बागमतीमा सरकार विस्तारको गाँठो फुकेन, कांग्रेस कुर्दै मुख्यमन्त्री

A+ A A-

बागमती प्रदेशमा सत्तारुढ दुई दल नेपाली कांग्रेस र माओवादी केन्द्रको हठका कारण सरकार विस्तारको गाँठो फुक्न सकेको छैन । विश्वासको मत पाएको दुई साता बितिसक्दा पनि मुख्यमन्त्री शालिकराम जम्मकट्टेलले सरकार विस्तार गर्न नसकेपछि अन्ततः कांग्रेसको बाटो कुर्न बाध्य भएका छन् । सत्तारुढ गठबन्धनको ठूलो दल नेपाली कांग्रेसले दाबी गर्दै आएको ६ वटा मन्त्रालयमा लचकता नअपनाउने हो भने सरकार विस्तार हुने सम्भावना टर्दै गएको छ ।

यतिबेला प्रदेश सरकारको नेतृत्व गरिरहेको नेकपा माओवादी केन्द्र र नेपाली कांग्रेसले आ–आफ्नो हठलाई थाती राखेर सहमतिमा नगए सरकार विस्तारमा थप सङ्कट निम्तिने देखिन्छ । विगत १० दिनदेखि सरकारको भागबन्डा टुङ्ग्याउन प्रदेशका गठबन्धन दलहरू कांग्रेस, माओवादी र एकीकृत समाजवादी जुटे पनि आज बिहानसम्म सहमति हुन सकेको छैन । ११ सदस्यीय मन्त्रिपरिषद्‌मा मुख्यमन्त्रीसहित चारवटा मन्त्रालय माओवादी केन्द्रले सम्हालिरहेको छ । बाँकी मन्त्रालयमा भागबन्डा मिल्न नसकेको हो । सत्तारुढ गठबन्धनका नेपाली कांग्रेस, नेकपा माओवादी केन्द्र, नेकपा एकीकृत समाजवादी र सरकारलाई समर्थन गरेको हाम्रो नेपाली पार्टीको दाबी १४ वटा मन्त्रालय पुगिसकेको छ ।

तर, ११ वटा मन्त्रालय मात्रै रहेकाले दाबी सङ्ख्या घटाउनुपर्ने अवस्था छ । ६ वटा मन्त्रालयमा नेपाली कांग्रेस, एकीकृत समाजवादीले तीन र हाम्रो नेपाली पार्टीले एकवटा मन्त्रालयमा दाबी गरेको हो । जसमध्ये हाम्रो नेपाली पार्टीलाई मन्त्रालय दिन नसकिने र एउटा संसदीय समिति सभापति दिनेमा प्रमुख दलहरू सहमत छन् । एकीकृत समाजवादीले पनि दुईवटा मन्त्रालयमा सहमति गरिसकेको जनाइएको छ । भागबन्डामा कांग्रेसले असहमति जनाउँदै आइरहेको माओवादी केन्द्रका एक सांसदले शिलापत्रलाई जानकारी दिए ।

गठबन्धनका दलहरूबीच भागबन्डा टुङ्ग्याउन मुख्यमन्त्री जम्मकट्टेल र कांग्रेस बागमती प्रदेश संसदीय दलका नेता बहादुरसिंह लामाले सात सदस्यीय कार्यदल गठन गरेका थिए । कांग्रेस दलको उपनेता रामकृष्ण चित्रकारको संयोजकत्वमा गठित कार्यदलले आधा दर्जन बैठकबाट पनि भागबन्डा टुङ्गोमा पुर्‍याउन नसकेपछि सरकार विस्तार अनिश्चित बन्दै गइरहेको हो । कार्यदलबाट भागबन्डामा सहमति हुन नसकेपछि मुख्यमन्त्री जम्मकट्टेल र कांग्रेस दलका नेता लामालाई समेत गुहारिए पनि संयुक्त बैठकले भागबन्डा टुङ्ग्याउन सकेन ।

कांग्रेसले ६ मन्त्रालय नछाड्ने र माओवादीले पाँचवटा मात्रै दिन सक्ने विषयले सरकार विस्तार रोकिएको हो । मुख्यमन्त्रीले सरकार विस्तारको गाँठो बनिरहेको भागबन्डामा कांग्रेसको सहमति पर्खिरहेको माओवादी केन्द्रका सचेतक रत्न ढकाल बताउँछन् । उनले माओवादीले भागबन्डाका लागि गरेको प्रस्तावमा कांग्रेस सहमति भए मन्त्रीहरूको शपथ हुन सक्ने जानकारी दिए । ‘हामीले पाँचवटा मन्त्रालय लिन भनेका छौँ । कांग्रेसले स्वीकार गरे तत्काल सरकार विस्तार हुन्छ । नभए ढिला होला । हामीले चारवटा मन्त्रालयबाट तल झर्ने कुरा हुँदैन । एकीकृत समाजवादीलाई दुईवटा मन्त्रालय दिनुपर्छ’, उनले भने ।

बागमतीमा कांग्रेसले पाँचवटा, माओवादी केन्द्रले चारवटा र एकीकृत समाजवादीले दुईवटा मन्त्रालय पाउने सम्भावना छ । तर, कांग्रेसले ६ वटा मन्त्रालयको दाबी छोड्न नमानेपछि मुख्यमन्त्री जम्मकट्टेल पर्ख र हेरको रणनीतिमा छन् । कांग्रेसले आफू ६ वटा मन्त्रालय लिएर, माओवादीले मुख्यमन्त्रीसहित तीनवटा मात्रै मन्त्रालय लिएर गठबन्धनका बाँकी दललाई मन्त्रालय बाँड्नुपर्ने अडान लिएको छ । तर, माओवादीले लिइसकेको चारवटा मन्त्रालय छोड्न नसक्ने ढकालले बताए ।

कांग्रेस बागमती प्रदेश संसदीय दलका उपनेता रामकृष्ण चित्रकार यसै हप्ताभित्र सरकार विस्तार भइसक्ने दाबी गर्छन् । ‘यसै हप्ताभित्र सरकार विस्तार हुन्छ । भागबन्डा लगभग टुङ्गिएको छ । सहमति हुन मात्रै बाँकी छ’, चित्रकारले भने । कांग्रेसभित्रै मन्त्रालय भागबण्डालाई लिएर विवाद देखिन्छ । कांग्रेसमा ६ मन्त्रालय पाएमात्रै सरकार जाने वा पाँचवटा लिएर छिटो सरकारमा जानुपर्ने विषयले सांसदहरूमा ध्रुवीकरण आएको हो ।

मन्त्रीहरूको आकाङ्क्षी बढी हुँदा कांग्रेस दलका नेता लामा ६ वटा मन्त्रालय लिनुपर्ने अडानमा छन् । २५ पुसमा गठित सरकारबाट एमाले र राप्रपा बाहिरिएसँगै सत्तामा सहभागी हुन लागेको कांग्रेसमा मन्त्री हुनेको सङ्ख्या बढेपछि व्यवस्थापनमा समस्या भएको देखिएको हो । कांग्रेसभित्र पनि सरकारमा जान आकाङ्क्षी धेरै देखिएपछि तनाव भइरहेको छ ।

सरकार विस्तारमा ढिलाइका कारण प्रदेशका मुख्यमन्त्री जम्मकट्टेलले आठवटा मन्त्रालयको जिम्मेवारी सम्हाल्दै आएका छन् । बागमती प्रदेशसभामा कुल सातवटा दलको प्रतिनिधित्व रहेको छ । प्रदेशसभामा नेपाली कांग्रेसको ३७, एमालेको २७, माओवादीको २१ र राप्रपाको १३, एकीकृत समाजवादीसँग ७, नेमकिपासँग ३ र हाम्रो नेपाली पार्टीसँग २ मत छ । एक सय १० सदस्यीय प्रदेशसभामा सरकार गठनका लागि ५६ सांसद भए पुग्छ ।

प्रकाशित मिति: आइतबार, चैत २६, २०७९ ०९:४९