मुख्यमन्त्री शाहलाई राहत, नाउपाले विश्वासकाे मत दिने

A+ A A-

नागरिक उन्मुक्ति पार्टीले सुदूरपश्चिम प्रदेशका मुख्यमन्त्री कमल शाहलाई विश्वासकाे मत दिने भएकाे छ । याेसँगै मुख्यमन्त्री शाहले प्रदेशसभाबाट विश्वासकाे मत जित्ने लगभग निश्चित भएकाे छ ।

५३ प्रदेशसभा सदस्य रहेकाे सुदूरपश्चिम प्रदेशसभामा मुख्यमन्त्रीले विश्वासकाे मत जित्न २७ सांसदकाे समर्थन चाहिन्छ । प्रदेशसभामा नेपाली कांग्रेसका १९, माओवादी केन्द्रका ११, नागरिक उन्मुक्तिका ७, नेकपा एकीकृत समाजवादीका ४ र स्वतन्त्र एक सांसद छन् । यहाँ एमालेका १० सांसद छन् ।

नागरिक उन्मुक्ति संसदीय दलका नेता रामेश्वर चौधरीले मुख्यमन्त्री शाहलाई विश्वासको मत दिने बताए । ‘हामी विश्वासको मत दिन्छौँ', चाैधरीले शिलापत्रसँग भने, 'हामी सबै धनगढीमै छौँ । काठमाडौंमा रहेकाे म पनि आइसकेँ ।’

यसअघि नाउपाकी अध्यक्ष रञ्जिता श्रेष्ठले लिखित सम्झौताबिना विश्वासकाे मत नदिने बताएकी थिइन् । तर मुख्यमन्त्री शाह र नाउपाबीच के सहमति भयाे भन्ने चाहिँ खुलेकाे छैन । एकीकृत समाजवादीले यसअघि नै विश्वासकाे मत दिने बताइसकेकाेले शाह सरकारले निरन्तरता पाउने देखिएकाे छ ।

यता मुख्यमन्त्रीलाई विश्वासकाे मत दिनेबारे माओवादी केन्द्रले निर्णय गरिसकेकाे छैन । यथास्थितिमा विश्वासकाे मत दिन नसकिने माओवादी संसदीय दलका नेता खगराज भट्टले बताउँदै आए पनि छलफल चलिरहेकाे छ ।

'अहिले पनि छलफलमै छौँ । ११ बजे दलको बैठक बोलाइएको छ, केही निर्णय गर्ला', भट्टले आइतबार बिहान शिलापत्रसँग भने । माओवादीले पनि विश्वासकाे मत दिने निर्णय गरे शाहले प्रचण्ड बहुमत पाउने छन् । माओवादी र नाउपाले आलाेपालाे मुख्यमन्त्रीमा लिखित सहमति खाेजिरहेकाे बताइएकाे छ ।

संविधानको धारा १६८ को उपधारा ३ अनुसार मुख्यमन्त्री भएका शाहले आज दिउँसाे १ बजे बस्ने प्रदेशसभा बैठकमा विश्वासकाे मत लिने कार्यसूची छ ।

प्रकाशित मिति: आइतबार, फागुन २१, २०७९ ०९:०६