिवेदनमा उल्लेख छ । जम्मा खर्च २ करोठ ५७ लाख ७१ हजार २९५ रुपैयाँ भएको जनाएको छ । पार्टीको महाधिवेशनमा २२ लाख रुपैयाँ राप्रपाले खर्च गरेको छ ।

तलब खर्चलगायतका भुक्तानी टीडीएस कट्टी गरी टीडीएस रकम राजश्व कार्यालयमा दाखिला गर्नुपर्ने हो । तर, गरिएको छैन । खर्चका बिलहरू वैज्ञानिक र आधुनिक ढंगबाट नभएको प्रतिवेदनमा उल्लेख गरिएको छ । यद्यपि, यो अवधिमा व्यय कम र आय बढी भएकाले राप्रपा नाफामा छ । यो आम्दानी र खर्च २०७८ साउन १ देखि २०७९ असार मसान्तसम्मको हो ।

सम्बन्धित समाचार