रोगबाट बचेर लामो समय जिउने मानिसहरूले के खान्छन् ? (भिडियोसहित)

A+ A A-

जीवन स्वस्थ र लामो होस् भन्ने चाहना सबैको हुन्छ । तर के हाम्राे खानपान र जीवनशैलीले यो चाहना पूरा हुन दिन्छ ?

सामाजिक सम्बन्ध, निद्राको आदत, खुसीको स्तर, पर्यावरण र उद्देश्यको भावनामा हाम्राे आयु निर्भर रहेकाे कुरा वैज्ञानिक साेधबाट थाहा भएकाे छ । अझ छाेटकरीमा के निचाेड निकाल्न सकिन्छ भने लामो समयसम्म जिउनका लागि सबैभन्दा महत्त्वपूर्ण हाम्रो खानपिन नै हो ।

अमेरिकाको नेसनल जिओग्राफिक फेलो, पत्रकार एवं वृत्तचित्र निर्माता डेन ब्युटनरले आहार र लामाे आयुबारे खोज/अनुसन्धान गरेका छन् । सबैभन्दा पहिले पृथ्वीमा ‘ब्लु जोन’ को पहिचान गराउने श्रेय उनैलाई जान्छ । संसारमै सबैभन्दा बढी समय जिउने र स्वस्थ मानिसहरू बस्ने क्षेत्रहरू ब्लु जोन हुन् । त्यहाँ बस्ने मानिस १०० वर्ष वा त्योभन्दा बढी समय बाँच्छन्, त्यो पनि कुनै रोगबिनै ।

सन् २००८ मा उनले आफ्नो बेस्ट सेलिङ पुस्तक ‘द ब्लु जोन्सः नाइन लेसन्स फर लिभिङ लङ्गर फ्रम द पिपुल हु ह्याभ लिभ्ड द लङ्गेस्ट’ मा आफ्नो निष्कर्ष प्रकाशित गरे । ब्लु जोन्समा उनले इकारिया (ग्रीस), सार्डिनिया (इटाली), ओकिनाभा (जापान), लोमा लिन्डा (क्यालिफोर्निया) र निकोय (कोस्टारिका) लाई समावेश गरेका छन् ।

डेन ब्युटनरले एक पोडकास्टमा भनेका थिए, ‘तपाईं विकसित क्षेत्रमा बस्ने एक औसत व्यक्ति हुनुहुन्छ भने तपाईं करिब १४ वर्षको जीवन आशा गुमाइरहनुभएको छ । यसको सबैभन्दा ठूलो कारण तपाईंको स्वादिलो अत्यधिक प्रशोधित (प्रोसेस्ड) खाना हो । तर, हामीसँग यसबाहेक अर्को विकल्प छैन ।’

याे पनि..

लामो आयु भएका मानिस बस्ने संसारका चार क्षेत्र, कस्ताे हुन्छ उनीहरूको जीवनचर्या ?

साथै, ब्युटनरले यो पनि भनेका थिए, हामी आफ्नो क्षेत्रमा रहेर पनि ब्लु जोनमा बस्ने मान्छेकै जस्तो खाना बनाउन र खान सिक्न सक्छौँ । उनले दश यस्ता खानाका बारेमा बताएका छन्, जुन ब्लु जोन्सका मानिसहरूले खाने गर्छन् । यी खानालाई सामान्य प्रयासमै हामी आफ्नो भोजनमा समावेश गर्न सक्छौँ । र, सबैभन्दा रोचक कुरा त के भने, लगभग सबै ब्लु जोनका मानिसले चिया, कफी र वाइन लिने गरेका छन् ।

प्लान्ट फुड

ब्लु जोन्सका मानिसको भोजन ९५ प्रतिशत बोटबिरुवाबाट आउँछ । तपाईं पनि आफ्नो खानामा बिरुवाबाट प्राप्त उत्पादनलाई बढीभन्दा बढी प्राथमिकता दिनुहोस् । बोडी, साग (खासगरी पालुङ्गो ), गाजर, नट्स र बीज, दाल, मटर पर्याप्त खानुहोस् ।

मासु हप्तामा दुईपल्टभन्दा बढी नखानुहोस्

पाँचमध्ये चार ब्लु जोन्समा बस्ने मानिस मासु खान्छन् । तर, ब्लु जोन्समा मानिसहरूले दिनैपिच्छे मासु खाँदैनन्, कुनै उत्सवमा साइड डिसका रूपमा मात्र खान्छन् । तपाईं मासु खानुहुन्छ भने हप्तामा दुईपल्टभन्दा बढी नखानुहोस् । र, तपाईंले खाइरहेको मासु ताजा हो कि प्रोसेस्ड हो, यसमा विशेष ख्याल राख्नुहोस् ।

हरेक दिन माछा खान सक्नुहुन्छ

सामान्यतया प्रत्येक ब्लु जोन्सका मानिस दिनैपिच्छे थोरै मात्रामा माछा खान्छन् । तपाईं लामो उमेरका लागि दिनहुँ माछालाई आफ्नो खानामा समावेश गर्न सक्नुहुन्छ । तर ध्यान दिनुहोस्, पारो (मर्करी) को मात्रा नभएको माछालाई मात्रै खानामा समावेश गर्नुहोला ।

गाईको दूधबाट बनेका चीज चाहिँदैन

स्वस्थ रहन र क्याल्सियमको आपूर्तिका लागि गाईको दूधबाट बनेका चीज सेवन गर्नुपर्छ भनिन्छ तर ब्लु जोन्सको खानामा गाईको दूध महत्त्वपूर्ण मानिँदैन । यहाँका मानिस बाख्रा वा भेडाको दूधबाटै दही वा पनिर बनाउँछन् र त्यही नै उनीहरूको खानाको एउटा हिस्सा हो ।

कतिपय अनुसन्धानबाट के पत्ता लागेको छ भने हाम्रो पाचन प्रणाली गाईको दूधबाट बनेका चीजका लागि अनुकूल छैन । गाईको दूधको साटो हामी एक कप तोफु लिन सक्छौँ, यसबाट एक कप दूधजति नै क्याल्सियम पाइन्छ ।

अण्डाः हप्तामा मात्रै तीनवटा

ब्लु जोनका बासिन्दा सामान्यतः एक हप्तामा तीनवटाभन्दा बढी अण्डा खाँदैनन् । त्यहाँका मानिस मासुसँगै अण्डालाई पनि सहायक खानाका रूपमा लिन्छन् । केही मानिस सुपमा अण्डालाई उमालेर खान्छन्, कतिपयचाहिँ बोडीसँग अण्डा फ्राई गरेर खान्छन् । ब्लु जोन्सका केही मानिसले अण्डालार्ई नास्ताका रूपमा खाने गरेका छन् ।

गेडागुडी

हरेक दिन कम्तीमा आधा कप सिमी, बोडी र गेडागुडी खानुहोस्, चाहे त्यो जुनसुकै प्रकारको होस् । गेडागुडी ब्लु जोन्समा बस्ने मानिसले खाने सबैभन्दा सामान्य आहार हो । खानामा कालो बोडी, दाल, सोयाबिन समावेश गर्नुहोस् । ब्लु जोनका मानिस धेरैजसो विकसित देशको तुलनामा औसतमा चार गुणा बढी गेडागुडी खान्छन् ।

खानामा चिनीको मात्रा कम गर्नुहोस्

ब्लु जोनका मानिस कुनै उत्सवका क्रममा मात्रै मिठाई खान्छन् । तपाईं लामो समय जिउन चाहनुहुन्छ भने त्यस्ता कुनै पनि उत्पादन नखानुहोस्, जसको पहिलो पाँच इन्ग्रेडिएन्ट्समा चिनी समावेश हुन्छ । खानामा चिनीलाई दिनको १०० क्यालोरीमा सीमित गर्नुहोस् । यो सुगर क्यालोरी पनि सुक्खा मेवाबाट मिल्छ भने अझ राम्रो ।

नट्स

एक दिनमा दुई मुट्ठी नट्स खानुहोस् । ब्लु जोन्सका मान्छेले दिनकै करिब दुई मुट्ठी नट्स खान्छन् । काजु, बदाम, ओखर नियमित रूपमा खानुहोस् । हार्वर्ड युनिभर्सिटीको एक अध्ययनले ओखर खाने मानिसको मृत्युदर ओखर नखाने मानिसको तुलनामा २० प्रतिशत कम हुने देखाएको छ ।

भिटामिनयुक्त ब्रेड

हामी जुन ब्रेड खाइरहेका छौँ, त्यसमा धेरैजसो सुगर हुन्छ । त्यसबाट हाम्रो क्यालोरी मात्र बढ्छ । पारम्परिक ब्लु जोन्समा ब्रेडलाई गहुँ र जौबाट बनाइन्छ । यी क्षेत्रमा भिटामिनयुक्त ब्रेड पनि बनाइन्छ । यसमा कम ग्लुटेन हुन्छ भने यसलाई लामो समयसम्म राखेर खान सकिन्छ ।

हाम्रा पूर्वज अन्न खान्थे । त्यसैले अक्सर बिमारबाट बच्थे र लामो समयसम्म जिउँथे । ब्लु जोनमा पनि यस्तै भोजन गरिन्छ । उनीहरू आफ्नो भोजन काँचो, हल्का पकाएर वा पिसेर खान्छन् । ब्लु जोनका मानिसले आफ्नो खानामा आधा दर्जनभन्दा बढी सामग्री समावेश गर्छन् । यसलाई मिलाएर अचारजस्तै बनाउँछन् र लामो समयसम्म राखेर खान्छन् ।

प्रकाशित मिति: शनिबार, चैत ११, २०७९ ०८:३१