एससँग सम्बन्ध सुधार्ने एमाले रणनीति, राष्ट्रपतिमा पाऊला समर्थन ?

A+ A A-

१७ फागुनमा बसेको एकीकृत समाजवादी (एस)को केन्द्रीय सचिवालय बैठकले निर्णय गर्‍यो– राष्ट्रपतिमा आठदलीय गठबन्धनका उम्मेदवार रामचन्द्र पौडेलको पक्षमा मतदान गर्ने । पार्टीको सचिवालयले निर्णय गर्नुअघि नै ११ फागुनमा बालुवाटारमा अध्यक्ष माधवकुमार नेपालले कांग्रेस–माओवादीलाई वचन दिइसकेका थिए ।

त्यही वचनको अनुमोदनमात्रै थियो १७ फागुनको निर्णय । यो निर्णय गरेको भोलिपल्ट आज एमालेतर्फबाट राष्ट्रपति उम्मेदवार सुवास नेम्वाङसहितकाे टोली एससँग भोट माग्न पुग्याे । उपाध्यक्ष विष्णु पौडेल र उपमहासचिव पृथ्वीसुब्बा गुरुङ एस अध्यक्ष नेपाललाई भेट्न पुगे । एसले राष्ट्रपतिमा पौडेललाई समर्थन गर्ने निर्णय गरेको प्रस्ट हुँदाहुँदै नेम्वाङको टोली किन गयो नेपाललाई भेट्न भन्नेमा आशंका उब्जिएकाे छ ।

हुन त एमाले अध्यक्ष केपी शर्मा ओलीले १३ फागुनको साँझ नेपाललाई सम्बोधन गरेर राष्ट्रपतिका लागि मत माग्दै पत्र पनि पठाएका थिए । त्यसको जवाफमा एसका प्रवक्ता जगन्नाथ खतिवडाले एमालेसँग संवादको ढोका खोलेको बताएका थिए । एसका नेताहरू अध्यक्ष ओलीले आफ्नो पार्टीलाई स्वीकार नै नगरेका कारण संवादहिनता रहेको बताउने गरेका थिए । तर, १३ फागुनको पत्रपछि संवादको ढोका खुलेको बताइरहेका छन् । त्यसैको निरन्तरता थियो आज नेम्वाङको टोली– एसको पार्टी कार्यालय पुग्नु ।

त्यसो त, एमाले अध्यक्ष ओलीले अन्तिम समयमा राष्ट्रपतिमा नेपाललाई प्रस्ताव गरेका थिए । ओलीको प्रस्तावप्रति विश्वस्त हुन नसकेका कारण नेपालले प्रस्ताव स्वीकार गरेनन् । अ‍ोलीले एससँग एकता गर्ने गरी प्रस्ताव गरेका थिए । त्यसमा माधव नेपालले भरपर्दो गरी प्रस्ताव नआएको बताउने गरेका छन् । यद्यपि, औपचारिक रूपमा भने ओलीले दुईपटक प्रस्ताव गरेका थिए । त्यो प्रस्तावमा एसको पार्टीभन्दा पनि संसदीय दलसँग एकता गर्ने रणनीतिसहित एमाले अध्यक्ष ओलीले चलखेल गर्ने प्रयास गरेपछि नेपाल थप बिच्किएका थिए ।

एससँग एकता गर्नेबित्तिकै एमालेकाे संसदीय दलमा कांग्रेसकै जति सिट हुन्छ । एमालेबाट विद्रोह गरी स्वतन्त्र निर्वाचित योगेन्द्र मण्डललाई एमालेमा फर्काउन सक्यो भने एमाले संसदको सबैभन्दा ठूलो दल बन्न सक्छ । नेपाललाई राष्ट्रपति प्रस्ताव गर्नुमा ओलीकाे त्यही प्रयास देखिन्थ्यो । १३ फागुनको ओलीको पत्र र आज नेम्वाङको टोली अध्यक्ष नेपाललाई भेट्न जानुलाई एससँग सम्बन्ध विस्तार गरेर एकता प्रक्रियामा लैजानुसँग जोडिएको विश्लेषण भइरहेको छ । एमाले अहिले पनि प्रचण्ड नेतृत्वको सरकार ढाल्ने रणनीतिमा छ । संसदको ठूलो दल भएको अवस्थामा सरकार बनाउने अवसर आफ्नो पार्टीलाई आउने एमालेको बुझाइ देखिन्छ ।