कास्कीमा स्ववियु चुनावका लागि अनेरास्ववियु र अखिल (क्रान्तिकारी)बीच लिखित सहमति, कसलाई के ?

कास्कीमा स्ववियु चुनावका लागि अनेरास्ववियु र अखिल (क्रान्तिकारी)बीच लिखित सहमति, कसलाई के ?

A+ A A-

त्रिभुवन विश्वविद्यालयअन्तर्गतका क्याम्पसमा हुन लागेको स्वतन्त्र विद्यार्थी युनियन (स्ववियु) चुनावमा कास्कीमा नेकपा एमाले र नेकपा माओवादी केन्द्रनिकट विद्यार्थी संगठनले मिलेर जाने लिखित सहमति गरेका छन् । शनिबार हुने मनोनयन दर्ताका लागि दुई संगठनले पाउने भागवण्डा पनि मिलेको छ ।

आगामी ५ चैतमा हुने चुनावमा एमालेनिकट अनेरास्ववियु र माओवादीनिकट अखिल (क्रान्तिकारी)बीच गठबन्धन गरेर जाने समझदारी यी दुई संगठनका माउ पार्टीको पहलकदमीमा शुक्रबार भएको हो ।

दुई पार्टीका नेता र विद्यार्थी संगठनका नेताले समझदारीपत्रमा हस्ताक्षर गरेका छन् । एमालेको तर्फबाट कास्की इन्चार्ज कृष्णबहादुर थापा, पार्टी जिल्ला उपाध्यक्ष तेजनारायण अधिकारी, सचिव बैनबहादुर अधिकारी क्षेत्री र अनेरास्ववियु कास्की संयोजक सन्तोष पोखरेलले हस्ताक्षर गरेका छन् । माओवादीको तर्फबाट कास्की इन्चार्ज राजकाजी गुरुङ, कास्की संयोजक केशव पौडेल, विद्यार्थी फ्याक्सन इन्चार्ज विनय थापा र अखिल (क्रान्तिकारी)का जिल्ला अध्यक्ष शरदसिंह विश्वकर्माले हस्ताक्षर गरेका छन् ।

कास्कीको पृथ्वीनारायण क्याम्पस, वन विज्ञान अध्ययन संस्थान पोखरा, विन्ध्यावासिनी संस्कृत विद्यापीठ, इन्जिनियरिङ अध्ययन संस्थान पश्चिमाञ्चल क्याम्पस, पोखरा नर्सिङ क्याम्पस र जनप्रिय बहुमुखी क्याम्पसमा कुन संगठनले कुन पद पाउने टुंगो लागेको छ ।

एमालेनिकट स्रोतका अनुसार इन्जिनियरिङ अध्ययन संस्थान पश्चिमाञ्चल क्याम्पसबाहेक अरु सभापति एमालेनिकट अनेरास्ववियुले लिनेछ ।

यस्तो छ भागवण्डा

१ पृथ्वीनारायण क्याम्पस

अनेरास्ववियु – सभापति, कोषाध्यक्ष र ५ जना सदस्य
अखिल (क्रान्तिकारी) – सचिव र ३ सदस्य

२ इन्जिनियरिङ अध्ययन संस्थान

अनेरास्ववियु – सचिव, कोषाध्यक्ष र ४ जना सदस्य
अखिल (क्रान्तिकारी) – सभापति र ३ सदस्य

३ वन विज्ञान अध्ययन संस्थान

अनेरास्ववियु – सभापति, सचिव, कोषाध्यक्ष र ३ जना सदस्य
अखिल (क्रान्तिकारी) – २ सदस्य

४ पोखरा नर्सिङ क्याम्पस

अनेरास्ववियु – सभापति, सचिव, कोषाध्यक्ष र ४ जना सदस्य
अखिल (क्रान्तिकारी) – सदस्यमा प्रत्यक्ष १ जना, समानुपातिकमा १ जना अनेरास्ववियुले समावेश गराउने

५ जनप्रिय बहुमुखी क्याम्पसमा

अनेरास्ववियु – सभापति, कोषाध्यक्ष र ५ जना सदस्य
अखिल (क्रान्तिकारी) – सचिव र २ जना सदस्य

६ विन्ध्यावासिनी संस्कृत विद्यापीठ

अनेरास्ववियु – सभापति, कोषाध्यक्ष र ४ जना सदस्य
अखिल (क्रान्तिकारी) – सचिव र २ जना सदस्य

७ समानुपातिक पदाधिकारी निर्वाचनतर्फ

अनेरास्ववियुलाई पृथ्वीनारायण क्याम्पसमा सहसचिव, इन्जिनियरिङ अध्ययन संस्थानमा उपसभापति, वनविज्ञान संस्थानमा सहसचिव र जनप्रिय बहुमुखीमा उपसभापति ।

अखिल (क्रान्तिकारी)लाई पृथ्वीनारायण क्याम्पसमा उपसभापति, इन्जिनियरिङ अध्ययन संस्थानमा सहसचिव, वनविज्ञान संस्थानमा उपसभापति र जनप्रिय बहुमुखीमा सहसचिव ।

प्रकाशित मिति: शुक्रबार, फागुन २६, २०७९ २२:१०