भोट माग्न गएका सुवासले जब माधव नेपालसँग पुरानो सम्बन्धको कुरा गरे

A+ A A-

राष्ट्रपतिमा एमालेका उम्मेदवार सुवासचन्द्र नेम्वाङले एकीकृत समाजवादी, राष्ट्रिय स्वतन्त्र पार्टी र राष्ट्रिय प्रजातन्त्र पार्टीको कार्यालयमै पुगेर भोट मागे । २५ फागुनमा हुने निर्वाचनका लागि भोट माग्न उनी दिनभर व्यस्त रहे । सुरुमा उनी नेकपा एसका अध्यक्ष माधव नेपाललाई भेट्न पुगेका थिए ।

एमाले अध्यक्ष केपी ओलीले नेकपा एसलाई पार्टीको रूपमा समेत स्वीकार गरेका थिएनन् । पार्टी फुटाएर नेकपा एस बनाएपछि एमाले अध्यक्ष ओली नेपालसँग रुष्ट थिए । तर, बिहीबार नेम्वाङको नेतृत्वमा एमालेको टोली नेकपा एसको कार्यालयमै पुगेर भोट माग्यो । यसअघि एमाले अध्यक्ष ओलीले औपचारिक पत्र पठाएर पनि नेकपा एससँग भोट मागेका थिए ।

अध्यक्ष नेपालबीच पुरानो सम्बन्धको विषयमा खुलेर कुराकानी भएको राष्ट्रपतिका उम्मेदवार नेम्वाङ बताउँछन् । ‘माधव कमरेडसँग लामो सम्बन्ध छ । सिंहदरबारमा संसदीय दलको कार्यालयमा जहाँ अहिले म बसिरहेको छु । त्यहाँ राष्ट्रियसभाको सदस्य हुँदा (२०४८) माधव कमरेड बस्नुहुन्थ्यो । उहाँ हाम्रो नेता हुनुहुन्थ्यो,’ नेम्वाङले भने, ‘आज परापुर्वकालदेखिको कुरा भयो । उहाँले (माधव) पनि धेरै कुरा राख्नुभयो ।’

२०४८ सालदेखि २०५६ सम्म नेपाल राष्ट्रियसभा सदस्य थिए भने नेम्वाङ २०४८ देखि २०५२ सम्म राष्ट्रियसभा सदस्य थिए ।

334244200_229308196201775_276687434146336387_n1677742510.jpg

नेकपा एसले औपचारिक रूपमै कांग्रेस उम्मेदवार रामचन्द्र पौडेललाई मत दिने निर्णय गरिसकेकाले नेम्वाङलाई मत नदिने निश्चित छ । ‘माधव कमरेडले हाँसेर अप्ठयारो छ भन्नुभयो । हामीले हाम्रो कुरा राखेका छौँ । माया, सद्भाव र शुभकामना लिएर फर्किएका छौँ,’ नेम्वाङले भने ।

एमाले र नेकपा एसबीच संवाद आरम्भ हुनुलाई अर्थपूर्ण रूपमा हेरिएको छ । नेकपा एसका उपाध्यक्ष प्रमेश हमाल छलफल सकारात्मक भएको बताउँछन् । ‘कुराकानीको आरम्भ भएको छ । यो सकारात्मक हो । तर, अहिलेको परिस्थितिमा हामीले रामचन्द्र पौडेललाई प्रस्ताव गरेको जानकारी गरायौँ,’ उनले भने ।

एससँग सम्बन्ध सुधार्ने एमाले रणनीति, राष्ट्रपतिमा पाऊला समर्थन ?

नेकपा एससँगको भेटपछि नेम्वाङ भोट माग्न राष्ट्रिय स्वतन्त्र पार्टीको कार्यालय बसुन्धारा पुगे । रास्वपाबाट पनि सकारात्मक सन्देश पाएको नेम्वाङले बताए । ‘सकारात्मक छौँ । संविधानसभाको अध्यक्ष भएर खेलेको भूमिकाले पनि योग्य हुनुहुन्छ । राम्रो हुनुहुन्छ भन्नुभयो,’ नेम्वाङले भने । रास्वपाले राष्ट्रपतिमा कसलाई मत दिने औपचारिक निर्णय गरेको छैन ।

तर, सरकारलाई दिएको विश्वासको मत रास्वपाले कायमै राखेकाले राष्ट्रपतिमा पौडेललाई मत दिन सक्ने सम्भावना पनि छ । २४ या २५ गते मात्र निर्णय लिने तयारीमा रास्वपा छ ।

‘अहिले तठस्थ बस्छौँ । अन्तिममा निर्णय गर्छौं,’ रास्वपाका प्रवक्ता डा. मुकुल ढकालले भने । भेटमा सभापति रवि लामिछानेले नेम्वाङको प्रशंसा भने गरेका थिए । ‘उहाँ (सुवास) लोकप्रिय हुनुहुन्छ । संविधानसभामा काम गरेकाले पनि राम्रो हुनुहुन्छ । सकारात्मक छौँ,’ सभापति लामिछानेले भने । रास्वपाको १९ सिट छ ।

रास्वपासँगको भेटपछि नेम्वाङ नेतृत्वको टोली भोट माग्न राप्रपा कार्यालयमा पुगेको थियो । ‘राप्रपाले एमालेसँग सहकार्य गर्दै आएको छ । राम्रो सम्बन्ध छ । आउने दिनमा पनि राम्रो सम्बन्ध बनाउने भन्नुभएको छ,’ नेम्वाङले भने, ‘उहाँहरू निर्वाचनमा आउनुनुहुन्छ । राप्रपाको निर्णयलाई सम्मान गर्छौं ।’ राप्रपाका कतिपय सांसदले राष्ट्रपतिको चुनावमा मत नदिने बताउँदै आएका छन् ।

रवि लामिछानेलाई भेट्न बसुन्धारा पुगे एमाले नेताहरू

rabi and subash1677745417.jpg

कांग्रेससँग पनि मत माग्दै

कांग्रेससँग पनि मत माग्न जाने तयारीमा नेम्वाङ छन् । ‘कांग्रेससँग पनि कुरा भएको छ । सभापति शेरबहादुर देउवालाई आज या भोलि भेटेर कुरा गर्छु,’ नेम्वाङले भने । राष्ट्रपतिका उम्मेदवार नेम्वाङले माओवादी अध्यक्ष एवं प्रधानमन्त्री पुष्पकमल दाहालसँग छलफल गरिसकेका छन् ।

‘प्रधानमन्त्रीसँग पनि छलफल भएको छ । म आशावादी छु । राष्ट्रपतिको निर्वाचनमा सांसदहरूले विवेकको मत प्रयोग गर्नुहुन्छ । निर्वाचन भएर पनि राष्ट्रिय सहमतिको राष्ट्रपति बन्न सकिन्छ । स्वस्थ प्रतिस्पर्धा लोकतन्त्रको गहना हो,’ नेम्वाङले भने ।