नेपालका दिनेश सुनारलाई अमेरिकी राष्ट्रपतिको शुभकामना

A+ A A-

नेपालका अन्तर्राष्ट्रिय पार्कर खेलाडी दिनेश सुनारलाई अमेरिकी राष्ट्रपतिकाे कार्यालयले शुभकामना दिएकाे छ ।

‘कडा मेहनत र लगनले तपाईंलाई जुन मुकामसम्म पुर्‍याएको छ, यसले तपाईंलाई धेरै अगाडि लैजाने छ, तपाईंसँग गर्व गर्नलायक थुप्रै कुरा छन्’, राष्ट्रपति जाे बाइडेनको हस्ताक्षरसहितको शुभकामना पत्रमा भनिएको छ ।

पत्रमा अहिलेसम्मको उपलब्धिका लागि सुनारलाई बधाइ दिँदै आगामी वर्ष थप उपलब्धिका लागि शुभकामना दिइएका छन् ।

कसरी आयो राष्ट्रपतिको शुभकामना पत्र ?

अमेरिकी राष्ट्रपति कार्यालयले अनलाइनबाटै ‘प्रेसिडेन्सियल ग्रिटिङ रिक्वेस्ट’ गर्न पाउने व्यवस्था गरेको छ । अर्थात ह्वाइट हाउसको वेबसाइटमा गएर कुनै पनि व्यक्ति वा संस्थाले आफ्ना उपलब्धि, उत्सव, चाडपर्वका लागि राष्ट्रपतिबाट शुभकामना माग्न पाउँछ । त्यसमा आफ्नो दाबी वा उपलब्धि पुष्टि गर्न विभिन्न कागजातहरू पनि पेस गर्नुपर्ने हुन्छ ।
तर, ह्वाइट हाउसले बिनाअध्ययन यस्तो आवेदन स्वीकारचाहिँ गर्दैन ।

सुनारका अनुसार, उनले गत जनवरीमा अप्लाइ गरेका थिए । पाँच महिनापछि ह्वाइट हाउसले उनलाई शुभकामना पत्र पठाएको हो ।

तीन दिनअघि ओहिओ राज्यस्थित आफू बस्ने घरमै राष्ट्रपति बाइडेनको हस्ताक्षर भएको शुभकामना पत्र आइपुगेको सुनारले शिलापत्रलाई बताए । ‘अप्लाइ गर्दा आफू बस्ने घरको ठेगाना पनि दिनुपर्ने हुन्छ । आवेदन स्वीकृत भयो भने सोही ठेगानामा पत्र आउँछ’, उनले भने ।

याे पनि..

गिनिज बुकमा दिनेशको दबदबा

यसअघि उनलाई अमेरिकाको हाउस अफ रिप्रेजेन्टेटिभले १० फेब्रुअरीमा सम्मान गरेको थियो । दिनेशको सम्मानमा सिटी अफ एक्रोनका मेयर डेनियल होरिगानले गत २१ अप्रिललाई ‘दिनेश सुनार डे’ घोषित गरेका थिए । यति मात्र होइन, गिनिज वर्ल्ड रेकर्ड्स डेमा संसारका उत्कृष्ट पाँच रेकर्ड होल्डरभित्र दिनेश पनि परेका थिए । यो मनोनयनमा दिनेशसहित उत्तर अमेरिकासहित चीन, जापान, बेलायत र मेक्सिकोका खेलाडी परेका थिए । ‘मलाई समग्र उत्तर अमेरिकाको प्रतिनिधित्व हुने गरी मनोनीत गरिएको थियो’, दिनेशले भने ।

काे हुन दिनेश ?

सशस्त्र प्रहरी बलमा जागिरे थिए खोटाङका ३१ वर्षे दिनेश सुनार । पार्कर खेल्न अमेरिका जान संगठनबाट बिदा नपाएपछि उनी जागिर छाेडेर गएका थिए । अमेरिका छिरेका दिनेशले यसै वर्ष ११औँ विश्वकीर्तिमान राखेका छन् । यसअघि पाँचपल्ट रेकर्ड बनाइसकेका उनको कुल रेकर्ड १७ पुगेको छ ।

याे पनि..

पार्करका अन्तर्राष्ट्रिय नेपाली खेलाडीकाे संघर्षपूर्ण यात्रा : बालुवाको थुप्राेदेखि विश्वकीर्तिमानीसम्म (भिडियाेसहित)

२१ वैशाख २०४८ मा आमा रिता र बुवा बिर्खबहादुरको कोखबाट जन्मेका दिनेश हाल अमेरिकाको ओहिओ राज्यको एक्रोन शहरमा बस्छन् । नेपालको प्रतिनिधित्व गर्दै उनले विभिन्न अन्तर्राष्ट्रिय प्रतिस्पर्धाहरूमा भाग लिइरहेका छन् । उनी शिलापत्र वर्ष २०७९ को समाचार निर्माता पनि चुनिएका थिए ।

प्रकाशित मिति: शनिबार, जेठ ६, २०८० १२:०२