ज-जसकाे गीत सुन्दै हुर्के, उनीहरूसितै काम गरिरहेका गायक श्रीधर (भिडियाेसहित)

ज-जसकाे गीत सुन्दै हुर्के, उनीहरूसितै काम गरिरहेका गायक श्रीधर (भिडियाेसहित)

A+ A A-

बद्री पंगेनी, शिरीष देवकोटा, रामजी खाँण, विष्णु माझी, देवी घर्तीलगायतलाई सुन्दै हुर्किए स्याङ्जा गल्याङमा जन्मेका श्रीधर अधिकारी । उनीहरूको गायकीबाट प्रभावित थिए उनी । श्रीधरलाई विछट्टै मन पर्थ्यो लोकदोहोरी गीत । यही रुचिले उनमा गायक बन्ने सपना पनि हुर्काइदियो ।

हाल बुटवल दीपनगरका २६ वर्षे श्रीधरले दिग्गज संगीतकर्मीदेखि नयाँ पुस्ताका गायकगायिकासम्मको सहकार्यमा तीन दर्जनभन्दा बढी गीत ल्याइसकेका छन् ।

उनले २०७५ सालमा पहिलोपल्ट ‘ख्यालख्यालमै पिरती’ बोलको गीत रेकर्ड गराएका थिए, जसमा उनले लोकदोहोरी गायिका पूर्णकला बीसीसँग स्वर बाँडे ।

याे पनि..

तिलकसिंह पेला बने 'शिलापत्र वर्षकलाकार', जाे भाइरल हुने भागदौडबाट अलग्गै बसे (भिडियोसहित)

श्रीधरले पूर्णकलासहित देवी घर्ती, शान्तिश्री परियार, प्रमोद खरेल, वसन्त थापादेखि रचना रिमाल, एलिना चौहान, पूजा देवकोटा, लक्ष्मी खड्कालगायतसँग काम गरिसकेका छन् । केही साताअघि युट्युबमार्फत सार्वजनिक ‘कपालै कोरी’लगायत ४२ वटा गीत उनले दर्शक/स्रोतामाझ ल्याइसकेका छन् । यीमध्ये १८ वटा गीतमा श्रीधरको स्वर सुन्न सकिन्छ ।

उनले लेखेका र संगीत गरेका गीत पनि दुई दर्जनभन्दा बढी छन् । आधुनिक, लोकपप, दोहोरी र फिल्मी गीतहरूमा लगाव भएका उनका ‘लाली जोवन’, ‘मेरो तस्वीर’, ‘कपालै कोरी’, ‘बाजा तालमा’लगायत गीत हिट छन् । आगामी दिनमा लोकगीतसँगै फिल्मका गीतहरूमा पनि काम गर्ने योजनाका साथ लागिपरेको उनी बताउँछन् ।

क्यारिकेचर गर्थे, गायक बने

स्याङ्जा गल्याङ नगरपालिका- ११ मा पर्छ कर्माचौर गाउँ । कालीगण्डकीको काखमा रहेको कर्माचौरमा लोकलय प्रिय छ । बिहे बटुलोदेखि पारिवारिक जमघट, छैटी अनि पाहुना स्वागतसम्ममा लोकभाका हालिन्छ । भजनकीर्तनदेखि रत्यौलीसम्म लोकभाकामै सुनेको सम्झिन्छन् श्रीधर । भन्छन्, ‘घरमा पूजाआजाका क्रममा भजनकीर्तन हुन्थ्यो । कोही विदेशबाट आएका बेला स्थानीय भाका हालेर स्वागत गरिन्थ्यो । बच्चा जन्मेको ६ दिन (छैटी) हुँदा पनि स्थानीय भाकामा नाचगान हुन्थ्यो । त्यस्ता क्रियाकलापमा अक्सर सहभागी हुन्थेँ उनी । तर सुन्ने र रमाइलो हेर्ने मात्रै हुन्थ्यो । भाइ विमलले पनि गीत गाउँथे । हाल उनी कोरियामा छन् ।’

याे पनि..

लोक स्टारको मञ्च चढ्दा चार वर्षअघि लागेको ऋण चुकाइरहेका विनोद दनुवार (भिडियोसहित)

श्रीधरलाई लोकभाका असाध्यै मन पर्थ्यो, ध्यान दिएर सुन्थे । त्यसैबाट प्रभावित हुँदै गए । तर, उनले गीत गाउन थालेकोचाहिँ निकै पछितिर हो । त्यसअघि उनी क्यारिकेचर (अरुको बोली नक्कल) गर्थे ।

उनको परिवार अहिले बुटवल झरिसकेको छ । बुटवलको लुम्बिनी वाणिज्य क्याम्पसमा बीबीएस पढ्दासम्म उनी क्यारिकेचर गर्थे । तर, २०७३ सालतिर भएको ‘बुटवल मेला’पछि उनमा गायक बन्ने हुटहुटी पुनर्जागृत भयाे । ‘आफ्नो प्रतिभा देखाउन मञ्च चढेको थिएँ । सुरुमा क्यारिकेचर नै गरौँ कि भन्ने लागेको थियो’, श्रीधर सम्झिन्छन्, ‘तर, गीत गाउन मन लाग्यो ।’

उनले शिरीष देवकोटाको ‘म त आउने थिएन’ बोलको रोइला भाका हाले ।

‘गीत गाएकोमा पहिलोपल्ट मैले तारिफ पाएँ, नगदसहित कदरपत्र पनि पाइयो’, उनी भन्छन्, ‘त्यसपछि म गाउन सक्ने रहेछु, मैले थप मिहिनेत गर्नुपर्छ भन्ने लाग्यो ।’

सोही वर्षदेखि श्रीधरले बुटवलको लुम्बिनी कला केन्द्रमा भर्ना भएर संगीत सिक्न थाले । एक वर्षजति संगीत कक्षा लिएपछि उनले देवीनगरमा आफ्नै सप्तक संगीत विद्यालय खोले । यसबाहेक उनी स्थानीय होराइजन बोर्डिङमा पढाउँथे । गीत निकाल्नै भनेर उनले जागिरबाट केही पैसा जोगाउने गरेका थिए । सोही पैसाले २०७५ सालमा आफूले पहिलो गीत ‘ख्यालख्यालैमा पिरती’ तयार गरेको श्रीधर बताउँछन् ।

त्यसको वर्ष दिनपछि कोभिड महामारीले छोप्यो । उनले आफूले सञ्चालन गरेको सप्तक संगीत विद्यालय दुई वर्षपछि गीतकार देवराज गैरेलाई जिम्मा लगाए अनि काठमाडौं हानिए । २०७७ सालदेखि उनी सांगीतिक क्षेत्रमा पूर्णकालीन भएर खटिइरहेका छन् ।

याे पनि..

संगीतमा बामे सर्दै गरेका उदयपुरे प्रतिभा (भिडियाे)

‘मनकी रानी’ बोलको श्रीधरको दोस्रो गीत देवी घर्तीले गाएकी छन् । उनको तेस्रो गीत ‘सुन मायालु सुन’ हो, जसमा उनी करिश्मा बुढापिर्थेसँग सुनिएका छन् । ‘संगीत पहिला रहर थियो, अहिले व्यवसाय भयो’, श्रीधर भन्छन् ।

उनी लोकदोहोरी गीतबाट प्रभावित थिए । अहिले आधुनिक गीतहरूमा पनि काम गरिरहेका छन् । उनको बुझाइमा आधुनिक गीत गाउँदा कुनै निश्चित भूगोल मात्र नभएर दशैभरि पुग्न सकिन्छ । ‘सानोमा भजनकीर्तनदेखि सांस्कृतिक कार्यक्रम, रेडियोमार्फत लोकसंगीत सुनियो । तर, १२ कक्षामा पढ्दैगर्दा पहिलोपल्ट प्रमोद खरेललाई सुनेर प्रभावित भएँ । संगीत सिक्ने क्रममा आधुनिकतिर पनि जोड गरेँ’, श्रीधर भन्छन्, ‘अहिले मेरो रुचिमा फिल्म, लोकपप, दोहोरी र आधुनिक गीतहरू पर्छन् ।’

सिक्दै छु

श्रीधर संगीतमा होमिएको सात वर्ष भइसकेको छ । यस अवधिमा आफूले अझै धेरै सिक्न बाँकी रहेको कुरा महसुस गरेको उनी बताउँछन् । ‘सिक्ने कुरा सधैँ चलिरहने रहेछ’, उनी भन्छन्, ‘नयाँ शैलीमा काम गर्नुपर्ने रहेछ, धैर्यता चाहिने रहेछ ।’

याे पनि..

खासगरी सांगीतिक क्षेत्रमा आज लगानी गरेर भोलि नै प्रतिफल खोज्नु मूर्खतापूर्ण हुने उनको भनाइ छ । धैर्यता कम भयो, अपेक्षा ज्यादा भयो भने परिणाम निराशा नै हुने श्रीधर बताउँछन् । ‘मैले संगीत सिकेँ, सिकाएँ, फेरि सिकिरहेको छु’, भन्छन्, ‘तैपनि आफूमा अझै कमी महसुस गरिरहेको छु । तर, होमिइसकेकाले पछि हट्ने कुरा छैन, थप मिहिनेत गर्नेछु ।’

अहिलेसम्म उनी गीत गाउनकै लागि देशका २४ जिल्ला घुमिसकेका छन् । यति मात्र होइन, भारतको चण्डीगढ, लुदियाना र हरियानासम्म पुगेर उनले सांगीतिक प्रस्तुति दिएका छन् ।

बाको सुझाव

उनका बा मुक्तिप्रसाद अधिकारी र आमा जुना अधिकारी हुन् । आफ्नो गीत सुनेर/हेरेर बाआमाले पनि प्रतिक्रिया दिने गरेको श्रीधर बताउँछन् । ‘लोकगीत गाए हुन्थ्यो भन्ने उहाँहरूको चाहना छ । योभन्दा अलि फरक, यस्तो गाइस् भने चल्छ भनेर ५० वर्षीय बुबाले सुझाउनुहुन्छ’, श्रीधर भन्छन्, ‘कोरिया बस्ने भाइ विमलले पनि गीत सुनेर प्रतिक्रिया दिइरहेको हुन्छ ।’

योजना

श्रीधर संगीतमा अझै खारिन चाहन्छन् । आगामी दिनमा फिल्मका गीतहरू आफ्नो प्राथमिकतामा पर्ने उनको भनाइ छ । ‘संगीत नै मेरो सपना हो । यसबाहेक पढाइलाई सँगसँगै लैजान्छु । डिग्री गर्नु छ । संगीत मात्र हाेइन, जुनसुकै क्षेत्रमा पढाइले उचाइ लिन सघाउँछ ।’

कमाइ

क्यासेटको जमानाबाट समय धेरै पर पुगिसकेको छ । केही वर्षअघिसम्म युट्युब र राेयल्टी मात्रै कमाइको मुख्य माध्यम थियो । तर, अहिले अडियो प्लेटफर्महरूबाट पनि कमाइ हुने थालेको श्रीधरको अनुभव छ । ‘टिकटक, फेसबुक माइडे, रिल्सलगायत दुई दर्जनभन्दा बढी प्लेटफर्म/एपमा गीत प्रयोग हुँदा त्यहाँबाट पैसा आउँछ । रोयल्टी, मञ्चका कार्यक्रमलगायत आम्दानीका अन्य स्रोत पनि छन्’, उनी भन्छन्, ‘मूल कुरा के भने, सिर्जना उत्कृष्ट हुनुपर्‍यो ।’

प्रकाशित मिति: शनिबार, वैशाख १६, २०८० ०९:००